Ձեր վստահելի աղբյուրը

Պարենային ապրանքների գների բարձրացումն անհանգստացրել է «Իրազեկ և պաշտպանված» սպառող ՀԿ նախագահ Բաբկեն Պիպոյանին: Ամանորի թանկացումներից առաջ սա հերթականն է, թե ինչ է հաջորդելու, ոչ ոք չգիտի, բայց ակնկալիքները դրական չեն:  Panorama.am-ի հետ զրույցում ՀԿ նախագահը թվարկում է թանկացման հետևանքները՝ սա բերելու է կենսամակարդակի և սոցիալական պայմանների վատացմանը, աղքատության ու արտագաղթի ավելացմանը:

«Թանկացումը հակասում է պետական ու հասարակական շահերին»,-եզրակացնում է նա:

Ստեղծված իրավիճակում, նրա կարծիքով, պետք է ոչ թե փաստել իրավիճակն ու մատնանշել հետևանքները, այլ ախտորոշել դրա պատճառներն ու նշել կանխող մեխանիզմները:

«Ըստ էության, պարենային ապրանքների գների թանկացումը հնարավոր է կանխել երկու մեխանիզմով՝ հայրենական արտադրանքը լուրջ մրցակցության մեջ դնելով ներմուծված ապրանքի հետ, երկրորդ՝ ներմուծված ապրանքների ոլորտում ստեղծել բացառապես ազատ բիզնես միջավայր, որը գներն իրատեսական լինեն ու խաղի լավագույն կանոններ մշակվեն»,-ասաց Բ. Պիպոյանը:

Դրա փոխարեն, ըստ Panorama.am-ի զրուցակցի, ունենք մի իրավիճակ, երբ գնաճը մտահոգություն չի պատճառում գործադիր իշխանությանը:

«Մրցակցային մարմինը գալիս է պարզաբանումներ տալու, մինչդեռ այստեղ նրա գործառույթները չկան: Այստեղ խնդիրը գործադիր իշխանության կլուբի ու բիզնես էլիտայի անդամների խաղի կանոնների ձևավորման մեջ է: Մենք խոսում ենք լավ բիզնեսի մասին, բայց իրականում մենք բիզնես կառավարման մոդել չունենք»,-կարծիք հայտնեց ՀԿ նախագահը:
Սպառողների շահերի պաշտպանությամբ զբաղվող կազմակերպության ներկայացուցիչը նշում է, որ այս ամենի հետևանքով է արձանագրվում գնաճ, դա էլ բերում է սպառողների կյանքի բարդացմանը, նվազագույն զամբյուղի ապրանքների սպառման ծավալների նվազմանն ու դժգոհության մեծացմանը:

Նա օրինակ բերեց ձվի թանկացումը, նկատեց, որ հավկիթի ներմուծումը չի կարող բերել դրա գնի բարձրացմանը:

«Ես չգիտեմ, թե ով է այդ թեզի հեղինակը, բայց կարող եմ ասել, որ սա հերթական դիլետանտական մոտեցումն է: Ներմուծվող ապրանքը գալիս է երկիր միայն այն բանի համար, որպեսզի տեղական արտադրողը չկարողանա գերշահույթ հետպանդել, որպեսզի գնի  բալանսավորում լինի:  Հաշվի առնելով, որ դրսում այդ ապրանքն էժան է, երկրում կա այդ ապրանքի դեֆիցիտ, պետությունն ինքնաբավության մակարդակով թույլ է տալիս ներմուծում, դա մի կողմից նպաստում է իրատեսական գնի ձևավորմանը, մյուս կողմից՝ առկա դիֆիցիտը լրացնելուն»,-ասաց նա:

Պիպոյանը նկատեց, որ մինչ այս պահը ներմուծված ձու չեն տեսել:  Իսկ եթե կառավարությունը տեսնում է, որ հայրենական արտադրողը սկսել է չարաշահումներ անել, պետք է թույլտվություն տրամադրի հակակշիռ ստեղծող ապրանքի ներմուծման համար:

ՀԿ նախագահի խոսքով, Հայաստանում աշխատավարձերի չափը չի փոխվել, հարկային քաղաքականությունը չի փոխվել, հավկիթի ինքնարժեքի վրա ազդող որևէ բան չկա:

«Հետևաբար մենք գործ ունենք թղթային մանիպուլյացիայի հետ, մի կողմից արտադրողն իրավունք ունի նման բան անելու, մյուս կողմից պետությունը սանկցիայի իրավունք չունի: Բայց պետությունը չգիտի, որ ունի գործիքակազմ, որով հնարավոր է կանխել նման իրավիճակների առաջացումը: Չեմ բացառում, որ այդ գործիքակազմի մասին տեղյակ է, սակայն քայլեր չի ձեռնարկում, քանի որ գործադիր իշխանության համար շատ ձեռնտու իրավիճակ է ստեղծվել: Գնաճը բերելու է հարկերի հավաքման ավելացման, վերջում ցույց կտան, որ շատ հարկեր են հավաքել: Իսկ արտագաղթի տոկոսը, քաղաքացու ծանր վիճակը գործադիր իշխանությանը շատ ավելի քիչ է հետաքրքրում»,-կարծիք հայտնեց նա: