Ձեր վստահելի աղբյուրը

Ազգային ժողովում հունվարի 23-ին «Առանձին ապրանքատեսակների գների բարձրացման պատճառները և գնաճը մեղմելու հնարավորությունները» թեմայով հրավիրված լսումների ժամանակ պաշտոնյաները ներկայացրեցին գնաճի պատճառները՝  նշելով, որ այն համընկել է կանխատեսմանը և կազմել է 2.6 %:

Լսումներին մասնակցում էին նաև տնտեսագիտական կենտրոնների, հասարակական կազմակերպությունների ներկայացուցիչներ, որոնք  ներկայացրեցին գնաճը մեղմելու իրենց առաջարկները: «Այլընտրանք» հետազոտական կենտրոնի ղեկավար Թաթուլ Մանասերյանը, սակայն չի կարծում, որ այդ առաջարկների հետ պաշտոնյաները հաշվի կնստեն:

«Հաշվի նստելը ֆանտաստիկայի ոլորտից է, քանի որ, որպես կանոն, պետական պաշտոնյաները կարիք չունեն խորհրդի կամ առաջարկների, ընդհանրապես տնտեսագիտական միտքը, կարծես թե, պահանջված չէ, գոնե այդ տպավորություն եմ ստացել այս տարիների ընթացքում:   Եթե նույնիսկ օգտվում են այդ առաջարկներից, ապա կիսատ-պռատ, մասնակի և դա չի կարող  արմատապես փոխել իրավիճակը»,- Panorama.am-ի թղթակցի հետ զրույցում ասաց տնտեսագետը:

Ներկայացնելով իր առաջարկները՝ Թաթուլ Մանասերյանը նշեց, որ Հայաստանում գնաճր մեղմելու և տնտեսությունը զարգացնելու համար առաջին հերթին պետք է մեղմել գերշահույթ ստացողների ախորժակը, այսինքն՝ կառավարությունը պետք է այստեղ լուրջ քայլեր ձեռնարկի:
Հաջորդ առաջարկն, ըստ տնտեսագետի այն է, որ կառավարությունը պետք է զարգացնի տեղական արտադրությունը. «Եթե Հայաստանն ինքնաբավ լինի առաջին անհրաժեշտության ապրանքների  մեծ մասի գծով, ապա գնաճը բնավ խնդիր չի լինի»:

Թաթուլ Մանասերյանի խոսքով՝ կարևոր է նաև եկամուտների բարձրացումը: Ըստ նրա՝ գնաճ բոլոր երկրներում կա, բայց թանկացումների դեմ բողոքներ չեն լինում այն երկրներում, որտեղ գնաճի տոկոսի չափով ինդեքսավորում են աշխատավարձերը, արդյունքում, հասարակության համար գնաճը տանելի է դառնում:

«Հայաստանում խնդիրները շատ են նաև այն պատճառով, որ հայտարարվել է՝ 2018թ-ին նվազագույն աշխատվարձի, կենսաթոշակների աճ չի կարող լինել, ուստի, բնական է, մարդկանց դժգոհությունը: Ինչպես լսու,ներին  նշեցի, 2004 թ-ին ընդունված «Կենսաապահովման նվազագույն զամբյուղի և Կենսաապահովման նվազագույն բյուջեի մասին» օրենքը մինչ օրս չի կատարվում: Օրենքով ամրագրված է՝ աշխատավարձի և կենսաթոշակի նվազագույն չափ սահմանել նվազագույն սպառողական զամբյուղին համարժեք գումարը, բայց  դա այդպես չէ»,- նշեց Թաթուլ Մանասերյանը:

Պաշտոնական տվյալներով՝  2017 թվականին Հայաստանում արձանագրվել է 2.6 տոկոս գնաճ, բայց դա, ըստ նրա,  միջինացված է, քանի որ վերաբերում է մոտ 500 ապրանքախմբերին.  «Պետք է ազնիվ լինել մարդկանց հետ: 500 ապրանքատեսակները կարող են հաշվարկել որպես սպառողական գների ինդեքս, բայց դրա հետ միասին հանրությանը պետք է ներկայացնեն այն 10 ապրանքախմբերի գների դինամիկան, որոնք գտնվում են կենսաապահովման զամբյուղում»:

Թաթուլ Մանասերյանն անդրադառնալով նաև որոշ պետական պաշտոնյաների հայտարարություններին՝ նշեց, որ ցանկացած պաշտոնյայի հայտարարություն պետք է հիմնավոր լինի, քանի որ երբ պետական չինովնիկը խոսում է, պետք է ցանկացած բառի համար պատասխանատվություն կրի:

«Ըստ մամուլի հրապարակումների՝  «Հայաստան-Սփյուռք» 6-րդ համահայկական համաժողովի ժամանակ Ռազմավարական նախաձեռնությունների կենտրոնի գործադիր տնօրեն, վարչապետի խորհրդական Ալեքսանդր Խաչատուրյանը հայտարարել է, որ 2018 թ-ին 25 տոկոսով միջին աշխատավարձերը կբաձրանան: Կարծում եմ, որ այդ չինովնիկին պետք է պատասխանատվության ենթարկել, քանի որ աշխատավարձի բարձրացում չկա, բացի այդ, որոշակի սպասումները ևս  գնաճի վրա ազդեցություն են թողնում: Իսկ եթե նա այդպիսի բան չի ասել, ապա պետք է հերքում պահանջեր»,- նշեց տնտեսագետը միաժամանակ հավելելով, որ եթե նա նկատի է ունեցել, որ 25 տոկոսով միջին աշխատավարձերի բաձրացումը նախատեսված է 2017-2022 թթ-ի կառավարության ծրագրով, ապա այս տարի ևս  պետք է աշխատավարձի որոշակի բարձրացում լիներ, ինչը չկա: Բացի այդ, ըստ Թաթուլ Մանասերյանի, Ռազմավարական նախաձեռնությունների կենտրոնը երկրում առկա խնդիրնների,  այդ թվում՝ գնաճի դեպքում, պարտավոր է ուղիներ որոնել, բացատրություն տալ, քանի որ դրա համար այնտեղ յոթանիշ թվերով աշխատավարձ են ստանում: «Մինչև 2017թ-ի վերջը խոստացել էին ներկայացնել մի քանի ծրագիր, բայց ո՞ւր են դրանք: Ես՝ որպես հարկատու, կուզեի որ հաշվետու լինեն և ներկայացնեն, թե ինչ են անում»,- ընդգծեց նա: