Ձեր վստահելի աղբյուրը

Եթե կուտակային կենսաթոշակային համակարգի մասնակիցը եկամուտ է ստանում միաժամանակ մեկից ավելի աղբյուրներից, և ստացվող համախառն եկամուտը գերազանցում է ամսական 500 000 դրամը, իսկ նոտարների և անհատ ձեռնարկատերերի դեպքում` տարեկան 6 000 000 դրամը, ապա առաջանում է մասնակցի կողմից կատարվող սոցիալական վճարների գերավճար, որը ենթակա է վերադարձման մասնակցին` բանկային փոխանցման միջոցով:

«Նորք» կենտրոնի տարածած հաղորդագրության համաձայն, կուտակային համակարգում 2014 թվականին կատարված օրենսդրական փոփոխություններից մեկը կուտակային վճարների առավելագույն շեմի սահմանումն էր, ինչի արդյունքում ամսական 500 000 դրամից ավելի եկամուտ ստացող անձինք կատարում են ֆիքսված` 25 000 դրամի չափով հատկացում, ևս այդքան նրանց համար փոխանցում է պետությունը պետական բյուջեից:

Անհատ ձեռնարկատերերը և նոտարները, եթե տարեկան եկամուտը գերազանցում է 6 000 000 դրամը, կատարում են տարեկան 300 000 դրամ սոցիալական վճար, ևս այդքան նրանց օգտին հատկացվում է պետական բյուջեից:

«Եթե Դուք եկամուտ եք ստանում միաժամանակ մեկից ավելի աղբյուրներից, և ստացվող համախառն եկամուտը գերազանցում է ամսական 500 000 և տարեկան 6 000 000 դրամը, ապա յուրաքանչյուր եկամտից առանձին-առաձին կատարված 5 տոկոս հատկացումների արդյունքում Դուք ունենում եք սոցիալական վճարի գերավճար:

Առաջին անգամ գերավճար առաջանալու դեպքում հարկային մարմինը այդ մասին ծանուցում է մասնակցին` նշելով գերավճարի չափը և մասնակցի կողմից իր բանկային տվյալները հարկային մարմին ներկայացնելու  անհրաժեշտությունը:

Ծանուցումը ստանալուց հետո մասնակիցը պետք է իր բանկային տվյալները` ծանուցման հետ միասին, ներկայացնի իր բնակության վայրի հարկային տարածքային տեսչություն:
Մասնակցի բանկային տվյալները ստանալուց հետո երկու աշխատանքային օրվա ընթացքում  հարկային մարմինը գանձապետարան է ներկայացնում վճարման հանձնարարական, որից հետո ևս երկու աշխատանքային օրվա ընթացքում գումարը փոխանցվում է մասնակցի բանկային հաշվին:

Հետագայում նույն մասնակցի համար սոցիալական վճարի գերավճար առաջանալու դեպքում հարկային մարմինը այլևս այդ մասին չի ծանուցում, և գերավճարի առաջանալուց հետո հինգ աշխատանքային օրվա ընթացքում վճարման հանձնարարական է ուղարկում գանձապետարան:

Այսպիսով, եթե Դուք եկամուտ եք ստանում մեկից ավելի աղբյուրներից, և ամսական համախառն եկամտի չափը 500 000 դրամից ավելի է, ապա վստահացեք, որ ստացել եք հարկային մարմնից ծանուցում սոցիալական վճարի գերավճարի վերադարձի մասին, և Ձեր գումարը վերադարձվել է Ձեզ` Ձեր ներկայացրած բանկային հաշվին:

Բոլոր հարցերով կարող եք դիմել սոցիալական ոլորտի 114 թեժ գծին կամ www.epension.am կայքի առցանց խորհրդատուին»,-ասվածէ  հաղորդագրության մեջ: