Պետք է ավելի ագրեսիվ աշխատանք իրականացնել ռուսական շուկա մուտք կգործելու համար. Արմեն Եգանյան
2016 թվականի հունվար-օգոստոս ամիսներին Հայաստանի արդյունաբերության ոլորտում արձանագրվել է 7 տոկոսի աճ: Այս մասին այսօր լրագրողների հետ հանդիպման ժամանակ ասաց ՀՀ տնտեսական զարգացման և ներդրումների նախարարության արդյունաբերության զարգացման վարչության պետ Արմեն Եգանյանը:
Անդրադառնալով թեթև արդյունաբերության ոլորտի ցուցանիշներին, վարչության պետն ասաց, որ նշված ժամանակահատվածում hագուստի արտադրության ծավալներն աճել են 32%-ով, կոշիկի և կաշվե իրերի արտադրության ծավալները՝ 26%-ով:
Արմեն Եգանյանի խոսքերով՝ այս տարի նաև ավելացել է արտահանումը: Մասնավորապես, հունվար-օգոստոսին հագուստի արտահանման աճը կազմել է 60 տոկոսից ավելի, կոշիկինը՝ 126 տոկոս։ Հայկական արտադրանքը հիմնականում արտահանվում են եվրոպական երկրներ, սակայն այս տարի ավելացել են նաև ռուսական շուկա արտահանման ծավալները:
«ՌԴ-ն համարվում է թիրախային շուկա թեթև արդյունաբերության ոլորտի համար, ռուսական շուկան մեծ ներուժ ունի այդ արտադրանքն օգտագործելու համար, դրա համար պետք է այդ հնարավորությունն օգտագործել և ավելի ագրեսիվ աշխատանք իրականացնել ռուսական շուկա մուտք գործելու համար»,-ասաց Արմեն Եգանյանը։
Անդրադառնալով մանածագործական իրերի արտադրության ծավալներին, վարչության պետը նշեց, որ նախորդ տարվա հունվար-օգոստոսի համեմատ այս տարի ծավալները կրճատվել են 6%-ով:
Արմեն Եգանյանի խոսքերով՝ եթե տեղական ընկերությունները մրցունակ արտադրանք արտադրեն, ապա դա հնարավորություն կտա շուկայից դուրս մղել դրսի, այդ թվում՝ Թուրքիայից ներկրվող ապրանքները: «Մեր բոլոր գործողությունները պետք է միտված լինեն ընկերությունների մրցունակության բարձրացմանը»,- ասաց արդյունաբերության զարգացման վարչության պետը:
Իսկ մրցունակության բարձրացման համար, ըստ նրա, ընկերությունները պետք է ներդրումներ անեն, որպեսզի վերազինվեն ժամանակակից տեխնոլոգիաներով, բացի այդ պետք է ժամանակ առ ժամանակ կադրերին վերապատրաստեն:
Անդրադառնալով հումքի ներկրմանը, Արմեն Եգանյանն ասաց, որ այդ ուղղությամբ ևս աշխատանքներ են տարվում: Մասնավորապես, առաջիկայում նախատեսվում է, որ որոշ տեղական ընկերություններ կզբաղվեն հումքի, այդ թվում՝ կտորի արտադրությամբ:
Նշենք, որ վիճակագրական տվյալների համաձայն, այսօր Հայաստանի թեթև արդյունաբերության ոլորտում գործում է 148 ընկերություն, որից 81-ը զբաղվում է հագուստի արտադրությամբ, 43-ը՝ կոշիկի, 24-ը՝ մանածագործական իրերի արտադրությամբ:
Հարակից հրապարակումներ`
Լրահոս
Տեսանյութեր
Փաշինյանն ընդամենը մի տհաճ խոչընդոտ է հայրենիք ունենալու ճանապարհին. Զոհված զինծառայողի մայր