Ձեր վստահելի աղբյուրը

ՀՀ կառավարության այսօրվա նիստում հաստատվեց էներգետիկ ենթակառուցվածքների և բնական պաշարների նախարարության ջրային տնտեսության պետական կոմիտեի կարիքների համար գնման պայմանագրի դադարեցնելու մասին որոշման նախագիծը: Կնքված պայմանագրի շրջանակում կատարվել են ՀՀ Սյունիքի մարզում Մ-2 Երևան-Գորիս-Մեղրի-Իրանի սահման միջպետական ավտոմայրուղու 379+200 կմ երկարությամբ հատվածում Արաքս գետի ափի շուրջ 40 մ երկարությամբ հատվածի վթարային վիճակի վերացման աշխատանքների նախապատրաստական բոլոր փուլերը:

Ըստ նախագծի, քանի որ վերոնշյալ հատվածը Արաքս գետով սահմանակից է Իրանի Իսլամական Հանրապետությանը, և մեր ափամերձ տարածքները հսկվում են ՌԴ-ի 2393 սահմանապահ զորամասի կողմից, ուստի անհրաժեշտ էր ձեռք բերել համաձայնություն կողմերի միջև՝ նշված հատվածում աշխատանքների կատարման և ավարտման համար: Սակայն աշխատանքային կարգով հանդիպումների ընթացքում հնարավոր չի եղել արդյունավետ համագործակցել, և կողմերի միջև համաձայնություն ձեռք չի բերվել:

Գործադիրի նիստից հետո Ջրային տնտեսության պետական կոմիտեի նախագահ Արսեն Հարությունյանը լրագրողների հետ զրույցում ասաց, որ պայմանագրով ընդհանուր 12,2 միլիոն դրամի աշխատանք է նախատեսված, որի հիմնականը՝ 9,5 մլն դրամի աշխատանքը շինարարն ավարտել է:

«Քանի որ իրանական կողմի հետ բանակցությունները դեռ շարունակվում են և այս տարի չեն ավարտվելու, ստիպված պայմանագիրը ավարտում ենք, որ շինարարը տույժ-տուգանքների տակ չընկնի: Մենք պարտավոր ենք նրա կենսագրությունը մաքուր պահել, քանի որ շինարարի պատճառով չէ, որ աշխատանքները դադարեցվում են: Աշխատանքները ժամանակավոր են դադարեցվում»,- ընդգծեց Արսեն Հարությունյանը:

Նրա խոսքով՝ բանակցություններն իրանական կողմի հետ շարունակվում են, իսկ ռուս սահմանապահները որևէ կապ չունեն այս ամենի հետ:

Դիտարկմանը, թե նախագծի հիմնավորման մեջ նշված է՝ խնդիրը ռուսական սահմանապահների հետ է, և նրանք համաձայնություն չեն տալիս, Ջրպետկոմի նախագահը նշեց, որ վրիպակ է եղել, ռուս սահմանապահները մեր հետ բանակցում են իրանական կողմի հետ:

«Ռուսական կողմի հետ որևէ խնդիր չկա: Ափապաշտպան աշխատանքների արդյունքում գետի հունը փոխվում է, և իրանական կողմն ունի որոշակի առարկություններ, քանի որ գետը թեքվում է Հայաստանի կողմը: Իրանական կողմը հարց է բարձրացել և հիմա քննարկումներ են ընթանում, խոսքը 40 մետրի մասին է: Իրանական կողմի բանակցությունները դադարեցնում ենք, քանի որ շինարարը տույժ-տուգանքի տակ է ընկնում»,- ասաց նա:

Արսեն Հարությունյանի խոսքով՝ ռուսական կողմի համաձայնությունն ընդհանրապես կապ չունի այս պրոյեկտի հետ:

«Քանի որ ռուսական կողմն է պաշտպանում սահմանը, բանակցությունների արդյունքում մենք պետք է ռուսական կողմի հետ բանակցենք Իրանի հետ: Ռուսական կողմը սահմանապահի իրավունքով է մասնակցում, բայց ձայնի իրավունք չունի:

Նույն թուրքերի հետ հանդիպման ժամանակ էլ ռուսական կողմը միշտ ներկա է լինում, որովհետև սահման պահողն ինքն է: Ռուս սահմանպահները պետք է կանգնեն ու լսեն, թե երկու կողմն ինչ են իրար հետ բանակցում»,- նշեց Արսեն Հարությունյանը: