Ձեր վստահելի աղբյուրը

Կառավարության այսօրվա նիստում  ՀՀ արդարադատության նախարար Դավիթ Հարությունյանը ներկայացրեց  Ընտանեկան օրենսգրքում լրացումներ և փոփոխություններ կատարելու մասին հարցը, ինչը պայմանավորված է նոր Սահմանադրությամբ։ Նոր Սահմանադրությունը նոր կարգավորումներ է տալիս, մասնավորապես` ամուսնության մասով:

Դավիթ Հարությունյանը նշեց, որ առաջին անգամ Հայաստանում օրենքով ամրագրվել է, որ կարող են ամուսնանալ միայն կինն ու տղամարդը:

Վարչապետը հարցրեց. «Մինչ այդ ամրագրված չէ՞ր դա»։  Դավիթ Հարությունյանը նշեց, որ մինչ այժմ այս դրույթը ենթադրաբար էր գործում, այժմ՝ արդեն կամրագրվի օրենքով:

Նախատեսվում է փոփոխություններ և լրացումներ կատարել Հայաստանի Հանրապետության ընտանեկան օրենսգրքում, մասնավորապես`

1. համապատասխանեցնել Սահմանադրության կարգավորումներին,

2. համապատասխանեցնել օրենսդրությունը միջազգային չափանիշներին՝ իրականացնելով Հայաստանի Հանրապետության կողմից ստանձնած միջազգային պարտավորությունները,

3. փոփոխություն է կատարվել ծնողական իրավունքներից զրկելու կարգում, որպեսզի ընդլայնվի ծնողական իրավունքներից զրկելու մասին հայց ներկայացնող անձանց շրջանակը,

4. լրացում է նախատեսվել գտնված (ընկեցիկ) երեխաների հայտնաբերման դեպքերի համար, որի արդյունքում երեխային հայտնաբերելուց հետո 3 ամիս շարունակ ոստիկանությունը փնտրում է երեխայի ծնողներին և վերջիններիս չհայտնաբերման պարագայում միայն թույլատրում տվյալ երեխայի որդեգրումը,

5. սահամանվել է, որ ամուսիններից յուրաքանչյուրը պետք է համաձայնություն տա երեխա որդեգրելու համար,

6. երեխայի շահը պահպանելու նպատակով սահմանվել է որդեգրողի ընտանիքում որդեգրված երեխայի խնամքի նկատմամբ վերահսկողություն,

7. ամրագրել երեխայի շահի առաջնայնությունը երեխային դաստիարակության համար խնամատար ընտանիք հանձնելիս,

8. «երեխային տեղավորելու» եզրույթը փոխարինվել է «երեխայի խնամքը և դաստիարակությունը կազմակերպելու» եզրույթով,

9. Նախագծով ընդլայնվել է սեփական կարծիքն արտահայտելու երեխայի իրավունքը՝ հնարավորություն է տրվել նաև 10 տարին չլրացած երեխայի կարծիքը հաշվի առնել, ըստ վերջինիս տարիքի և հասունության մակարդակի,

10. նախագծով հստակեցվում է ծնողական իրավունքներից զրկելու հիմքերը, մասնավորապես՝ սահմանվում են ժամկետներ, որոնց լրանալուց հետո իրավասու անձիք կարող են դիմել անձին ծնողական իրավունքներից զրկելու համար,

11. նախագծով փոփոխություն է կրել նաև «որդեգրում» հասկացությունը,

12. սահմանվել է որդեգրել ցանկացող անձանց տարիքային վերին շեմ, հաշվի առնելով բացառիկ դեպքերը,

13. օրենսգրքի 123-րդ հոդվածով հստակեցվել է երեխայի որդեգրման պետական գրանցման գործընթացում առկա խնդիրները՝ երեխայի ազգանվան գրառման հետ կապված,

14. նախատեսվել են խնամատար ընտանիքի տեսակները և երեխային հանձնելու հիմքերը, դրանց առանձնահատկությունները, խնամատարության տևողությունը,

15. խնամատարությունը նախատեսվել է ոչ միայն ծնողական իրավունքներից զրկված լինելու դեպքում, այլ նաև փաստացի առանց ծնողական խնամքի մնացած երեխաների համար, մասնավորապես՝ հաշվի առնելով դեպքի հրատապությունն ու այլ առանձնահատկություններ,

16. ամրագրվել է երեխայի ծնողների իրավունքները՝ տեսակցելու, դատական կարգով խնամատարությունը բողոքարկելու և երեխային վերաբերող այլ հարցերի լուծման դեպքում,

17. հստակեցվել են խնամատար ընտանիքներին ներկայացվող պահանջները և դրանց ընտրությունը,

18.  ընդլայնվել են դաստիարակության համար երեխային ընտանիք հանձնելու
մասին պայմանագրում նախատեսվող պայմաններն ու հանգամանքները՝ կնքելով այն եռակողմ՝ ծնողի (խնամակալության դեպքում՝ խնամակալի), խնամատար ընտանիքի և խնամակալության ու հոգաբարձության մարմնի միջև, բացառությամբ այն դեպքերի, երբ ծնողը զրկվել է ծնողական իրավունքից, մահացել է, ծանր հիվանդության, կալանավորման կամ այլ պատճառով հնարավորություն չունի մասնակցելու պայմանագրի կնքմանը,

19. խնամատար ընտանիքի նկատմամբ վերահսկողություն նախատեսելու հիմնական սկզբունքների և ուղղություններն են ամրագրվել,

20. որդեգրումը իրականացվելու է միայն համապատասխան մասնագետների կողմից երեխաի և ապագա ծնողների համադրելիության գնահատման հիման վրա: 

Այս նորմերը, ըստ Դավիթ Հարությունյանի, նախորդ Սահմանադրության մեջ չեն եղել. «Քանի որ այս օրենքով սահմանել ենք մի շարք նոր պարտավորություններ, բնականաբար, նախատեսել ենք նաև սանկցիաներ: Դրանք  վարչական  և քրեական պատասխանատվություն են՝ կապված տարբեր նորմերի խախտման հետ»ը:

ՀՀ աշխատանքի և սոցիալական հարցերի փոխնախարար Արայիկ Պետրոսյանը երկու օր ժամանակ խնդրեց երկու հարց հստակեցնելու համար:

«Իսկ ինչու՞ չենք հասցրել մինչև այդ, ինչքան ժամանակ է քննարկում ենք: Մենք պայմանավորվել ենք, մենք  չենք բացառում և իդեալիստ չենք, որ հնարավոր է շտապ ինչ-որ լուծումներ, բայց այն, ինչ որ ամիսներով նայում ենք, վերջին օրով ինչու՞ ենք մեկ-երկու օր էլ ուզում: Ոչ», - ասաց Կարեն Կարապետյանը: