Ձեր վստահելի աղբյուրը

Ավելի քան 10,000 քաղաքացի, որը Արցախի ողջ բնակչության մոտ 7 տոկոսն է կազմում, ստիպված էր ժամանակավորապես լքել սահմանամերձ բնակավայրերում գտնվող իրենց տները.- ԼՂՀ անկախության հռչակման 25-րդ տարեդարձին նվիրված միջոցառմանը ելույթ ունենալով ԱՄՆ Կոնգրեսում հայտարարել  է Արցախի վարչապետ Արայիկ Հարությունյանը՝ ներկայացնելով ապրիլին Ադրբեջանի կողմի սանձազերծած պատերազմի հետևանքները:

«Իսկ Թալիշ գյուղի բնականոն կենսագործունեությունը խախտվեց ադրբեջանական վայրագությունների հետևանքով, քանի որ անվտանգության նկատառումներից ելնելով՝ նրա բնակիչները մինչ այժմ դեռ չեն վերադարձել իրենց հարազատ գյուղ, սակայն մենք արդեն համապատասխան քայլեր ենք ձեռնարկում Թալիշի վերականգնման ուղղությամբ: Շոշափելի բացասական ազդեցություն կրեց նաև տնտեսությունը՝ թե՛ ուղղակի և թե՛ անուղղակի առումով: Ուղղակի վնասները գնահատվում են շուրջ 20 միլիոն դոլար, իսկ անուղղակի վնասները իրենց դեռ երկար զգացնել կտան»,-ներկայացրել է Արցախի կառավարության ղեկավարը:

Հարությունյանը ներկա կոնգրեսականներին հիշեցրել է, ադրբեջանական կողմը մարտի նետեց հազարավոր հատուկ ջոկատայիններ, տասից ավելի ուղղաթիռ, հարյուրավոր տանկեր ու հրետանի, տասնյակ կիլոմետր հեռահարության հրթիռային համակարգեր, այդ թվում՝ արգելված զենքեր:

«Ի պատիվ մեր բանակի՝ մենք կարողացանք դիմագրավել Ադրբեջանի հանկարծակի ագրեսիան՝ մեր բնակչությանը պաշտպանելով հնարավոր կոտորածից ու բռնագաղթից: Ամեն դեպքում, Ադրբեջանի զինված ուժերը հասցրեցին որոշ ռազմական և մարդկության դեմ ուղղված այլ հանցանքներ իրագործել: Մասնավորապես, արցախյան Թալիշ գյուղում նրանք դաժանորեն խոշտանգեցին և սպանեցին երեք քաղաքացիական անձանց՝ այդ թվում՝ մեկ 90-ամյա կնոջ: Նրանք Իսլամական պետությանը բնորոշ ձևերով գլխատեցին երեք զինծառայողի, իսկ շուրջ երկու տասնյակ զինծառայողների մարմինները խոշտանգեցին՝ ոմանց կենդանի, ոմանց մահացած ժամանակ»,-թշնամու վայրագությունները ներկայացրել է Ա. Հարությունյանը:

Նա ընդգծել է,  այդ հանցագործները օրեր անց պարգևատրվել  և հերոսացվել են անձամբ Ադրբեջանի նախագահի կողմից:

«Բացի դրանից, ադրբեջանական հրետանին միտումնավոր թիրախավորում էր ղարաբաղյան քաղաքացիական բնակչությանը, ինչի հետևանքով մի երեխա զոհվեց դպրոցի ճանապարհին: Այդ գործելաոճի շարունակությունը եղավ Ադրբեջանի պաշտպանության նախարարության հայտարարությունը, որ պատրաստ են ռմբակոծել Արցախի մայրաքաղաք Ստեփանակերտը: Բաքվի ապրիլյան ագրեսիան ահաբեկչություն էր՝ կատարված և հերոսացված պետական մակարդակով, որը, ցավոք, կրկին բավարար կերպով չդատապարտվեց միջազգային հանրության կողմից»,-ելույթում նշել է Արցախի վարչապետը:

Հայկական երկրորդ պետության կառավարության ղեկավարը նշել է, որ ապրիլյան ռազմական ագրեսիայի սանձազերծումից չորս օր անց պաշտոնական Բաքուն զինադադար խնդրեց հայկական կողմից, ինչը պայմանավորված էր մեր բանակի ցավոտ պատասխան գործողություններով և ադրբեջանական կողմի ձախողումներով ու անհամեմատ շատ կորուստներով. «Այնուամենայնիվ, մենք ևս անդառնալի մարդկային ու զգալի նյութական կորուստներ ունեցանք»:

Անդրադառնալով հակամարտության կարգավորման ջանքերին ու հեռանկարներին՝ նա ողջունել է  Եվրոպայում անվտանգության ու համագործակցության կազմակերպության միջնորդների քայլերը՝ ուղղված իրավիճակի կայունացմանը և հակամարտության կարգավորմանը:

Նա շնորհակալություն է հայտնել  ԱՄՆ 7 նահանգներին՝ Ռոդ Այլենդին, Մասսաչուսեթսին, Մեյնին, Լուիզիանային, Կալիֆորնիային, Ջորջիային և Հավայիին՝ Արցախի Հանրապետության անկախությանը և մեր ժողովրդի ինքնորոշման իրավունքին աջակցելու համար:

Նա մեկ անգամ ևս ընդգծել է՝  հակամարտությունը պետք է լուծվի միայն խաղաղ միջոցներով՝ առանց զենքի կամ դրա սպառնալիքի կիրառման: Միևնույն ժամանակ, անթույլատրելի և անհնար են հիմնախնդրի կարգավորման տարբերակների մշակումը և իրագործումը առանց հակամարտության հիմնական կողմի՝ Արցախի Հանրապետության լիիրավ և ամբողջական մասնակցության:

«Ավելորդ չէ նշել, որ մեր հակվածությունը հակամարտության կարգավորման բացառապես խաղաղ միջոցներին ամենևին չի նշանակում, թե մենք թույլ ենք և պատրաստ չենք պատերազմի: Ո՛չ, բարեկամնե՛ր, Արցախի բանակը բավարար կարողություններ ու պատրաստականություն ունի դիմագրավելու իր ժողովրդի հանդեպ ցանկացած ոտնձգություն, ինչը մեր սուրբ իրավունքն ու պարտականությունն է: Պարզապես մենք գնահատում ենք մարդկային կյանքը և, ինչպես ողջ քաղաքակիրթ մարդկությունը, կարծում ենք, որ հնարավոր և պետք է հակամարտությունները լուծել խաղաղ ճանապարհով: Վստահ եմ՝ դուք գիտակցում եք, որ Արցախի Հանրապետության այս դիրքորոշումը ոչ միայն մեր օգտին է, այլ նաև՝ Ադրբեջանի ժողովրդի: Ավելին՝ խաղաղությանը նպատակաուղղված մեր հանձնառության շնորհիվ վստահորեն կարող ենք պնդել, որ Արցախը միջազգային հանրության հուսալի գործընկերն է տարածաշրջանային խաղաղության ու կայունության ապահովման գործում»,-ասել է նա:

Արցախի վարչապետի ելույթը ամբողջությամբ կարող եք կարդալ այստեղ:http://gov.nkr.am/hy/official-news/item/2016/12/07/elyutamnum/