Ձեր վստահելի աղբյուրը

Կառավարության ծրագրում մենք հստակ ձևակերպել ենք աշխատատեղերի վերաբերյալ մեր մոտեցումները՝ ասելով, որ  արդար, հավասար պայմաններ ստեղծելով բիզնեսը, գործարար աշխարհը զարգանալու է, որը հենց աշխատատեղ ստեղծողն է,- Ազգային ժողովում կառավարության հետ հարցուպատասխանի ժամանակ ասաց վարչապետ Կարեն Կարապետյանը՝ պատասխանելով պատգամավոր Խաչատուր Քոքոբելյանի հարցին, թե կառավարության ծրագրում չկար աշխատատեղերի հետ կապված ինչպիսի մոտեցում, տեսլական  կա կառավարությունում:

Ամբողջ ծրագիրն ուղղված է բիզնեսի զարգացմանը, բիզնեսի համար ազատ պայմաններ ստեղծելուն, չխոչընդոտելուն, որը կբերի աշխատատեղերի ստեղծման: Կ. Կարապետյանի խոսքով, կառավարության ծրագրով նախատեսվածն իրականացնելու դեպքում կլինի աշխատավարձերի աճ, շուկայի աշխուժություն:

«Կանխատեսում տալը տնտեսապես բավականին դժվար է վեց ամսվա համար, էկոնոմիկան, տնտեսությունը իներտ համակագ են»,- նշեց կառավարության ղեկավարը:

Նրա խոսքով՝  հաշվի առնելով նախընտրական ժամանակահատվածը, ակնկալում են  որոշալի պասիվություն, սպասումներ հասարակության կողմից՝  ինչպես կլինի, կընտրվեն, չեն ընտրվի:

«Ընդհանրապես, բազմաթիվ երկրներում կան կառավարության ծրագրեր, որտեղ թվեր չկան, իրենք ասում են՝ որակապես ուր են շարժվում: Ժամանակը ցույց կտա, արդյունքում ինչ կկատարվի: Իրականում այնպես չէ, որ եթե թվեր չկան, ծրագիրն անորակ է, տակը միտք չկա, իմաստ չկա, հորիզոն  չկա»,- ասաց Կարեն Կարապետյանը: