Ձեր վստահելի աղբյուրը

ԵԱՀԿ երևանյան գրասենյակը որևէ կերպ առնչություն չունի ղարաբաղյան հակամարտության հետ ու չի զբաղվում այդ հարցերով, և այդ գրասենյակի փակումը խիստ անհանգստացնող է Հայաստանի քաղաքացիական հասարակության համար։ Այդ մասին այսօր լրագրողների հետ հանդիպման ժամանակ հայտարարեց Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը։

«ԵԱՀԿ երևանյան գրասենյակը ինստիտուցիոնալ զարգացման մանդատ ունի, Հայաստանում զբաղվում է մարդու իրավունքների պաշտպանության հարցերով, ոստիկանական համակարգում կատարվող բարեփոխումներով, էկոլոգիական հարցերով ու սահմանափայվում է Հայաստանի պետական սահմանով», -հավելեց Սաքունցը։

Նկատենք, որ ԵԱՀԿ երևանյան գրասենյակի գործունեությունը կարող է դադարեցվել, քանի որ անդամ երկրներից մեկը՝ այս դեպքում Ադրբեջանը, չի հաստատում դաշտային առաքելության հետ կապված ծրագրերը։ Այդ մասին հայտարարություններից հետո առայժմ որևէ հստակ տեղեկություն չկա ԵԱՀԿ երևանյան գրասենյակի փակման կամ չփակման մասին, միայն հունվարի կեսերին ԵԱՀԿ գործող նախագահը լրատվամիջոցներից մեկին տված հարցազրույցում հայտարարել էր, որ իրենք կարևորում են երևանյան գրասենյակի գործունեությունը։

Ըստ Սաքունցի, Երևանում ԵԱՀԿ գրասենյակի գոյությունը «կարևոր նշանակություն ունի» Հայաստանի՝ միջազգային կառույցներին ինտեգրման փաստի արձանագրման առումով։

«Տարօրինակ է, որ Ադրբեջանի իշխանությունները դեմ են դուրս գալիս Հայաստանում մարդուիրավունքների ու ժողովրդավարական հաստատությունների զարգացմանը։ Հերիք չէ ԵԱՀԿ Բաքվի գրասենյակն է փակվել այդ երկրում, հիմա էլ փորձում են դրա գործունեությունը դադարեցնել Երևանում, ինչը անթույլատրելի է։ Հետևաբար, մենք՝ քաղաքացիական հասարակության ներկայացուցիչներս, չենք կարող լռել ու անտարբեր մնալ», -հայտարարեց Սաքունցը։

Նա տեղեկացրեց, որ Հայաստանի քաղհասարակության ներկայացուցիչները՝ 40-ից ավելի կազմակերպություն, պատրաստվում են բաց նամակ հղել միջազգային հանրությանը, ԵԱՀԿ նախագահին, որտեղ մտահոգություն են հայտնել գրասենյակի հնարավոր փակման առնչությամբ։

Գլոբալիզացիայի և տարածաշրջանային համագործակցության վերլուծական կենտրոնի խորհրդի նախագահ, քաղաքագետ Ստեփան Գրիգորյանը իր հերթին նկատեց, որ ԵԱՀԿ երևանյան գրասենյակի աշխատանքը ուղղակիորեն աջակցում է Հայաստանի ժողովրդավարության զարգացմանը։

Նրա խոսքով, «քիչ բան չէ», որ այդ գրասենյակը բազմիցս օգնել է մեր երկրի տարբեր ոլորտներում օրենսդրության կատարելագործմանը։