Ձեր վստահելի աղբյուրը

Երևան-Թեհրան-Աշխաբադ նոր համագործակցության մասին դեռ վաղ է խոսել, բայց այն կարևոր քայլ է, քանի որ այս ձևաչափի ստեղծումը կլրացնի տարածաշրջանում արդեն իսկ առկա ձևաչափերին: Այս մասին այսօր լրագրողների հետ հանդիպման ժամանակ ասաց  ԵՊՀ արևելագիտության ֆակուլտետի իրանագիտության ամբիոնի վարիչ Վարդան Ոսկանյանը՝ անդրադառնալով  Հայաստան-Իրան-Թուրքմենստան հնարավոր համագործակցությանը:

Ըստ իրանագետի՝ այդ մասին բարձրաձայնվել էր Իրանի նախագահ Հասան Ռոհանիի Հայաստան կատարած այցի շրջանակներում, ինչպես նաև ՀՀ վարչապետի՝  Իրանի և Թուրքմենստանի դեսպանների հետ հանդիպման ժամանակ քննարկվել են էներգետիկ ոլորտում համագործակցության վերաբերյալ հարցեր:

«Անձամբ Իրանի նախագահն էր հայտարարել, որ քննարկել են Հայաստան-Իրան-Թուրքմենստան եռակողմ ձևաչափի ստեղծման հնարավորությունները մեր երկրում, ինչը չափազանց կարևոր է, քանի որ հաշվի առնելով այն հանգամանքը, որ Թուրքմենստանն  աշխարհում գազային ռեսուրսներ ունեցող երկրների հնգյակի անդամ է, ունի նաև խոշոր էներգետիկ ռեսուրսներ: Սակայն ունի նաև խնդիրներ՝ կապված այդ ռեսուրսները արտահանելու հետ»,- նշեց  Վարդան Ոսկանյանը:  

Նրա խոսքերով՝ տարիներ շարունակ ինքնամեկուսացման քաղաքականություն  վարող այս երկիրն արդի էներգառեսուրսների գների անկման պայմաններում ելքեր է փնտրում՝ սեփական գազային ռեսուրսները դեպի արևմուտք տեղափոխելու առումով:

Իրանագետը նշեց, որ այս առումով Հայաստանը պետք է վարի ավելի ագրեսիվ քաղաքականություն այն ոլորտներում, որտեղ «մեզ այնքան էլ չեն սպասում», և որոնք առաջին հայացքից կարող են անակնկալ թվալ: Ըստ Վարդան Ոսկանյանի՝ մեր երկիրը կարող է ստանալ լուրջ հնարավորություններ զարգացնելու ոչ միայն տնտեսությունը, այլ նաև զգալիորեն բարելավելու իր աշխարհաքաղաքական դիրքերը:

«Այս իմաստով նշված ձևաչափի հնարավոր ստեղծումը կլրացնի արդեն իսկ առկա ձևաչափերին, մասնավորապես,  Իրան-Հայաստան երկկողմ գազ-էլեկտրաէներգիա գործարքին, ինչպես նաև Հայաստանը ստեղծում է գազային ոլորտում եռակողմ համագործակցություն՝ մի կողմից Վրաստանի, մյուս կողմից՝ Իրանի հետ: Եթե այս ձևաչափն էլ ձևավորվի և սկսի աշխատել, բանակցային փուլից անցնի գործնական փուլի, ապա Հայաստանը  նշված ոլորտներում կստանա լրջագույն դերակատարի կարգավիճակ այս տարածաշրջանում»,- ընդգծեց Վարդան Ոսկանյանը:

Իրանագետը համագործակցության հաջողության ցուցիչ համարեց մեր հանդեպ թշնամական դիրքորոշում որդեգրած երկրների արձագանքները:

«Չեմ կարծում, որ պատահական էր ադրբեջանցի փորձագետների և ադրբեջանական ԶԼՄ-ներում տեղ գտած վերլուծությունները, ինչը ցույց են տալիս, որ մեր գործողությունները որոշակի անհանգստություն են առաջացնում այդ երկրում»,- ասաց իրանագետը՝ միաժամանակ հավելելով, որ մեր օրակարգերը չպետք է կապենք նրանց հետ: