Ձեր վստահելի աղբյուրը

«Ես միշտ ողջունել եմ, որ ընդդիմադիր ուժերը կարող են գալ կոնսենսուսի, սա հաջողված քայլ է»,- այս մասին այսօր ԱԺ ճեպազրույցների ժամանակ ասաց ՀՀԿ խմբակցության ղեկավար Վահրամ Բաղդասարյանը՝ անդրադառնալով ՏՒՄ ընտրությունների շուրջ ստեղծված իրավիճակին:

«Նման ընդդիմադիր կոալիցիաներ եղել են, բայց շատ կարճ կյանք են ունեցել՝ ինչ-որ մի հարցի, մի նպատակի շուրջ: Աստված ոչ անի, որ սա էլ կարճ տևի: Ես չեմ ուզում չարախոսել, Աստված տա, երկար տևի, քանի որ դրանով հիմք կդրվի քաղաքական ընդդիմադիր դաշտի կայացմանը»,- ասաց նա:

Անդրադառնալով նաև Վանաձորում ՀՎԿ թեկնածու Արկադի Փելեշյանի՝ եկեղեցական ծեծելու միջադեպին,  Վահրամ Բաղդասարյանն ասաց. «Մարդը, որը տուժել է՝ Ռաֆայել Գրիգորյանը, ինտելեկտուալ անձնավորություն է, հավատքի մարդ է, կյանքում քաղաքական ինտրիգներին չի մասնակցում: Եղել է և կա հավատքի մարդ: Նրան վարկաբեկելը, մեղադրանքներ առաջադրելը, ինձ թվում է, որ մեղք են գործում: Իսկ Արկադի Փելեշյանը մեծերի նկատմամբ բավական հարգալից երիտասարդ է: Ափսոսում եմ, որ նման կենսագրությունով է մտնում քաղաքական դաշտ, և ինձ համար զարմանալի է, որ նման միջադեպ է եղել, քանի որ նման երևույթ մինչև այդ ես չեմ տեսել իրենից»:

Հարցին, թե արդյոք Արկադի Փելեշյանը քրեական հեղինակություն է, Վահրամ Բաղդասարյանը նշեց, որ Վանաձորում չկան հեղինակություններ, մեղմ քաղաք է. «Եթե որևէ մեկը իր գլուխը փորձում է վեր հանել՝ շատ արագ իջեցնում են ներքև»: