Ես խնդիր չունեմ դուր գալու ո՛չ Արևելքին, ո՛չ Արևմուտքին, ո՛չ Ռուսաստանին.Շարմազանով
«Միշտ էլ կան այընտրանքներ, բայց եթե այլընտրանքները մեզ ձեռնտու չեն, պետք է ընտրենք այն տարբերակը, որը բխում է մեր շահերից»,- այս մասին այսօր լրագրողների հետ զրույցում ասաց ԱԺ փոխնախագահ, ՀՀԿ խոսնակ Էդուարդ Շարմազանովը՝ խոսելով իր երեկվա հայտարարության մասին, որ ՀԱՊԿ-ին այլընտրանքը միայն Թուրքիան է, նշանակում է՝ մեզ համար այլընտրանք չկա:
Նրա խոսքերով՝ այն, ինչ որ ասել է, բխում է ՀՀ անվտանգության ռազմավարությունից և որևէ նոր բան չի ասել: «Իմ մտքի հիմքում բացառապես ընկած է ՀՀ պետական շահը, ես խնդիր չունեմ դուր գալու ո՛չ Արևելքին, ո՛չ Արևմուտքին, ո՛չ Ռուսաստանին, ո՛չ հարավին, իմ խնդիրն իմ թիմի հետ սպասարկել ՀՀ շահը»,-ընդգծեց ՀՀԿ խոսնակը:
Շարմազանովը նշեց, որ ՀՀ երեք նախագահների օրոք էլ հայ-ռուսական դաշնակցային հարաբերությունները երբեք որևէ լուրջ այլընտրանք, որ ձեռնտու է Հայաստանի համար, չեն ունեցել:
«Թուրքիան ՆԱՏՕ անդամ է, կա քաղաքական մեկ այլ աքսիոմա՝ մեզ նման երկրները, որ գերտերությունների շարքին չեն պատկանում, պետք է կարողանան լիարժեքորեն կազմակերպել իրենց անվտանգության համակարգը, իսկ միայնակ դա չենք կարող անել»,- նշեց Էդուարդ Շարմազանովը՝ հավելելով, որ օրինակ, Լեհաստանը, Մերձբալթյան երկրները, որոնք ևս, եթե կարողանային պաշտպանել իրենց անվտանգությունը միայնակ, չէին մտնի Հյուսիսատլանտյան դաշինքի մեջ:
«Մենք ընտրել ենք ՀԱՊԿ-ը ոչ թե նրա համար, որ դուր գանք այս կամ այն մեր դաշնակից երկրին, այլ որովհետև սա ձեռնտու է Հայաստանին: Ռազմական դաշնակցային հարաբերությունների առումով հայ-ռուսական հարաբերություններում որևէ խնդիր չկա, և բոլոր իրավապայմանագրային կետերը, որոնք ներառված են թե նախագահների, թե պաշտպանության նախարարների, թե խորհրդարանների միջև, իրականացվում են: Հարցին՝ Թուրքիան սպառնալիք է, թե ոչ, ապա՝ այո, Թուրքիան սպառնալիք է, սա մեր ռազմական դոկտրինից բխող կարծիք է: Թուրքիան եզակի երկրներից մեկն էր, որը քառօրյա պատերազմի օրերին չորս պաշտոնական հայտարարությամբ հանդես եկավ՝ սատարելով Ադրբեջանի հանցագործ քաղաքականությունը»,-հայտնեց Է. Շարմազանովը:
Նրա խոսքերով՝ չկա որևէ այլ ռազմաքաղաքական դաշինք ու միջազգային կառույց, որ ՀՀ-ի անվտանգության համար կարող է ավելի շահեկան պայմաներ ստեղծել, քան հայ-ռուսական դաշնակցային ռազմական հարաբերությունները:
«Եթե Հայաստանը կարողանար միայնակ կազմակերպել ամբողջությամբ իր անվտանգության համակարգը, ապա ի՞նչ էր անում այստեղ ռուսական ռազմաբազան, ձևի համար ե՞նք բերել, պաշտպանական համարակարգ ասելը միայն հրացանով կամ ավտոմատով սահմանի դեմը կանգնելը չէ, դա ավելի խորքային երևույթ է: Եթե բոլորս հպարտանում ենք, որ ունենք «Իսկանդեր», «Սմերչ» և այլն, դա էլ այդ համագործակցության փոխշահավետության մի մասն է»,- նշեց ՀՀԿ խոսնակը:
Շարմազանովը նշեց նաև, որ Տեր-Պետրոսյանից մինչև այսօրվա իշխանությունները կարողացել են այնքան ճկուն գտնվել, որ կարողացել են օգտագործել այդ ռազմական ռեսուրսը, որը բխում է ՀՀ շահերից: «Տարածաշրջանում կա երկու բանակ, մենք պետք է դաշնակից լինենք այդ երկուսից մեկին, մեկը թուրքականն է, մեկը ռուսականն է»,-եզրափակեց ՀՀԿ խոսնակը:
Լրահոս
Տեսանյութեր
Ոստիկանները Բագրատ Սրբազանին և ԱԺ պատգամավորներին թույլ չեն տալիս մուտք գործել Կիրանց