Դիզայներներն ու արտադրողները մեկ հարթակում. Երևանում կանցկացվի միջազգային համաժողով
Երևանում հոկտեմբերի 17-19-ը կանցկացվի թեթև արդյունաբերության միջազգային համաժողով և «Թեթև արդյունաբերության միջազգային համաժողով, ցուցահանդես, նորաձևության օրեր» խորագրով ցուցահանդես: Նախագծի համակազմակերպիչներն են՝ «Ատեքս» նորաձևության կենտրոնը, «Սիգնում» ընկերությունը և Ուրալի առևտրաարդյունաբերական պալատը։
Միջոցառման ընթացքում կներկայացվի թեթև արդյունաբերության ոլորտի ողջ արժեշղթան՝ թելից մինչև պատրաստի հագուստի արտադրություն՝ այդ թվում նաև կաշվե իրեր, գլխարկներ զարդ և աքսեսուարներ: Համաժողովին կմասնակցեն Հայաստանից, Ռուսաստանից, Վրաստանից, Բելառուսից, Հնդկաստանից, Իրանից, եվրոպական երկրներից թեթև արդյունաբերության ոլորտում ներգրավված արտադրողներ, գնորդներ, դիզայներներ և այլ շահագրգիռ կազմակերպությունների ներկայացուցիչներ:
Ինչպես այսօր լրագրողների հետ հանդիպման ժամանակ նշեց ՀՀ տնտեսական զարգացման և ներդրումների նախարարության արդյունաբերության զարգացման վարչության պետ Արմեն Եգանյանը, պետությունն իրականացնում է արդյունաբերության զարգացման ակտիվ քաղաքականություն և հիմնական շեշետադրումը կատարվում է արդյունաբերության այն ճյուղերի վրա, որոնք ունեն արտահանման ներուժ: Այդ քաղաքականության շրջանակներում, ըստ նրա, գերակա է համարվել թեթև արդյունաբերության ճյուղը, մասնավորապես, հագուստի, տեքստիլի, կոշիկի արտադրությունը:
«Այս միջոցառումը նույնպես առնչվում է թեթև արդյունաբերության ոլորտի հետ և համահունչ է պետական քքաղաքականությանը: Իսկ այդ քաղաքականությունն ուղղված է ինչպես ընկերությունների կադրային կարողությունների զարգացմանը, այնպես էլ արտաքին շուկաներ մուտք գործելուն: Նմանատիպ միջոցառումները ևս հարթակ են հանդիսանում տեղական ընկերությունների համար այլ երկրներում իրենց արտադրանքը ներկայացնելու համար»,- ասաց Արմեն Եգանյանը:
Նրա խոսքերով՝ Ռուսաստանի Դաշնությունը համարվում է թեթև արդյունաբերության ոլորտի համար թիրախային շուկա և պետք է այնպիսի քայլեր ձեռնարկվեն, որպեսզի հայկական արտադրանքի արտահանման ծավալներն աճեն հենց այդ շուկայում:
«Այս ցուցահանդեսին մասնակցում են Ռուսաստանի թեթև արդյունաբերության ոլորտում ներգրավված արտադրողներ և կարծում եմ, որ այս հնարավորությունն օգտագործելով, հայ և ռուս արտադրողները կարող են լուրջ համագործակցություն սկսել»,- ընդգծեց վարչության պետը:
«Սիգնում» ընկերության տնօրեն Նիկա Մանուկովան էլ նշեց, որ երկար ժամանակ մտածում էին նման նախաձեռնությամբ հանդես գալ, սակայն հասկանում էին, որ միայն ցուցահանդեսներ կազմակերպելով հնարավոր չէ Հայաստանում զարգացնել թեթև արդյունաբերության ոլորտը: «Միջոցառման հիմնական նպատակն է՝ բացահայտել տեղական շուկայում առկա խնդիրները, օգնել տեղական արտադրողներին գտնել գործընկերներ, այսինքն՝ բացահայտել բոլոր ռիսկային կետերը: Իսկ հաջորդ տարի պետք է ներկայացնենք, թե մեկ տարվա ընթացքում ինչ աշխատանքներ են իրականացվել, որտեղ ունենք նվաճումներ, որտեղ ունենք խնդիրներ»,- ասաց Նիկա Մանուկովան:
Ըստ նրա, միջոցառումը բաղկացած է չորս բաժնից: Առաջինը թեթև արդյունաբերության միջազգային համաժողովն է, որի շրջանակներում ոլորտի մասնագետները, արտադրողները կքննարկեն, թե ինչ խնդիրներ ունեն: Երկրորդը վերաբերում է վարպետության դասերին, որի ընթացքում հրավիրված միջազգային մասնագետները կներկայացնեն իրենց փորձն ու գիտելիքները, ինչպես նաև կխոսեն նորաձևության տենդենցների մասին:
Միջոցառման երրորդ հատվածը վերաբերում է ցուցահանդեսին, որի շրջանակներում կներկայացվեն թեթև արդյունաբերության ոլորտի ձեռքբերումները:
Միջոցառման չորրորդ հատվածում էլ կներկայացվեն հայ և արտասահմանյան դիզայներների աշխատանքները:
Նշենք, որ միջոցառման շրջանակներում կներկայացվի «Տերյան» մշակութային կենտրոնի դիզայներ Լիլիթ Մելիքյանի «Անցյալի ապագան», «Atex նորաձևության կենտրոն» դիզայներ Սեդա Մանուկյանի «Back to black », դիզայներ Լիդա Օրլովայի «Ոչ շատ սարսափելի հեքիաթ», դիզայներ Վահան Խաչատրյանի «Momento more» և Սվետլանա Հակոբյանի «Throughout history into fashion» հավաքածուները:
Լրահոս
Տեսանյութեր
Ոստիկանները Բագրատ Սրբազանին և ԱԺ պատգամավորներին թույլ չեն տալիս մուտք գործել Կիրանց