ԾԻԳ-երի օպտիմալացման արդյունքում Ջրային տնտեսության պետական կոմիտեն էական գումարներ կտնտեսի
Կառավարության նոյեմբերի 3-ի նիստում որոշվեց դադարեցնել 4 ԾԻԳ-երի գործունեությունը: Դրանցից մեկը «Արփա-Սևան» թունելի վերականգնման ծրագրերի իրականացման գրասենյակն էր, որը գործում էր Ջրային տնտեսության պետական կոմիտեի ենթակայության ներքո:
Panorama.am–ի հետ զրույցում ՋՏՊԿ մամուլի քարտուղար Սոնա Մարտիրոսյանն ասաց, որ ԾԻԳ-ի գործունեության դադարեցումը կամ դրանց օպտիմալացումը ինքնանպատակ չէ: Այս քայլը, ըստ նրա, բխում էր նոր կառավարության ծրագրում ամրագրված՝ պետական կառավարման համակարգի օպտիմալացման գաղափարից:
«Ինչ վերաբերում է կոնկրետ «Համայնքային զարգացման ծրագրերի իրականացման գրասենյակ» և «Արփա-Սևան թունելի վերականգնման ծրագրերի իրականացման գրասենյակ» պետական հիմնարկներին, ապա կարող եմ ասել, որ դրանց կողմից իրականացվող ծրագրերն ավարտվում են 2016 թվականի վերջին, դրանք կլուծարվեն՝ համակարգի վրա չունենալով շարունակականության ապահովման հետ կապված որևէ բացասական ազդեցություն»,- ընդգծեց Սոնա Մարտիրոսյանը:
Նշենք, որ մինչ այս ՋՏՊԿ համակարգում գործում էին վարկային ծրագրեր իրականացնող 4 կառույցներ. Վերոնշյալ երկու ԾԻԳ-երից բացի կոմիտեի կազմում գործում է նաև «Ջրային տնտեսության ծրագրերի իրականացման գրասենյակ» ԾԻԳ-ը, որը ստեղծվել է Համաշխարհային Բանկի ծրագրերի շրջանակում և իրականացնում է ոռոգման համակարգի ծրագրեր, ինչպես նաև՝ «Հայջրմուղկոյուղի» ՓԲԸ-ի կազմում գործող «Ներդրումային ծրագրերի համակարգման տնօրինությունը», որը բացվել է «Հայջրմուղկոյուղի» ՓԲԸ-ի ստեղծման շրջանակում, 4 ընկերությունների («Հայջրմուղկոյուղի», «Լոռի-ջրմուղկոյուղի», «Շիրակ-ջրմուղկոյուղի», «Նոր Ակունք») խմելու ջրի ծրագրերի իրականացման նպատակով):
Նա նաև հայտնեց, որ 2017 թվականի հունվարի 1-ից՝ խմելու ջրի միասնական օպերատորի մուտքով պայմանավորված, կսկսվի «Հայջրմուղկոյուղի» ՓԲԸ-ի լուծարման գործընթացը: Ընկերության կազմում կլուծարվի նաև «Ներդրումային ծրագրերի համակարգման տնօրինությունը»: «Այս 3 կառույցների լուծարման արդյունքում կկրճատվի շուրջ 50 հաստիք, էական ծախսեր կտնտեսվի»,- նշեց Ս.Մարտիրոսյանը:
Ինչ վերաբերում է օպտիմալացման հետևանքով աշխատանքը կորցնելու վտանգի առջև կանգնած մասնագետների հետագա ճակատագրին, ապա, ըստ նրա, կոմիտեի մոտեցումն այս հարցում հստակ է՝ արհեստավարժ մասնագետները կհամալրեն իրականացվող ծրագրերում ընդգրկված աշխատակիցների ցանկը՝ համակարգի այլ օղակներում: «ՋՏՊԿ նախագահ Արսեն Հարությունյանի մոտեցումը այսպիսին է՝ մասնագետները պետք է աշխատեն, ոչ մասնագետները՝ ոչ»,- ասաց Ս. Մարտիրոսյանը:
Անդրադառնալով ծրագրերի իրականացման հետագա ընթացքին, ՋՏՊԿ մամուլի քարտուղարը նշեց, որ այս կապակցությամբ քննարկումները շարունակվում են, հնարավոր է՝ բոլոր ծրագրերն իրականացվեն մեկ գրասենյակի միջոցով: