Մի կողմից՝ լաչառություն, մյուս կողմից՝ դավադրությունների փնտրտուք, մտածելու ժամանակ չի մնում. «Առավոտ»
«Առավոտ»-ի խմբագիր Արամ Աբրահամյանը գրել է. «…Մի բան էլ կա, որ Հայաստանում լավ է վաճառվում՝ «դավադրություններ բացահայտելը»։ Հենց որ ձեզ ինչ-որ բան դուր չի գալիս, միանգամից դեմքին տալիս եք խորամանկ և առեղծվածային արտահայտություն և կիսաձայն արտաբերում եք՝ «ես գիտեմ, թե որտեղից է այդ ամենը գալիս»։ Եվ քանի որ մենք մեծապես ազդված ենք ռուսական քաղաքական մշակույթից, այդ՝ մշուշով պատած, խորհրդավոր չարիքի կենտրոնն» ունի կոնկրետ անուններ՝ Արևմուտքն իր ամբողջականության մեջ, հրեական, մասոնները կամ «հուդամասոնները» (ի դեպ, չափազանց անգրագետ ձևակերպում է), աշխարհի ուժային կենտրոնները, ԼԳԲՏ համայնքը... և իհարկե, Սորոսը։
Պատկերացումն այն մասին, որ ամբողջ աշխարհի դարդուցավը կտրել է, և բոլոր «մութ» ուժերի նպատակը Հայաստանին և հայերին «վատություն» անելն է, գալիս է, բնականաբար, մտահորիզոնի նեղությունից, քիչ կարդալուց, քիչ խորհելուց։ Եվ հետո՝ այդպես ավելի հեշտ է ապրել. Եթե ես ընդունում եմ, որ մարդիկ առաջնորդվում են իրենց սեփական համոզմունքներով (ճիշտ, թե սխալ), ապա հնարավոր է՝ ես փորձեմ նրանց հասկանալ։ Իսկ ասել՝ «նա պատվեր է կատարում», նշանակում է ազատել ուրիշի մտքերի մեջ խորանալուց։ Մի կողմից՝ լաչառություն, մյուս կողմից՝ դավադրությունների փնտրտուք։ Մտածելու ժամանակ չի մնում»։