Ձեր վստահելի աղբյուրը

ԱԺ ՀՅԴ խմբակցության ղեկավար Արմեն Ռուստամյանը խորհրդարանական ճեպազրույցների ժամանակ պատասխանելով  հարցին, թե հնարավո՞ր է,  որ ՀՀԿ-ն Վանաձորում դառնա ընդդիմություն, նշեց, որ եթե մյուս կուսակցությունները միանան, ՀՀԿ-ն ընդդիմադիր կարգավիճակ ձեռք կբերի. «Հիմա բոլոր խաղաքարտերն ընդդիմադիր դաշտի ձեռքում են»:

Հիշեցնենք, որ «Հայկական վերածնունդ» կուսակցությունը հայտարարել է, որ Վանաձորում կպաշտպանի «Լուսավոր Հայաստանի» թեկնածուին, իսկ ԲՀԿ կուսակցության նախագահ  Նաիրա Զոհրաբյանն էլ ասել էր, որ Վանաձորի ավագանիում «Բարգավաճ Հայաստանը» սատարելու է միասնական ընդդիմության կոնսոլիդացված լուծմանը:

«Դրական եմ համարում, որ առաջին անգամ, թեկուզ երրորդ քաղաքում,  արձանագրվել է մի արդյունք, որ ոչ իշխանական ուժերն ունեն հնարավորություն իշխանափոխություն կատարել: Ուրախ եմ, որ համաձայնության մասին է խոսվում, բայց ես դառը փորձ ունենալով՝ չէի շտապի դա վերածել 17 ձայնի»,- ընդգծեց Արմեն Ռուստամյանը՝ հավելելով, քվեաթերթիկները գաղտնի են լինելու, կբացեն կտեսնեն, և ես շատ կուզի, որ լինի այնքան ձայն, որ իշխանությունն անցնի ընդդիմությանը:

Ըստ պատգամավորի՝  սա լավ նախադեպ է, լավ կլինի, որ այդ նախադեպը չձախողվի  ներքին խնդիրների պատճառով:

Անդրադառնալով  Շիրակի մարզում անցկացված ՏԻՄ ընտրություններին, որտեղ ՀՅԴ-ն չի հաղթահարել անհրաժեշտ 5 տոկոսանոց շեմը, և  շրջանառվող լուրերին, թե Շիրակի դաշնակցական մարզպետին կազատեն պաշտոնից ձախողման համար, Արմեն Ռուստամյանը պատասխանեց՝  իրենք մարզպետ չեն նշանակել, որ նա ձայն ապահովեր կամ գնար ձայն հավաքեր իրենց համար:

Մարզպետի խնդիրը, ըստ նրա, այն է, որ կարողանա տվյալ մարզում առաջացած խնդիրներին ժամանակին լուծում տա՝ դրանով նվաճելով բնակչության հարգանքը: Այդ առումով նաև շահում է այն կուսակցությունը:

Նրա խոսքերով՝ որևէ մեկը չի կարող ասել, որ Շիրակում մարզպետը լծակներ և ադմինիստրատիվ ռեսուրս է կիրառել և, եթե կիրառեր, արդյունքներն այլ կլինեին։

«Բայց մենք ասել ենք, որ դժգոհ ենք մեր արդյունքներից: Միաժամանակ համարում ենք, որ ՏԻՄ ընտրություններն առաջին անգամ երկու քաղաքում կայացել է,  մենք դրական միտում ենք նկատում՝ առ այն, որ մրցակցային են դառում ընտրություները նաև տեղական մակարդակով: Ինչ վերաբերում է մեր արդյունքներին, հիմա մենք քննություն ենք նշանակել, այն բազմակողմանի ու խորքային կլինի, կբերի ամբողջ պատկերը, և այդ պատկերի հետ կապված կկայացնենք մեր որոշումները, որը կվերաբերի ամեն մեկի ունեցած դերին, հաշվետվություն պետք է ներկայացնեն բոլոր օղակները»,- ընդգծեց Արմեն Ռուստամյանը:

Նա միաժամանակ նշեց, որ պարտությունը նորմալ են համարում,  քաղաքական պայքարում պարտություններ էլ պետք է լինեն։ Ըստ պատգամավորի՝ պարտությունն ունի դրական արդյունք լուրջ քաղաքական ուժի համար, այդ պարտությունը չի թողնում, որ մեծամտանաս:
Արմեն Ռուստամյանը նաև ասաց, որ այս ՏԻՄ ընտրությունների մասով երկու ծայրահեղ գնահատական կա, ինչն անընդունելի է ՀՅԴ համար:

«Մեկն այն է, այս ընտրությունները ոչ մի կարևորություն չունեն: Մենք հեռու ենք այդ մտքից, համարում ենք, որ կարևոր են: Առաջին հերթին սա մեզ համար ստուգատես էր: Մյուս ծայրահեղությունն էլ չենք ընդունում, որ այն համամասնությունը, որը եղել է այս ընտրություններում, արտացոլվելու  է նաև համապետական ընտրությունների ժամանակ: Մենք չենք համարում, որ ձախողել ենք, քանի որ համայնքապետերի մակարդակով՝ թվային առումով մենք աճել ենք»,- նշեց նա: