«Ասում են՝ նպաստի ոլորտում հսկայական սև շրջանառություն կա». Փաշինյանը՝ նախարարին
Ազգային ժողովում այսօր քննարկվում է «Սոցիալական աջակցության մասին» ՀՀ օրենքում փոփոխություններ և լրացումներ կատարելու մասին և «Պետական նպաստների մասին» ՀՀ օրենքում փոփոխություններ և լրացումներ կատարելու մասին օրենքի նախագծերի փաթեթն առաջին ընթերցմամբ ընդունելու հարցը։
Հիմնական զեկուցող ՀՀ աշխատանքի և սոցիալական հարցերի նախարար Արտեմ Ասատրյանը նշեց. «Կառավարության ծրագրով նախատեսված է արմատապես վերանայել անապահովության գնահատման մոտեցումների մեթոդաբանությունը՝ հիմք ընդունելով ընտանիքի յուրաքանչյուր անդամի զբաղվածության ապահովման և պետական սոցիալական աջակցության ծրագրերը, հատկապես՝ բնակչության անաշխատունակ շերտերին ուղղելու սկզբունքային մոտեցումը»։
Հիմնական զեկուցողին հարց ուղղեց «Ելք» խմբակցության ղեկավար Նիկոլ Փաշինյանը. «Մեծ թվով ահազանգեր ենք ստանում այն մասին, որ ընտանեկան նպաստ նշանակելիս և վճարելիս սոցիալական ծառայություններում կիրառվում է, այսպես ասած, որոշակի ատկատներ վերցնելու պրակտիկան, աշխատակիցները նպաստառուից գումար են վերցնում, որպեսզի «դասավորեն» նրան արժանի սոցիալական նպաստը։ Ուզում եմ իմանալ նախարարությունում նման ահազանգեր ստացվու՞մ են, եթե այո, վերջին անգամ նման դեպք ե՞րբ է բացահայտվել»։
Արտեմ Ասատրյանը նշեց, որ հարցն իրավապահ մարմինների դաշտում գտնվող գործառույթ է, իսկ ինչ վերաբերում է իրենց գործառույթների մասով աշխատանքներին, ասաց. «Փորձում ենք առավելագույնը տեղեկատվական համակարգերը զարգացնել, որպեսզի ավելորդ շփումներից զերծ լինեն քաղաքացիները: Առցանց դիմումների համակարգն է ներդրված, որն էլ հիմնական երաշխիքն է, որ այդ «դասավորելը» չլինի»։ Բնականաբար, կան ռիսկեր և դրանք մինչև վերջ կառավարել կամ զրոյացնել ուղղակի անհնար է, ոչ միայն ՀՀ-ում, այլ ընդհանրապես»։
Փաշինյանն արձագանքեց՝ «Ասում են՝ նպաստի ոլորտում հսկայական «սև» շրջանառություն կա։ Խոսքս վերաբերում էր նրան, թե ահազանգեր ստանալիս ի՞նչ եք անում»։
Նախարարը պատասխանեց. «Ձեր նշած դեպքերի հետ կապված, այո ահազանգեր եղել են, մենք ունեցել ենք այցելություններ կոնկրետ տարածքներ և ուսումնասիրություններ արել, եթե հիմք է եղել իրավապահ մարմիններին փոխանցելու գործը, ապա փոխանցվել է։ Բայց, որպես կանոն, քաղաքացիները չեն հաստատում տեղեկությունը, որ իրենք տեսուչի հետ որևէ շփման մեջ են եղել»:
Լրահոս
Տեսանյութեր
Հայաստանում շատ են աշխատում, քիչ վճարվում. Աշխատանքի օրը՝ աշխատավորների խնդիրների մասին