Ձեր վստահելի աղբյուրը

Հալեպահայ  Լևոն Քեոշկերյանն արդեն մեկ տարի է մայրիկի հետ բնակվում է Երևանում: Հալեպում ապրած տարիներին զբաղվել է արծաթագործությամբ: Ունեցել է խանութ: Պատերազմի պատճառով թողել է ամեն ինչ և եկել Հայաստան՝ իր հետ բերելով իր արծաթե իրերը:

«Այսօր վաճառում եմ այդ գործերը: Վերնիսաժում եմ կանգնում: Փոքր գործերն ավելի լավ են վաճառվում, քան մեծ: Հույս ունեմ, որ ամեն ինչ լավ կլինի: Պատվերների դեպքում կարող եմ աշխատանքի տեղ վերցնել և աշխատել»,- Panorama.am-ի հետ զրույցում ասաց  Լևոն Քեոշկերյանը:

Նրա խոսքով, երբ դեռ նոր էր պատերազմը սկսվել, մտքներով անգամ չէր անցնում, որ կարող է այսքան երկարել:

«Մտածում էինք երեք ամսից կվերջանա, հետո վեց ամիս, հետո մեկ տարի: Բայց արդեն հինգ տարի է շարունակվում է: Վիճակը գնալով ավելի վատանում է: Վատ օրեր ենք տեսել: Շատ վտանգավոր էր: Դուրս էիր գալիս փողոց՝ չգիտեիր, կվերադառնաս տուն, թե չէ: Շատերը հենց փողոցում  էին զոհվում, շատերը հենց իրենց տանը՝ հրթիռ էր ընկնում: Մի օր տանը քնած էի, մեր կողքի տունը հրթիռ ընկավ: Մի քիչ այս կողմ ընկներ, ես…

Հասկացանք, որ այս ամենը շուտ չի վերջանա: Տունս, խանութս կա, արհեստանոցս փլվել է»,- պատմեց Լևոն Քեոշկերյանը:

Այսօր ընկերներ, բարեկամներ ունի, ովքեր շարունակում են ապրել Հալեպում:

«Կապի մեջ եմ: Ասում են, որ ավելի ու ավելի է վատանում վիճակը: Ասում եմ՝ եկեք այստեղ: Բայց ամեն մարդ չի կարող հավաքվի ու գա, խնդիրներ կան՝ ճանապարհածախս, այստեղ բնակվելու համար վարձ: Հնարավորություն չունեն»,- ասաց նա:

Հալեպահայի խոսքով, եթե վիճակը կարգավորվի, անշուշտ, վերադառնալու են Սիրիա, քանի որ  ամեն ինչ թողնել են այնտեղ:

Լ. Քեոշկերյանն այս պահին չի մտածում Հայաստանից՝ երրորդ երկիր գնալու մասին:

«Եղել եմ տարբեր երկրներում: Հայրենիքի մեջ մենք մեզ ավելի հանգիստ ենք զգում: Միակ խնդիրը գործն է: Եթե օրվա հացը հանգիստ ճարվի, այստեղից լավ տեղ ամբողջ աշխարհում չկա»,- ասաց նա:

Արդեն հինգ տարի է Սիրիայում պատերազմ է: ՄԱԿ-ի տվյալներով, Սիրիայում շուրջ 18 միլիոն մարդ է ապրում, 7 միլիոնը տեղահանվել է: Սիրիայում մինչև պատերազմը բնակվել է 80 հազար հայ: Պատերազմական այս տարիներին նրանց մեծ մասը լքել է Սիրիան՝ տեղափոխվելով Հայաստան, Լիբանան, Հորդանան, աշխարհի տարբեր երկրներ: 17-20 հազար սիրիահայ դեռևս Սիրիայում է: