Ձեր վստահելի աղբյուրը

«Երեկ պարոն Ծառուկյանը շատ հստակ ներկայացրեց, թե ինչ գործընթացներ են տեղի ունեցել, ԿԸՀ գնացած մեր գործընկերների որ մասը որ շարժառիթով է գնացել: Այն, որ այդ դիմումները գրվել են երեկ և այսօր, դա փաստ է»,- այս մասին այսօր Ազգային ժողովում լրագրողների հետ զրույցում ասաց ԱԺ փոխնախագահ Միքայել Մելքումյանը՝ անդրադառնալով «Ծառուկյան» դաշինք խմբակցության պատգամավորների հրաժարականի դիմումներին:

Հիշեցնենք, որ այսօր  խմբակցության անդամներ Հարություն Ղարագյոզյանը, Արտյոմ Ծառուկյանն ու  Խաչիկ Մանուկյանը հրաժարականի դիմում են ներկայացրել:

Միքայել Մելքումյանի խոսքերով՝   նրանք կամավոր են դիմում գրել. «Մարդիկ կամավոր եկել են այն համոզման, որ իրենք պետք է ինքնաբացարկի դիմումներ գրեն: Այդտեղ որևէ արտառոց բան, որևէ խորամանկություն, դետեկտիվ ժանրից որևէ բան չկա»:

Հարցին, թե արդյոք  ինքնաբացարկի դիմումներ նորից կգրվեն, ԱԺ փոխնախագահն ասաց, որ չի կարող այդ հարցին պատասխանել, եթե լինի, ապա այդ մասին  կհայտնեն:

Դիտարկմանը, թե այդ պատգամավորների վրա ճնշում չի եղել, Միքայել Մելքումյանը պատասխանեց. «Բացարձակ:  Գիտեք ինչ, թիմ է, մարդիկ աշխատում են, տասնյակ հազարավոր մարդիկ են, որոնք մեծ աշխատանք են կատարել դրան նախորդող տարիների ընթացքում: Նրանք մեր գործընկերներն են, և պարտադիր չէ, որ անպայման իրենց գործունեությունն իրականացնեն միայն պառլամենտում: Որևէ մեկի ճակատին գրված չէ, որ ինքն անպայման պետք է մշտական ներկայացված լինի խորհրդարանում»:

Նրա խոսքերով՝ չի բացառվում, որ նրանց կարողություններն օգտագործեն այլ ոլորտում, կամ կուսակցական աշխատանքներում:

Լրագրողները նաև հետաքրքրվեցին, թե ինչու երեկվանից ԱԺ նիստերին չի մասնակցում «Ծառուկյան» դաշինքի նախընտրական շտաբի պետ, պատգամավոր ընտրված Իշխան Զաքարյանը, բացի այդ, լուրեր էին շրջանառվում, որ ԱԺ փոխնախագահի պաշտոնում նա պետք է առաջադրվեր, սակայն փոխնախագահ նշանակվեց Միքայել Մելքումյանը: Վերջինս հարցին ի պատասխան ասաց. «Շատ ներողություն, իսկ Ազգային Ժողովի նախագահն ով որ եղել ա, նրա անունը շրջանառվո՞ւմ էր: Քաղաքականությունը հնարավորի արվեստ է, և պետք է թողնել, որ հասունանան գործընթացները և գան հանգուցալուծվեն»:

Հարցին, թե Իշխան Զաքարյանը նեղացա՞ծ է, Միքայել Մելքումյանը նշեց, որ նեղացած չէ: «Ընդհանրապես քաղաքականության մեջ խնամիություն, բարեկամություն, նեղացվածություն և այլ վառվռուն գույներ չկան:  Ձեր ասած դեպքը բացարձակ որևէ հիմք չունի, նեղացվածության որևէ հիմք չունի»,-  ընդգծեց նա:

Անդրադառնալով մամուլի հրապարակումներին, թե Իշխան Զաքարյանը ևս  առաջիկայում կհրաժարվի մանդատից, ԱԺ փոխնախագահն ասաց, որ ինքը նման տեղեկություն չունի: «Ես, իհարկե, չեմ խոսել Իշխան Զաքարյանի հետ, կաշխատեմ այսօր խոսել: Մենք շատ նորմալ հարաբերություններ ունենք: Դուք տեսաք, որ մենք նախորդ օրը մեր կուսակցության խորհրդի նիստին նստած էինք իրար կողքի: Իմ ընկերն է»: