Ձեր վստահելի աղբյուրը

Ադրբեջանը խախտում է արցախյան հակամարտության կարգավորման համար կողմերի միջև ընդունված պայմանավորվածությունները: Սա արցախցիների համար նորություն չէ: 25 տարի շարունակ նրանք վկա են այդ իրողությանը: ԱԺ-ում այսօր լրագրողների հետ զրույցում այս մասին ասաց Արցախի ԱԺ արտաքին հարաբերությունների մշտական հանձնաժողովի նախագահ Արզիկ Մխիթարյանը:

Նա նշեց, որ Հայաստանի ու Ադրեջանի նախագահների ժնևյան հանդիպումը Ադբեջանի անպատասխանատվության վկայությունն էր, որովհետև թեև կողմերը համաձայնեցին չխախտել հրադադարի ռեժիմը, բայց Ադրբեջանի գործողությունների արդյունքում սահմանային լարվածության աճ գրանցվեց, ունեցանք զոհեր:

«Ադրբեջանը չունի քաղաքական այն կամքը, որ եթե նստել են բանակցությունների սեղանի շուրջ, երկու նախագահներով որոշումներ են կայացրել, պահպանեն այդ որոշումը: Դա անընդունելի քաղաքական դիրքորոշում է, մենք դատապարտում ենք այն»,- ասաց Արզիկ Մխիթարյանը:

Հարցին՝ Արցախը ի՞նչ նոր մոտեցումներ է առաջարկելու Հայաստանին, որն այսօր ներկայացնում է նրա շահերը բանակցային սեղանին, Արզիկ Մխիթարյանը պատասխանեց. «Անկասկած ընդունելի չէ, որ Արցախի քաղաքական խնդրի լուծումն իրականացվում է առանց Արցախի մասնակցության: Մեզ համար թիվ խնդիրն այն է, որ արցախյան խնդրի լուծման ձևաչափում վերականգնվեն Արցախի իրավունքները, մենք ևս կարողանանք մասնակցել մեր ճակատագրի լուծմանը: Սա է մեր ցանկությունը: Մենք չենք կասկածում, որ հայկական պատվիրակությունները խորհրդարանական դիվանագիտական մակարդակում իրոք պաշտպանում են Արցախի խնդրի խաղաղ կարգավորման հարցը, սակայն, լուծել մի խնդիր մի ժողովրդի համար, որտեղ ինքը չի մասնակցում, նորմալ երևույթ չէ»:

Հաջորդ հարցին, թե ինչպե՞ս կարող է Արցախը հայտնվել բանակցությունների սեղանի շուրջ, արդյոք միակ ճանապարհը պատերա՞զմն է, Մխիթարյանը պատասխանեց, որ արցախցիները միշտ էլ պատրաստ են պատերազմի:

«Ակնհայտ է, որ Ադրբեջանը քաղաքական լուծումների չի գնում, նա չունի այն կեցվածքը, որ խաղաղ ճանապարհով լուծումներ առաջարկի: Գուցե ճշմարիտ են նրանք, ովքեր գտնում են, որ բանակցություններին մեր մասնակցության ճանապարհը պատերազմն է, բայց ես կարծում եմ, որ գոյություն ունի քաղաքական մշակույթ, որին պետք է հետևեն և Հայաստանը, և Ադրբեջանը»,- ասաց նա:

Լրագրողները նաև հետաքրքրվեցին՝ հայկական կողմերը բավարար ջանքեր գործադրո՞ւմ են, որ Արցախը վերադառնա բանակցություններին, Արզիկ Մխիթարյանը պատասխանեց, որ Արցախի խորհրդարանը չունի գործիքներ, որպեսզի կարողանա միջազգային հարթակներում պաշտպանել իր իրավունքները, միակ խողովակը Հայաստանի խորհրդարանի պատվիրակություններն են, որոնք պետք է ջանքեր գործադրեն, որ Արցախի իրավունքները վերականգնվեն:

Դիտարկմանը, որ հիմա Ադրբեջանի նախագահ Իլհամ Ալիևի դիմաց նստում և բանակցություններ է վարում ՀՀ նախագահ Սերժ Սարգսյանը, իսկ 2018թ.-ի ապրիլից հետո հայտնի չէ՝ ով է այդ գործառույթն իրականացնելու, արդյոք Արցախում տեսնո՞ւմ են բանակցող մեկ այլ անձի, Արզիկ Մխիթարյանը պատասխանեց.

«Արցախում չեն զարմանում, երբ Ալիևը նստում է Սերժ Սարգսյանի դիմաց, նայում է նրա աչքերին, պայմանավորվածություններ են ձեռքբերում, բայց մի քանի օր անց սահմանին կրկնվում է նույնը, սա աննորմալ երևույթ է»: