Հայաստանը Ռուսաստանի հետ պետք է հարաբերվի հավասարը հավասարի հետ. Թևան Պողոսյան
«Ռուսաստանը, Ադրբեջանին զենք մատակարարելով, երկրորդային պլան է մղում Հայաստանի հետ ռազմավարական հարաբերությունները՝ առաջնորդվելով սեփական շահերով։ Ստացվում է՝ ռազմավարական գործընկերոջ կարգավիճակը ՌԴ-ի համար ավելի ցածր արժեք ունի, քան սեփական շահերը։ Այսպես շարունակվելու է այնքան ժամանակ, քանի դեռ Հայաստանը չի կարողացել ձևավորել սեփական քաղաքականությունը և չի սովորել առաջնորդվել սեփական շահերով»,-Panorama.am-ի թղթակցի հետ զրույցում նման տեսակետ հայտնեց քաղաքագետ Թևան Պողոսյանը՝ անդրադառնալով ԱԳ փոխնախարար Շավարշ Քոչարյանի այն խոսքերին, որ թեև հայկական կողմը խնդրի շուրջ բազմիցս արտահայտվել է ամենաբարձր մակարդակներում, սակայն Ռուսաստանից ավելորդ սպասելիքներ չպետք է ունենալ։
«Մենք պետք է ձևավորենք մի իրավիճակ, որ Ռուսաստանը շատ լավ գիտակցի՝ իր տարածաշրջանային շահերը չի կարող առաջ տանել առանց Հայաստանի շահերը հաշվի առնելու։ Այդ ժամանակ միայն Ռուսաստանից կզանգեն, կհարցնեն և հաշվի կառնեն մեր շահերը։ Առայժմ մենք չենք ձևավորել ընբռնման այդ մթնոլորտը։ Երբ միջազգային ատյաններում Հայաստանը պետք է որևէ հայտարարություն անի, պետք է վարվի իրեն հարմար ձևով, ոչ թե մտահոգվի՝ ինչպես դա կընդունի Ռուսաստանը կամ որքանով այդ հայտարարությունը կհարվածի ռուսական շահին»,- նշեց Թևան Պողոսյանը։
Քաղաքագետի համոզմամբ, Հայաստանը պետք է այնպիսի դիրքորոշում որդեգրի, որ Ռուսաստանը հայկական կողմի շահերին հակասող որևոշումներ կայացնելուց առաջ մտածի՝ որքանով դրանք դուր կգան իր ռազմավարական գործընկերոջը։ Մինչև կատարելիք քայլը ծանրութեթև անելու պրակտիկան չներդրվի, Ռուսաստանը միշտ էլ զենք է վաճառելու Ադրբեջանին։
«Սեփական շահը պարտադրելը պետք է դառնա մտածելակերպ։ Ռուսաստանն ի վերջո պետք է հասկանա՝ եթե ինքը հաշվի չի առել իր ռազմավարական գործընկերոջ շահերը, ինչո՞ւ պետք է ռազմավարական գործընկերը հաշվի առնի իր շահերը։ Իրականում Հայաստանն իրեն պահում ռազմավարական գործընկերոջ նման, իսկ Ռուսաստանն անում է այն, ինչ հարմար է իրեն։
Իհարկե, անվտանգության դաշտում մենք պետք է համագործակվցենք նրա հետ, սակայն նաև պետք է հասկացնենք, որ ինչպես Ռուսաստանն է մեզ պետք, այնպես էլ մենք՝ իրեն՝ իր իսկ շահերը տարածաշրջանում առաջ տանելու համար։ Մենք պետք է պահանջատեր լինենք։ Այնպես չէ, որ միայն մենք ՌԴ-ի կարիքն ունենք, մենք իրար հետ պետք է հարաբերվենք հավասարը հավասարի հետ»,- ամփոփեց մեր զրուցակիցը։
Հիշեցնենք, որ ԱԳ փոխնախարար Շավարշ Քոչարյանը, անդրադառնալով Ռուսաստանի կողմից Ադրբեջանին հերթական անգամ զենք վաճառելու հարցին, այսօր ԱԺ-ում լրագրողներին ասել էր.
«Անվտանգության հարցերում առաջին հերթին մեր հույսը պետք է դնենք մեր ուժի վրա։ Իհարկե, Ռուսաստանը մեր դաշնակիցն է, բայց ավելորդ սպասելիքներ պետք է չունենալ: Դա իրականություն է: Մեր դիրքորոշումն այդ հարցում շատ հստակ և պարզ է: Բազմիցս դա արտահայտվել է, նաև ամենաբարձր մակարդակում: Բայց, այնուամենայնիվ, դա է իրողությունը: Եվ ելնելով այդ իրողությունից մենք պետք է կառուցենք մեր արտաքին քաղաքականությունը թե Ռուսաստանի, թե այլ գործընկերների նկատմամբ»»