«Սասնա ծռերի» վիրավոր անդամը կմասնակցի իր կալանքի գործով բողոքարկման նիստին
Հրազենային ծանր վիրավորում ստացած և այժմ «Դատապարտյալների հիվանդանոց» ՔԿՀ-ում կալանքի տակ գտնվող «Սասնա ծռեր» խմբի անդամ Հովհաննես Հարությունյանի կալանքի վերաբերյալ բողոքի քննությունը Վերաքննիչ դատարանում կկայանա վաղը, օգոստոսի 9-ին: Այդ մասին Panorama.am-ին տեղեկացրեց Հարությունյանի պաշտպանությունն իրականացնող փաստաբանական խմբի անդամ Հայարփի Սարգսյանը:
Կալանքի վերաբերյալ ընդհանուր իրավասության դատարանի որոշման բողոքարկումը պետք է տեղի ունենար այսօր: Սակայն Հովհաննես Հարությունյանը միջնորդություն էր ներկայացրել դատարանին՝ խնդրելով ապահովել իր ներկայությունը որոշման բողոքարկմանը, ինչը բավարարվել էր:
«Հովհաննես Հարությունյանը զրկված լինելով հենաշարժողական համակարգի աշխատանքից, նաև ունենալով վիրահատության կարիք, այնուամենայնիվ հաշվի չառնելով նրա ծանր վիճակը, նրա նկատմամբ կիրառվել էր կալանքի որոշում, և նա տեղափոխվել էր դատապարտյալների հիվանդանոց», -մեզ հետ զրույցում ասաց փաստաբանը՝ նկատելով, որ կալանքի որոշման հիմքում դրվել է այն, որ Հարությունյանը կխոչընդոտի գործի քննությանը, ինչը անընդունելի է:
Ինչ վերաբերում է «Դատապարտյալների հիվանդանոց» ՔԿՀ-ում ծանր վիճակում գտնվող Հարությունյանի պահման պայմաններին, փաստաբանն ասաց, որ բողոքի մեծ ալիքից հետո Հարությունյանին տեղափոխել են այլ հիվանդասենյակ, բայց այստեղ ևս անտարբերության է մատնված հիվանդը և չի գտնվում բժիշկների մշտական հսկողության ներքո:
«Դատապարտյալների հիվանդանոց ՔԿՀ-ում նա անտարբերության է մատնված հակահիգիենիկ վիճակում էր բողոքեցինք սենյակը փոխեցին: Բայց, միևնույն է, նա գիշերը ցավեր է ունենում և նրան օգնության կանչելու որևէ ձև չկա, անգամ մի կոճակ չկա, որ զանգի, որևէ մեկը գա», -նկատեց փաստաբանը:
Նա նաև ասաց, որ Վերաքննիչ քրեական դատարանում կալանքի որոշման բողոքարկման նիստը անցկացվելու է դռնփակ, սակայն պաշտպանական խումբը այսօր միջնորդություն է ներկայացնելու, որպեսզի նիստը վաղը անցկացվի դռնբաց:
«Գործը հասարակական մեծ հնչեղություն է վայելում և հարկ է, որ այն անցկացվի դռնբաց, հասարակության ներկայությամբ», -նշեց փաստաբանը:
Նշենք, որ Հարությունյանին մեղադրանք առաջադրվել է ՀՀ Քրեական օրենսգրքի 219-րդ հոդված 3-րդ մասի 1-ին կետով (Կազմակերպված խմբի կողմից՝ շենքեր, շինություններ, տրանսպորտի, հաղորդակցության կամ կապի միջոցներ զավթելը) և 235-րդ հոդվածի 3-րդ մասով (կազմակերպված խմբի կողմից՝ ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը)։