Ձեր վստահելի աղբյուրը

Ա. Սպենդիարյանի անվան օպերայի և բալետի ազգային ակադեմիական թատրոնում հոկտեմբերի 8-ին կկայանա համերգ՝ թատրոնի սիմֆոնիկ նվագախմբի և երգչախմբի մասնակցությամբ: Համերգը կղեկավարի թատրոնի գեղարվեստական ղեկավար Կոնստանտին Օրբելյանը: Օպերային թատրոնի գեղարվեստական ղեկավարի պաշտոնում Կ. Օրբելյանի նշանակվելուց հետո սա առաջին ելույթն է Հայաստանի գլխավոր թատրոնի բեմում:

Երեկոյին ելույթ են ունենալու մենակատարներ՝ ՀՀ վաստակավոր արտիստ Մարինե Դեինյան, ՀՀ վաստակավոր արտիստ Գևորգ Հակոբյան, Հովհաննես Այվազյան, Հասմիկ Թորոսյան, Սյուզաննա Մելքոնյան, Լիլիթ Հակոբյան: Լինելու է նաև Մեծ Բրիտանիայից հրավիրյալ խմբավար՝ Ստեֆան Հարրիս:

«Հետաքրքիր ծրագիր ենք պատրաստել»,- լրագրողների հետ հանդիպմանն ասաց Կ. Օրբելյանը: 

Ծրագրում կհնչեն՝ Վ. Բելինիի, Ջ. Պուչինիի, Պ. Չայկովսկու, Ժ. Բիզեի և Ջ. Վերդիի ստեղծագործությունները:

Հիշեցնենք, որ Կոնստանտին Գ.Օրբելյանը  Ա. Սպենդիարյանի անվան օպերայի և բալետի ազգային ակադեմիական թատրոնի գեղարվեստական ղեկավարն է այս տարվա հունիսից:

Նա ասաց, որ արդեն հասցրել է ծանոթանալ երգիչների հետ, քննարկել են և շարունակում են քննարկել տարբեր խնդիրներ, առաջիկա ինչ բեմադրություններ պետք է անեն:

«Հիանալի ձայներ ունենք Հայաստանում: Մեր երգիչները կհամագործակցեն այլ երկրների օպերային թատրոնների երգիչների հետ: Նման համագործակցություն կա ամենուր»,- ասաց թատրոնի գեղարվեստական ղեկավարը:

Նա տեղեկացրեց, որ շուտով թատրոնի բեմում կլինի Ջակոմո Պուչինիի «Տոսկա» երեք գործողությամբ օպերան, դեկտեմբերին նախատեսել են Արամ Խարատրյանի «Դիմակահանդես» բալետի պրեմիերան, իսկ հաջորդ տարվա գարնանը՝  Ջակոմո Պուչինիի «Մադամ Բատերֆլայ» օպերայի պրեմիերան:  Օրբելյանը նաև ասաց, որ 2017-ի ապրիլի վերջին օպերային փառատոն է անցկացնելու Հայաստանում:

Ասուլիսին ներկա օպերային թատրոնի տնօրեն Անդրանիկ Արզումանյանի  խոսքով՝ մի քանի ամսվա համար երեք պրեմիերան արդեն քիչ չէ: Ըստ նրա, կարևոր է որակը, իսկ որակյալ բեմադրություններ անելու համար ժամանակ է հարկավոր:

Խոսելով այն մասին, թե արդյո՞ք խնդիրներ չեն առաջանում, որ գեղարվեստական ղեկավար Կ. Օրբելյանը  քիչ է լինում Հայաստանում, Ա.Արզումանյանն ասաց, որ երբ մաեստրոյին առաջարկել էին գեղարվեստական ղեկավարի  պաշտոնը, նա արդեն այս տարվա համար իր ստեղծագործական ծրագիրը կազմած է եղել:

«Արդեն հաջորդ տարվանից Կոնստանին Գ. Օրբելյանը հիմնականում կլինի Հայաստանում: Բայց ստեղծագործական մարդը պետք է լինի տարբեր երկրներում, տարբեր բերեմում, նաև այդպես մեր երկրի անունն է բարձրացնում»,- նշեց նա:

Ա.Արզումանյանի խոսքով՝ թեև մաեստրոն պարբերաբար գալիս-գնում է, սակայն արդեն ծանոթ է ամբողջ անձնակազմին, գիտի՝ ով ինչպես է երգում, հստակ պատկերացում ունի թատրոնի մասին: