Ձեր վստահելի աղբյուրը

ՀՀ պաշտպանության նախարարին կից հասարակական խորհրդի հովանու ներքո ստեղծված քաղաքացիների դիմումների և բողոքների քննարկման հանձնաժողովի այսօրվա նիստում քննարկվեց մեկ տասնյակից ավելի դիմում-բողոք:

Հանձնաժողովի նախագահ, պաշտպանության նախարարի խորհրդական Գեղամ Հարությունյանը նշեց, որ դիմում-բողոքները հիմնականում վերաբերում են զորակոչիկների առողջական հարցերին, դրանք բողոքներ են լրացուցիչ ստուգիչ հետազոտությունների, փորձաքննական գնահատականների հետ կապված:

Գեղամ Հարությունյանը Panorama.am-ի թղթակցի հետ զրույցում ասաց, որ ձմեռային զորակոչի ընթացքում հասարակական խորհուրդը քաղաքացիներից ստացել է շուրջ 50 դիմում-բողոք, բայց դիմումների թիվը չի բացառվում, որ կավելանա: 

Ըստ նրա՝ յուրաքանչյուր զորակոչի ժամանակ Հանձնաժողովին ներկայացվում է  150-200 դիմում-բողոք,   ռեկորդային թվով դիմումներ ստացել են 2014 թվականի ամառային զորակոչին՝ 316 դիմում-բողոք:

Առողջական խնդիրների մեջ առավել տարածված են մի խումբ հիվանդություններ, որոնք զորակոչից զորակոչ անընդհատ արձանագրում են: Դրանց մեծ մասը, ըստ Գ.Հարությունյանի, վերաբերում են սրտի, ակնաբուժական և հենաշարժողական համակարգի հետ կապված խնդիրներն: Վերջին շրջանում ավելացել են նաև հոգեկան խնդիրների հետ կապված դիմումները:

Նիստում քննարկվող դիմումներից մեկը ներկայացրել էր Արմավիրի մարզի բնակիչ  Արուսյակ Պետրոսովան:  Նա գտնում է, որ 1999 թվականին ծնված որդու՝ Սերժիկ Քամալյանի առողջական խնդիրներն ավելի լուրջ են, քանի արտացոլված են կատարված բուժհետազոտությունների տվյալներում: Մասնավորապես, ըստ Արուսյակի, որդին ողնաշարի կրծքագոտային շրջանում ունի ցավեր, աչքերի, շնչառության խնդիրներ, սրտխառնոց, ձեռքերի դող, որը հատկապես արտահայտվում է ֆիզիկական աշխատանքից հետո, ցածր աշխատունակություն, հարթաթաթություն:

Նրա մոտ ախտորոշվել է «կիֆոզ», հարթաթաթությունը, որը երկկողմանի-երկայնակի է՝ առանց ֆունկցիայի խանգարման, ողնաշարի օստրիոխոնդրոզ՝ անցողիկ ցավային համախտանիշով:

«Ես համաձայն չեմ այդ տվյալների հետ: Չափազանց մեղմ են ամեն ինչ ձևակերպել, որ անզեն աչքով նայում ես երեխայի ողնաշարին, տեսնում ես, որ խնդիր կա, հարթաթաթ է, դժվար է շնչում»,- իր բողոքը ներկայացրեց մայրը:

Հանձնաժողովի նախագահ Գեղամ Հարությունյանը հետաքրքրվեց՝ մինչև զորակոչային տարիքի հասնելն այլ հետազոտություններ արվե՞լ են, որտեղ տղայի մոր նշած խնդիրները երևում են:

«Դուք ասում եք, որ այդ հետազոտությունները օբյեկտիվ չեն արտացոլում Ձեր որդու առողջական վիճակը: Ի՞նչ հիմք ունեք չվստահելու այդ բժշկական հետազոտությունների արդյունքներին»,- ասաց Գեղամ Հարությունյանը:

Արուսյակ Պետրոսովան նշեց, որ մինչև այդ բժշկի չեն դիմել. «Բավարար ուշադրության արժանացել ենք, բայց ոչ՝ բուժման»:

Հանձնաժողովի մասնագետները զննեցին զինակոչիկին և եզրակացեցին, որ ընդունված չափանիշներով կիֆոզը պետք է լինի  61 աստիճան, որ տարկետման հարց բարձրացնեն, մինչդեռ Սերժիկ Քամալյանի մոտ ախտորոշված կիֆոզը 42 աստիճան է:

Այսպիսով, որոշվեց, որ նա պիտանի է զինվորական ծառայության:

Գեղամ Հարությունյանի խոսքերով՝ եթե երեխան ունի խնդիրներ, ապա ծնողը երեխային բուժելու համար ցանկացած միջոց կգտնի: Բացի այդ,  կառավարության համապատասխան որոշմամբ՝ նախազորակոչային և զորակոչային տարիքի տղաները ենթակա են անվճար բուժման, այսինքն՝ ծնողը կարող էր օգտվել նաև այդ հնարավորությունից.  «Այս դեպքում մենք որևէ հիմք չունենք չվստահելու հետազոտության արդյունքներին, ծնողն էլ այդ հիմքերը չի տալիս, ընդամենն ասում եք՝ վատ է, ճիշտ չէ և այլն: Այս հետազոտությունները փաստում են, որ տղան ենթակա է ծառայության»: