Արցախում սահմանադրական բարեփոխումների հայեցակարգը կներկայացվի մինչև օգոստոսի 1-ը
ԼՂՀ նախագահին առընթեր սահամանդրական բարեփոխումների մասնագիտական հանձնաժողովի նախագահ, խորհրդարանի ղեկավար Աշոտ Ղուլյանի մեկնաբանություն է տվել Արցախի հանրային հեռուստատեսությանը՝ սահմանադրական բարեփոխումների հայեցակարգի ներկայացման ժամկետի երկարաձգման վերաբերյալ: Հարց ու պատասխանը ներկայացնում են ԼՂՀ ԱԺ մամուլի ծառայությունից.
Հանրային.-Արդյո՞ք ապրիլյան պատերազմն ազդեցություն ունեցավ սահմանադրական բարեփոխումների շուրջ քննարկումների ընթացքի վրա:
Աշոտ Ղուլյան.- Արցախում սահմանադրական բարեփոխումների մասնագիտական հանձնաժողովը որոշակի խոչընդոտների է հանդիպել գործունեության հենց առաջին փուլում: Ապրիլյան պատերազմն ինքնաբերաբար հետաձգել է այն աշխատանքները, որոնք պետք է կատարվեին սահմանադրական բարեփոխումների հայեցակարգը մշակելու ուղղությամբ: Այդ պատճառով էլ հանձնաժողովը դիմել էր հանրապետության նախագահին՝ հայեցակարգի ներկայացման ժամկետը երկու ամսով երկարաձգելու խնդրանքով: Մայիսից սկսած, երբ իրավիճակը համեմատաբար հանգիստ էր, մասնագիտական հանձնաժողովը մի քանի փուլերով աշխատանքներ ու քննարկումներ է իրականացրել իր առջև դրված խնդիրները լուծելու նպատակով:
Քննարկումների ընթացքում պարզվեց, որ սահմանադրական բարեփոխումների հայեցակարգի հիմնական սկզբունքների հարցում առկա են տարբեր դիրքորոշումներ եւ այդ երկու ամիսը բավարար չէ նման պատասխանատու գործի համար: Խոսքը, մասնավորապես, պետական կառավարման մոդելի ընտրության մասին է, որի շուրջ քննարկումները շարունակվում են ևւ, այս պահին կարող եմ ասել, որ ուրվագծվում է հայեցակարգի հիմքի համար պահանջվող համաձայնությունը:
Մենք արդեն հասել ենք մի հանգրվանի, երբ պետք է ամփոփենք այն, ինչ ունենք: Բայց դրա համար անհրաժեշտ է, որ մեկ անգամ ևս մեր քաղաքական դաշտի և հանրային կյանքի հիմնական դերակատարների հետ ճշտենք այն տիրապետող կարծիքներն ու մոտեցումները, որոնք առկա են պետական կառավարման մոդելի հարցում:
Հանրային.-Ինչպիսի՞ լուծումներ եք տեսնում սահմանված ժամկետներում նախատեսված աշխատանքներն ավարտելու համար:
Աշոտ Ղուլյան.Մասնագիտական հանձնաժողովը նպատակահարմար է գտել դիմել հանրապետության նախագահին՝ հայեցակարգի ներկայացման ժամկետը մեկ ամսով եւս երկարաձգելու խնդրանքով: Հունիսի 29-ին նախագահի հրամանագրով այդ ժամկետը երկարաձգվել է մինչեւ օգոստոսի 1-ը:
Հաշվի առնելով, որ մասնագիտական հանձնաժողովն իր աշխատանքում առաջնորդվում է գործունեության հաստատված կարգով, ուստի հղում անելով այդ փաստաթղթին՝ հիշեցնեմ, որ մասնագիտական հանձնաժողովը սահմանադրական բարեփոխումների հայեցակարգի վերաբերյալ առաջարկություններ ու միջնորդություններ ընդունելուց բացի անցկացնում է նաեւ այդ նախագծի հանրային քննարկումներ, որից հետո միայն նախագիծը ներկայացնում է հանրապետության նախագահին:
Վերստին նշեմ, որ այս անգամ ժամկետի երկարաձգումը պայմանավորված է արդեն կատարած աշխատանքներն ամփոփելու և դրա շուրջ հանրային քննարկումներ կազմակերպելու անհրաժեշտությամբ:
Լրահոս
Տեսանյութեր
Արման Թաթոյանը միացավ Բագրատ Սրբազանի առաջնորդած քայլերթին
