Ձեր վստահելի աղբյուրը

«Այսօր մենք հայտարարել ենք, որ Վանաձորում աջակցում ենք Քրիստ Մարուքանին, մնացած ցուցակներն անփոփոխ են, և դուք կտեսնեք արդյունքները»,-այսօր Ազգային ժողովի ճեպազրույցների ժամանակ ասաց ՕԵԿ խմբակցության քարտուղար Մհեր Շահգելդյանը՝  անդրադառնալով  իրենց՝  «Հայկական վերածնունդ» կուսակցության հայտարարությանը, որ Վանաձորում սատարելու են «Լուավոր Հայաստանի» թեկնածու Քրիստ Մարուքյանին:

Հարցին, թե հնարավոր է՝ վերջին պահի իրենց կուսակցությունը այլ կերպ կքվեարկի, նա պատասխանեց. «Այն, որ հասարակությունը դրական է ընդունում Վանաձորում  3 քաղաքական ուժերի միջև համաձայնության փաստը, և վիրտուալ դաշտը աջակցություններով է լցված, միանշանակ է: Միանշանակ է նաև, որ մենք աջակցում ենք Քրիստ Մարուքյանին»:

Նրա խոսքերով՝  իրենք խոսել են «Լուսավոր Հայաստանի» աջակցության մասին, համագործակցության այլ եզրեր էլ կգտնեն, այսօր խոսքը գնում է երկու մեծ քաղաքների մասին, բայց սա համագործակցության լավ նախադեպ է: «Այս ընտրությունները ցույց տվեցին, որ ՀՀԿ-ն կորցնում է իր դիրքերը»,- ասաց նա:

Հարցին, թե երբ Հայկական վերածնունդը Վանաձորում գնում էր ընտրությունների, տեղյա՞կ էին, որ իրենց ցուցակը գլխավորող Արկադի Փելեշյանը քրեական հեղինակություն է, մականունավոր, Մհեր Շահգելդյանը պատասխանեց. «Մականունավոր չէ, ժողովրդական մարդ է ավելի շատ: Մենք հանդիպել ենք քաղաքացիների հետ, մարդիկ սիրում են Արկադի Փելեշյանին այն պարզ պատճառով, որ մշտապես կանգնել է ամենաաղքատ մարդկանց կողքին, օգնել է իր հնարավորությունների շրջանակներում»:

Անդրադառնալով Արկադի Փելեշյանի հետ կապված միջադեպին, Մհեր Շահգելդյանն ասաց , որ այն, ինչ ներկայացվում է մամուլում, պարզ դարձավ, որ բազմաթիվ երևույթներ չեն համապատասխանում իրականությանը. «Բոլորս տեսել ենք վիդեոկադրերը, նա մոտենում է շենքին, իրեն ուղեկցում են ներս, էլ չենք տեսնում, թե սենյակում ինչ է եղել»: