Ձեր վստահելի աղբյուրը

2018 թվականի հունվարի 1-ից ուժի մեջ մտնող ՀՀ հարկային օրենսգրքով, ի թիվս գործարար միջավայրի բազմաթիվ այլ բարեփոխումների, սահմանվել է, որ ԱԱՀ-ի գումարները վերադարձվելու են ոչ միայն արտահանողներին, այլև երկրի ներքին տարածքում գործունեություն իրականացնող տնտեսվարողներին: Այս մասին այսօր լրագրողների հետ հանդիպման ժամանակ ասաց ՊԵԿ վարչարարության մեթոդաբանության, ընթացակարգերի և սպասարկման վարչության պետ Արման Պողոսյանը:

«Այն հարկ վճարողներն, որոնք ԱԱՀ-ի գծով ունեն դեբետային մնացորդներ, կարող են կիսամյակային պարբերականությամբ դիմել հարկային մարմին և սահմանված կարգով պետությունից հետ ստանալ ԱԱՀ-ի իրենց գումարները»,- նշեց Արման Պողոսյանը:

Նա նաև նշեց, որ ներդրողներին աջակցելու և տնտեսությունում ներդրումները խթանելու նպատակով մշակվել և արդեն իսկ ՀՀ Ազգային ժողովի կողմից առաջին ընթերցմամբ ընդունվել է օրենսդրական նախագծերի փաթեթ, որով առաջարկվում է ԱԱՀ-ի գումարները կիսամյակային պարբերականությամբ հետ ստանալու հնարավորությունը կիրառել ավելի շուտ՝ 2017 թվականի հուլիսի 1-ից սկսած:

Մասնավորապես, առաջարկվում է մեքենաների, սարքավորումների և հումքային ապրանքների ներմուծումն ազատել ԱԱՀ-ից:

Արման Պողոսյանը հայտնեց, որ գործարար միջավայրի բարելավման միջոցառումների շրջանակում, կոմիտեն բարեփոխումներ է նախաձեռնել նաև արտահանողներին աջակցելու և շրջանառու ֆինանսական միջոցների համալրման խնդիրը կարգավորելու ուղղությամբ: Մասնավորապես, պարզեցվել է արտահանողներին ԱԱՀ-ի գումարների վերադարձման ընթացակարգը և կրճատվել է ժամկետը: Ըստ նրա՝ ՀՀ կառավարության սահմանած չափորոշիչները բավարարելու դեպքում, մինչև 20 միլիոն դրամ հայտերի հիման վրա ԱԱՀ-ի գումարների վերադարձն իրականացվում է առանց հարկային մարմնի ուսումնասիրության՝ ընդամենը 4 աշխատանքային օրվա ընթացքում՝ նախկինում՝ 90 օրվա փոխարեն:

Արման Պողոսյանի խոսքերով՝ որոշման՝ ուժի մեջ մտնելուց սկսած մինչև սեպտեմբերի 30-ը պարզեցված ընթացակարգով մինչև 20 մլն դրամ գումարի վերադարձի հայտերով 89 հարկ վճարողի վերադարձվել է ավելի քան 1 մլրդ 73 մլն դրամ ԱԱՀ-ի գումար:

ՊԵԿ վարչարարության մեթոդաբանության, ընթացակարգերի և սպասարկման վարչության պետը հիշեցրեց, որ 2018թ-ի հունվարի 1-ից ուժի մեջ է մտնում նոր Հարկային օրենսգիրքը, որով բազմաթիվ ուղղություններով բարեփոխումներ են իրականցվելու ձեռնարկատիրական միջավայրում:

Մասնավորապես, ըստ Արման Պողոսյանի, հունվարի 1-ից ավելացված արժեքի հարկ վճարողներն ԱԱՀ-ի գծով հաշվանցումները կատարում են հաշվառման հաշվեգրման մեթոդով՝ անկախ մատակարարներին վճարում կատարած լինելու հանգամանքից, ինչն, ըստ վարչության պետի, էականորեն նպաստում է ԱԱՀ վճարողների շրջանառու ֆինանսական միջոցների օգտագործման արդյունավետության բարձրացմանը:

Ներդրվել է նաև շահութահարկի կանխավճարային այլընտրանքային համակարգը: Այն հարկ վճարողներին հնարավորություն է ընձեռում վճարումները կատարել ոչ թե նախորդ տարվա շահութահարկի գումարի 18.75 տոկոսի չափով, այլ նախորդ եռամսյակի ընթացքում ապրանքների մատակարարումից, աշխատանքների կատարումից և ծառայությունների մատուցումից ստացվող եկամուտների երկու տոկոսի չափով:

«Արդյունքում, բոլոր այն հարկ վճարողներն, ովքեր նախորդ տարին ավարտել են մեծ շահույթով, սակայն ընթացիկ տարում մեծ շահույթ չեն ակնկալում, կարող են ընտրել կանխավճարների կատարման այլընտրանքային տարբերակը՝ դրանով իսկ կրճատելով իրենց կողմից վճարվող շահութահարկի կանխավճարների գումարները, միաժամանակ բարձրացնելով շրջանառու ֆինանսական միջոցների օգտագործման արդյունավետությունը»,- հայտնեց Արման Պողոսյանը:

Նշվեց նաև, որ փոփոխություններ են կատարվել «Tax free» համակարգում: Օտարերկրացիների, այդ թվում՝ զբոսաշրջիկների կողմից ՀՀ տարածքում գնումները խթանելու նպատակով ընթացիկ տարում ընդլայնվել է օտարերկրյա ֆիզիկական անձանց ԱԱՀ-ի վերադարձի կիրառության շրջանակը. 2 անգամ նվազեցվել է գնումների մեծության նվազագույն սահմանաչափը՝ 100 հազար դրամի փոխարեն սահմանվելով 50 հազար դրամ: