«Հայաստան–Իսրայել» ֆորումը կշարունակի իր գործունեությունը
«Հայաստան–Իսրայել» ոչ քաղաքական-հասարակական ֆորումը շարունակում է երկու երկրների միջև զարգացնել գիտական, մշակութային տեխնոլոգիական, առողջապահության, զբոսաշրջության և այլ գործարար տարբեր ոլորտներում համագործակցությունը։
Այսօր լրագրողների հետ հանդիպմանը հասարակական ֆորումի համանախագահ, քաղաքական գիտությունների դոկտոր, պրոֆեսոր, գեներալ–լեյտենանտ Հայկ Քոթանջյանը հիշեցրեց, որ այս ֆորումի ստեղծման գաղափարը եղել է դեռևս 2015 թվականին։
Նաև նշեց, որ ֆորումը իսրայելական կողմից համանախագահում է Քնեսեթի նախկին պատգամավոր Ալեքսանդր Ցինկերը, ով ներկայումս Հայաստանում է՝ քննարկելու հայ-իսրայելական նորաստեղծ հասարակական ֆորումի ընթացիկ աշխատանքները:
«Դեռ նախորդ տարի, ՀՀ ԱԺ արտաքին հարաբերությունների մշտական հանձնաժողովի նախկին նախագահ, ՀՀ ԱԺ Հայաստան-Իսրայել բարեկամական խմբի ղեկավար Արտակ Զաքարյանի և Իսրայելի Պետության Քնեսետի փոխխոսնակ, Քնեսետի Իսրայել-Հայաստան պատգամավորական բարեկամական խմբի ղեկավար Թալի Պլոսկովի մասնակցությամբ ձևավորվեց մի հարթակ, որը պետք է ծառայեր երկու երկրներում շահագրգիռ անձանց ներգրավմամբ համատեղ ծրագրեր, բիզնես ներդրումներ, տեխնոլոգիական զարգացման հնարավորություններ, ինչպես նաև մշակութային երկխոսության, առողջապահական և գիտական տարբեր ծրագրեր մշակելուն և իրականացնելուն»,-ասաց Քոթանջյանը:
Հանդիպմանը ներկա ֆորումի համանախագահ Ալեքսանդր Ցինկերը նշեց, որ առաջին հայ-իսրայելական բարեկամական խումբը հիմնադրվել է հենց իր կողմից 1999 թվականից. «Անկախ խորհրդարանական ընտրություններից, պատգամավորական փոփոխվող կազմից, ֆորումը շարունակելու է իր գործունեությունը ամեն անգամ այն զրոյից սկսելու փոխարեն: Դրա վառ օրինակն այն է, որ բարեկամական խմբի ղեկավար Արտակ Զաքարյանը տեղափոխվեց նոր պաշտոնի որպես Պաշտպանության փոխնախարար, նրա փոխարեն այժմ աշխատանքներով կզբաղվի Գագիկ Մինասյանը»։
Ցինկերը տեղեկացրեց նաև, որ իր հետ Իսրայելից Հայաստան էին ժամանել մի խումբ լրագրողներ, ովքեր շրջել են Հայաստանի գեղատեսիլ վայրերով. «Քանի որ մայիսի 19-ին բացվեց Երևան-Թել Ավիվ չվերթը, և ցավոք տեղեկատվական հարթակում դա այդքան էլ չշոշափվեց, որոշեցինք զբաղվել այդ հարցով: Հանդիպել եմ նաև Զբոսաշրջության պետական կոմիտեի նախագահ Զարմինե Զեյթունցյանին, ով ցանկացավ կրկին հանդիպել՝ Հայաստանի տարբեր վայրերն այցելելուց հետո՝ քննարկելու զբոսաշրջությանն առնչվող հարցեր»։
Նաև հայտնեց, որ ֆորումի առաջիկա նիստը, հավանաբար, կկայանա սեպտեմբերի 10-13-ը։
Հարակից հրապարակումներ`
Լրահոս
Տեսանյութեր
Գևորգ Դանիելյան. Շատ վատ է, որ մենք չենք օգտագործում Սահմանադրության անվտանգության բարձիկները
