Ձեր վստահելի աղբյուրը

Առաջիկայում Հայաստանում հանրային սննդի կետերի վրա տեսանելի կլինի որակավորման մասին նշաններ: Սմայլիկնե՞ր, գունավոր պիտակնե՞ր, թե՞ մեկ այլ բան, Սննդամթերքի անվտանգության պետական ծառայության մասնագետները դեռ չեն որոշել: Մինչ այդ դեռ հսկայածավալ աշխատանք կա:

Զարգացած երկրներում քաղաքացիները միս գնելիս գիտեն, թե մորթված անասունը քանի՞ տարեկան, ի՞նչ սեռի է եղել, գիտեն, վաճառվող մսի ճարպի հաստությունը, կամ էլ վաճառվող ձվի դեղնուցի մգությունը, դիրքը, ռեստորանների վրա էլ փակցված են ռեյտինգի մասին վկայող նշաններ: Հայաստանում այս առումով պատկերը տխրեցնող է ու մտահոգիչ:

Սպառողը չգիտի՝ գնած ապրանքը ձիո՞ւ, թե՞ կովի միս է, էլ չենք խոսում անասունի տարիքի մասին:  Ռեյթինգավորման մեկնարկի մասին ՍԱՊԾ-ում այս տարի առաջին անգամ են բարձրաձայնում: Սննդամթերքի անվտանգության ապահովումը տնտեսվարողների համար պարտադիր պայման է, իսկ որակավորմանը վերաբերող հարցաթերթիկների լրացումը՝ կամավոր:

«Որակավորման նպատակը սպառողին գիտակցված ընտրության հնարավորություն տալն է, սպառողը պետք է իմանա, թե արտաքինից միանման թվացող երկու ապրանքի համար ինչու է տարբեր գին վճարում»,-ասաց ՍԱՊԾ տվյալների վերլուծության ու խորհրդատվության բաժնի պետ Դիանա Միրզոյանը՝ Ծաղկաձորում անցակցված «Սննդամթերքի անվտանգության ոլորտում իրականացվող ծրագրերի լուսաբանում» թեմայով սեմինարի ժամանակ:

Ռեյթինգավորման առաջին քայլը արտադրության՝ մասնավորապես մսամթերքի արտադրության ոլորտում է: Հենց այստեղ բախվել են առաջին դժվարությանը, ծառայության տվյալների բազայում տնտեսվարողների մասին տվյալները հնացած են: Պարզվել է, որ բազայում եղած 72 տնտեսվարողներից շատերը հիմա այլ ոլորտում են  կամ էլ ընդհանրապես չեն գործում: Մսամթերքի արտադրության ոլորտում պիլոտային ծրագրից հետո այժմ արդյունքներն են ամփոփում: Իսկ մինչ այդ պիլոտային նոր ծրագիր են սկսել կաթնամթերքի արտադրության ոլորտում:

«Մսամթերքի արտադրության ոլորտի մի քանի տնտեսվարողներ հրաժարվել են հարցաթերթիկները լրացնելուց: Մենք ոչ մեկի չենք ստիպել, բացատրել ենք, ընտրությունը կամավորության սկզբունքով է եղել»,-ասաց Դ. Միրզոյանը:

Թե ինչ որակավորում կստանան արտադրողները, առաջինը կիմանան ծառայությունում ու ծրագրի իրականացման գործում իրենց հետ համագործակցող «Տնտեսական հետազոտությունների և զարգացման աջակցության կենտրոն» ՀԿ-ում, իսկ ավելի ուշ դրանք հայտնի կդառնան սպառողներին:

«Եթե ասենք, որ այս տարվա վերջին սպառողներն արդեն կիմանան տնտեսվարողների որակավորման մասին, սուտ կլինի, անելիքները դեռ շատ են, հստակ ժամանակ ասելը՝ դժվար»,-նշեց Դ. Միրզոյանը:

Հիշեցնենք, որ սեմինարն անցկացվում էր «Անասնապահության զարգացումը Հայաստանի հարավում» ծրագրի աջակցությամբ: Այն իրականացվում է «Ռազմավարական զարգացման գործակալություն» ՀԿ-ի և  ֆինանսավորվում «Շվեյցարիայի զարգացման և համագործակցության գործակալության» կողմից: