Հայաստանը հասկացնում է՝ եթե քաղաքական լուծում հնարավոր չէ, ուրեմն ճանաչման գործընթաց է սկսվելու. քաղաքագետ
«Հայաստանում փորձում են անկախության հանրաքվեների նախադեպային բազան համալրել նոր օրինակներով՝ դրանք նույնականացնելով ղարաբաղյան հակամարտության հետ»,-լրագրողների հետ այսօր կայացած հանդիպման ժամանակ ասաց քաղաքագետ Հրանտ Մելիք-Շահնազարյանը:
Ըստ նրա, իրականում պետք է խուսափել ուրիշների փորձը մեզ հարմարեցնելու մարտավարությունից և հասկանալ, որ քաղաքական որոշումներ կայացվում են կոնկրետ իրավիճակներից ելնելով:
«Շատ պարզ է, որ Կատալոնիայի համար ճակատագիրն ավելի դժվար ճանապարհ է նախատեսել, քան Իրաքյան Քուրդիստանի: Երկու գործընթացները, սակայն, ոչնչով չեն առնչվում հայկական երկրորդ պետության խնդրի հետ: Իսկ թե ինչու չունենք Արցախի ճանաչում, շատ պարզ է. հայկական կողմը դեռ չի նախաձեռնել այդ գործընթացը, մենք երբևէ նման նպատակ չենք հետապնդել, այլ մշտապես առաջնորդվել ենք բանակցային գործընթացին չվնասելու սկզբունքով»,- ասաց քաղաքագետը՝ միաժամանակ համոզմունք հայտնելով, որ աշխարհը շուտով ականատես կդառնա Կատալոնիայի և Իրաքյան Քուրդիստանի անկախության հռչակմանը:
Հրանտ Մելիք-Շահնազարյանը շեշտեց, որ Արցախայն հիմնախնդրի կարգավորմանն ուղղված բանակցային գործընթացը փակուղում է հայտնվել և ապրիլյան պատերազմից հետո նոր զարգացումներ սպասելն ուղղակի միամտություն կլիներ: Քաղաքագետի կարծիքով, սա դեռ չի նշանակում, որ փակուղում է հայտնվել նաև ճանաչման գործընթացը:
«Հայկական կողմը խստացնում է բանակցային դիրքորոշումը, այդ մասին բացահայտ հայտարարում է երկրի ղեկավարը: Դիրքերի խստացումն էլ ավելի է բարդացնելու քաղաքական բանակցությունների միջոցով որոշակի լուծումներ գտնելու հնարավորությունը: Սակայն սա միջոց է հասկացնելու աշխարհին, որ եթե քաղաքական լուծում հնարավոր չէ, ուրեմն ճանաչման գործընթաց ենք սկսելու»,- նշեց բանախոսը:
Քաղաքագետի խոսքով, ԵԱՀԿ Մինսկի խմբի համանախագահների տարածաշրջանային առաջիկա այցի նպատակը պետք է լինի Արցախի իշխանությունների հետ հանդիպումը, մանավանդ, երբ չկան բանակցություններ, այլ կան քննարկումներ՝ բանակցությունները վերսկսելու շուրջ:
«Առանց Արցախի մասնակցության այդ քննարկումները չեն կարող առաջ գնալ, ինչը նշանակում է, որ բանակցային գործընթացը ևս առանց Արցախի չի կարող առաջ շարժվել: Մյուս կողմից, երբ ասում են, որ Արցախը դուրս է մնացել բանակցային գործընթացից, այդպես չէ: Արցախը քննարկումներին մասնակցում է ՀՀ-ԼՂՀ և Արցախ-ԵԱՀԿ Մինսկի խումբ ձևաչափերով: Չկա միայն Արցախ-Ադրբեջան կապը»,- շեշտեց Հրանտ Մելիք-Շահնազարյանը:
Քաղաքագետն անդրադարձավ նաև առաջիկայում կայանալիք ՀԱՊԿ զորավարժություններին, որոնց առաջին անգամ կմասնակցի նաև հայ-ռուսական միացյալ զորախումբը. «Ադրբեջանում փորձում են չնկատել բաներ, որոնք կվախեցնեն ադրբեջանական հասարակությանը: Հայ-ռուսական հարաբերությունների ցանկացած սերտացում Ադրբեջանի կողմից ընկալվում է որպես իր հասարակությանն ուղղված դատավճիռ: Դրա համար ադրբեջանական քարոզչամեքենան քողարկում է այս փաստը»։
Հրանտ Մելիք-Շահնազարյանը չբացառեց նաև, որ զորավարժությունների ընթացքում Ադրբեջանը փորձի ռազմական սադրանքների դիմել:
Լրահոս
Տեսանյութեր
Ոստիկանները Բագրատ Սրբազանին և ԱԺ պատգամավորներին թույլ չեն տալիս մուտք գործել Կիրանց