Ձեր վստահելի աղբյուրը

Կարեն Դեմիրճյանի անվան մարզահամերգային համալիրը գնելու առաջարկ դեռևս չի եղել: Այս մասին այսօր լրագրողների հետ հանդիպման ժամանակ ասաց Պետական գույքի կառավարման վարչության պետ Արման Սահակյանը:

Նրա խոսքով՝ Մարզահամերգային համալիրն այսօր իր գործառույթների շրջանակներում իրականացնում է աշխատանքներ:

Նշենք, որ 2016 թվականին Մարզահամերգային համալիրի կառավարումը վերապահվել է Պետգույքի կառավարման վարչությանը: Դրանից ամիսներ անց՝ Պետգույքի վարչության պետը Ազգային ժողովում  հայտարարել էր, որ Կ. Դեմիրճյանի անվան մարզահամերգային համալիրը պետք է մասնավորեցվի, քանի որ այդ շենքը պահելը պետության համար բավականին մեծ ծախսեր է ներկայացնում:

Արման Սահակյանն այսօր էլ նույն կարծիքն է: 

«Իրականում մարզահամերգային համալիրը պետության վրա բավականին թանկ է նստում, մինչ այժմ ոչ մի տեսակի առաջարկություն չկա: Եթե կլինեն համապատասխան առաջարկություններ, ապա հանրությունը դրա մասին կիրազեկվի», - ընդգծեց նա:

Լրագրողը հիշեցրեց՝ ժամանակին վարչության պետն ասել էր, որ դեռ լավ ուզող չկա, լավ գին տվող չկա,  Արման Սակահյանը նորից նշեց, որ ոչ մի ներդրող դեռ չի հայտնվել. «Այս պահին ուզող չկա»:
Խոսելով Երիտասարդական պալատի շենքի և «Զվարթնոց» օդանավակայանի մասին՝  Արման Սահակյանը նշեց, որ նախկին Երիտասարդական պալատի շենքը պետգույքի մասնավորեցման կամ սեփականաշնորհման գործընթաց չի անցել, և երբևէ կապ չի ունեցել Պետգույքի վարչության հետ: 

Այն, ըստ նրա, ժամանակին օտարվել է սնանկացման գործընթացով:Անդրադառնալով «Զվարթնոց»-ին՝ վարչության պետն ասաց, որ օդանավակայանը հանձնված է կոնցեսիոն կառավարման և տվյալ հարցին լավագույն պատասխանները տալիս են Քաղաքաշինության պետական կոմիտեն ու Երևանի քաղաքապետարանը:

«Դա մեր գործառույթներին չի առնչվում»,- ընդգծեց նա:

Ինչ վերաբերում է Գիտությունների ազգային ակադեմիայի շենքին, ապա Պետգույքի վարչության պետն ասաց, որ այն երբեք չի վաճառվելու։