Ձեր վստահելի աղբյուրը

Գորիսում դպրոցականների թունավորման վերաբերյալ պետական մարմինների տարածած համատեղ հաղորդագրությունն  ավելի շատ հարցեր ու մտահոգություններ է առաջացնում, քան դրանց պատասխաններ տալիս ու փարատում:

Սննդամթերքի անվտանգության պաշտպանությանը կոչված մարմինը շտապում է արդարանալ՝ երկրորդային աղտոտվածություն է եղել: Ոլորտին առավել տեղյակ մասնագետները միաբերան պնդում են՝ ստեղծված իրավիճակում մեղավորը  ՍԱՊԾ-ն է:

Մի քանի օր շարունակ թաքցրած դեպքի մասին ՍԱՊԾ պաշտոնական էջում դրված հաղորդագրությունից պարզ չէ, թե ինչ են կերել երեխաները, որն է եղել երկրորդային աղտոտման պատճառը:

«Աղտոտման վերահսկողությունը ևս, ցավոք սրտի, դրված է Սննդամթերքի անվտանգության պետական ծառայության վրա»,-Panorama.am-ի հետ զրույցում ասաց «Իրազեկ և պաշտպանված սպառող» ՀԿ նախագահ Բաբկեն Պիպոյանը:

Նա ընդգծում է, որ վերահսկող մարմնի հրապարակման մեջ չկա որևէ տեղեկություն, թե ի՞նչ մթերք է տեղափոխվել, հումքը ո՞ր ընկերություններին է եղել, ո՞վ է մատակարարը, ի՞նչ փորձաքննություններ են իրականացվել ու ի՞նչ արդյունքներ կան: 

«Տպավորություն է, որ այդ գործընթացին Սննդամթերքի անվտանգության պետական ծառայությունը որևէ մասնակցություն չի ունեցել»,-կարծիք հայտնեց ՀԿ նախագահը:
ԿԳ նախարար Լևոն Մկրտչյանը երեկ լրագրողների հետ հանդիպմանն ասաց, որ Գորիսի թիվ 3 դպրոցում թունավորման հստակ պատճառը դեռ չգիտի, բայց նախնական տվյալներով սնունդ առաքողը դիզենտերիայով հիվանդ է եղել։

Հայտնի չէ, հիվանդ առաքողն էլ որ դպրոցներ է սնունդ տարել:

«Ամբողջ խնդիրը համակարգային է: Սննդամթերքի անվտանգությունն այն ոլորտը չէ, որով կարելի է  զբաղվել սիրողական մակարդակով»,-ասաց Պիպոյանը:

ՀԿ նախագահն ասաց հանդիպումներ է ունեցել Տավուշի մարզի դպրոցների տնօրենների հետ, նրանց համար դասընթաց է անցկացրել, թե ինչպես պետք է կազմակերպվի աշակերտների սնուցումը, ինչպես ապահովել նվազագույն անվտանգությունը:

«Տնօրեններն ասում են, դպրոցները չունեն ոչ սառ, ոչ տաք ջուր, ինչես կարող ենք ճաշարանային պայմաններ ստեղծել և անվտանգ սնունդ կազմակերպել»,-մտահոգությունը փոխանցեց Պիպոյանը:

Նրա խոսքով, ոլորտում կուտակված խնդիրները պետք է վերահսկող մարմինը կարողանա ճիշտ հերթականությամբ լուծել:

«Այսօր անընդհատ խոսում են հացի տեղափոխման պայմաններից: Այն դեպքում, երբ հացը ցածր ռիսկային սնունդ է: Կարելի է հացը տեղափոխել վատ մեքենայով փակ տուփերով: Խնդիրն այն է, որ պետք  է ունենալ բալանսավորված ճիշտ ռացիոնալ համակարգ: Իսկ նման քաղաքականություն մշակելու համար պետք է մասնագիտական մոտեցում»,-ասաց ՀԿ նախագահը:

Վերահսկողության բացակայության պայմաններում ու ստեղծված իրավիճակում Պիպոյանն ուրախալի  է համարում փաստը, որ թունավորման դեպքերը քիչ են:

«Երջանիկ պատահականության արդյունքում է, որ դպրոցներում ավելի շատ թունավորումներ չեն լինում,  որոհետև դպրոցների գերակշռող մասի ճաշարաններում սանիտարական խայտառակ պայմաններ են: Ավելին, կան դպրոցներ, որոնք չունեն ջուր, բայց պետք է ապահովեն սնունդ: Եթե չլիներ հանրային վերահսկողությունը Գորիսի թունավորման դեպքի մասին չէինք իմանա, քանի որ օրեր շարունակ առողջապահության նախարարությունն ու Սննդամթերքի անվտանգության պետական ծառայությունը լռել են, միայն ծնողների խոսելուց հետո նրանք հանդես են եկել համատեղ հայտարարությամբ»,-ասաց նա: