Ձեր վստահելի աղբյուրը

«ՀՀ նախագահ, ՀՀԿ նախագահ Սերժ Սարգսյանն ՀՀԿ 16-րդ համագումարում ունեցած ելույթում անդրադարձավ հանրային կյանքի գրեթե բոլոր ոլորտներին, արտաքին հարաբերություններին, ղարաբաղյան հիմնախնդրին: Սերժ Սարգսյանն անդրադարձավ ամենակարևոր խնդիրներին, որոնք առկա են մեր երկրում»,- ՀՀԿ 16-րդ համագումարի ընդմիջումին լրագրողների հետ հանդիպմանն ասաց ՀՀԿ անդամ Սամվել Նիկոյանը:

Նրա խոսքով՝ նախագահը թվերով անդրադարձավ երկրի սոցիալ-տնտեսական վիճակին,  ներկայացրեց այն մարտահրավերները, որոնք կանգնած են Հայաստանի տնտեսության առջև, այդ մարտահրավերներին դիմակայելու և սահուն զարգացում ապահովելու  առաջնահերթությունը:

«Ամենակարևոր ուղերձներից մեկն այն է, որ ՀՀԿ-ն վճռական է սատարելու Կարեն Կարապետյանի կառավարությանը, հստակ սահմանեց, որ եթե մեր կուսակցությունը 2017 թվականի ընտրություններում հաջողություններ արձանագրի, մեր վարչապետի թեկնածուն լինելու է Կարեն Կարապետյանը: Սա կարևոր ուղերձներից էր, որ Կարեն Կարապետյանի և ՀՀԿ-ի հարաբերությունները միտված են ապագային և դա լինելու է շարունակական, մասնավորապես այն փաստից հետո, որ Կարեն Կարեպետյանն արդեն ՀՀԿ- անդամ է»,- ասա Ս. Նիկոյանը:

Նրա խոսքով՝ նախագահի ելույթում հնչած կարևոր ուղերձներից է նաև ղարաբաղյան հիմնախնդրին վերաբերող հայտարարությունները. «Մեր դիրքորոշումը հստակ է՝ բացառապես խաղաղ ճանապարհով հարցի լուծում»:

Սամվել Նիկոյանը նաև ասաց, որ այսօր ՀՀԿ-ն ունի 157 հազար անդամ, ով ցանկանում է անդամագրվել կուսակցությանը, դռները բաց են: Պատասխանելով հարցին, թե հնաբնակ ՀՀԿ-ականներն ինչպե՞ս են վերաբերում, որ նոր նախարարներ են անդամագրվում կուսակցությանը, նա ասաց.  «Նորմալ է: Կուսակցությունը գնում է բարեփոխումների, ցանկանում է բարեփոխվել ինքը, բարեփոխել պետական կառավարման ողջ համակարգը, կուսակցությունը ներառում է իր մեջ այնպիսի մարդկանց, որոնց ազգաբանակչությունը կվստահի, կունենան դրական իմիջ»:

ՀՀԿ-ականն ասաց, որ այսօրվա համագումարին մասնակցում է 1712 պատվիրակ, հրավիրված է և մասնակցում է 13 կուսակցության ներկայացուցիչներ, 60 ՀԿ  ներկայացուցիչներ, բազմաթիվ հյուրեր: