Ձեր վստահելի աղբյուրը

ՌԴ պետդումայի խոսնակ Վյաչեսլավ  Վոլոդինը առաջարկել է Հայաստանի իշխանություններին երկրի օրենսդրության մեջ ռուսերենի համար պաշտոնական կարգավիճակ ամրագրել, որպեսզի «հայաստանցի վարորդներն իրենց վարորդական իրավունքներով կարողանան Ռուսաստանի տարածքում աշխատել»: ՏԱՍՍ-ի հաղորդմամբ, այս մասին  Վյաչեսլավ  Վոլոդինը  ասել է ՀՀ Ազգային ժողովի նախագահ Արա Բաբլոյանին՝ հանդիպման ժամանակ:

Ըստ աղբյուրի, Արա Բաբլոյանը հիշեցրել է, թե Պետդումայի կողմից օրենքն ընդունելուց հետո, Ղրղզստանի, ինչպես նաև այլ երկրների քաղաքացիներ, որտեղ ռուսերենն ամրագրված է որպես պաշտոնական, իրավունք են ստացել ՌԴ-ում որպես վարորդ աշխատել ազգային վարորդական իրավունքի վկայականով, իսկ «Հայաստանի քաղաքացիները փաստացի դուրս են մնացել»:

ՀՀ ԱԺ հանրային կապերի վարչության պետ Արսեն Բաբայանը Panorama.am-ին ասաց, որ ԱԺ նախագահ Արա Բաբլոյանը «տեղում հակադարձել է՝ պնդելով, որ ՀՀ օրակարգում նման հարց չկա ու չի էլ սպասվում»։

«Հայաստանում բոլոր դպրոցներում սովորում են ռուսերեն, ուստի ռուսերենի իմացությունը ամբողջությամբ բավարար է վարորդության համար։ Կողմերը պայմանավորվեցին հարցին անդրադառնալ ապագայում»,- նշեց Ա.Բաբայանը: 

Վ. Վոլոդինի առաջարկի վերաբերյալ Panorama.am-ը հարցով դիմել է նաև ՀՀ ԱԺ արտաքին հարաբերությունների մշտական հանձնաժողովի նախագահ Արմեն Աշոտյանին. «Որպես կրթության և գիտության նախկին նախարար և այժմ՝ ՀՀ ԱԺ արտաքին հարաբերությունների մշտական հանձնաժողովի նախագահ, չե՞ք գտնում, որ ՌԴ պետդումայի խոսնակ Վյաչեսլավ  Վոլոդինը չափերը անցնում է: Եթե այլ գնահատական ունեք՝ խնդրում ենք այն հայտնել»:

Արմեն Աշոտյանից դեռևս պատասխան չենք ստացել:

Հիշեցնենք, հունիսի 1-ից  Ռուսաստանում ուժի մեջ է մտել արգելքը, ըստ որի միգրանտ-վարորդները չեն կարող նստել մեքենայի ղեկին առանց ռուսական վարորդական վկայականի: Ռուսական վարորդական վկայական չունենալու  դեպքում իրավախախտին սպառնում է մինչև 50 հազար ռուբլի տուգանք:  Իրավախախտն այս դեպքում համարվում է ոչ թե վարորդը, այլ գործատուն, ով պարտավոր է հետևել օրենքի պահանջին:

Չգիտենք, թե ինչ է նշանակում «կողմերը պայմանավորվեցին հարցին անդրադառնալ ապագայում», սակայն համոզված ենք, որ Հայաստանի Հանրապետության քաղաքացիները չպիտի ընկնեն ռուսական լեզվի պետականացման սպառնալիքի տակ, ինչ է, թե ՌԴ-ում  կարելի լինի հայաստանյան վարորդական վկայականով աշխատել: