Ձեր վստահելի աղբյուրը

Վրաստանը մշտապես բալանսավորված քաղաքականություն է վարել հարևանների հետ, ինչը նշանակում է, որ այդ երկիրը հանդես է գալիս անկողմնակալ, հավասարակշռված դիրքերից։ 2012 թվականին որդեգրված այդ քաղաքականությունը շարունակվում է նաև այժմ։ Քաղաքական կուրսն այս առումով նույնն է մնացել։ Panorama.am-ի թղթակցի հետ զրույցում նման տեսակետ հայտնեց վրացագետ Ալիկ Էրոյանցը՝ անդրադառնալով Վրաստանի նախագահ Գեորգի Մարգվելաշվիլի՝ Արցախյան հակամարտության նկատմամբ չեզոք դիրքորոշմանը և ադրբեջանցի երիտասարդի խնդրանքը մերժելուն՝ մեկ րոպե լռությամբ հարգել «Խոջալուի զոհերի» հիշատակը։

Նրա խոսքով, Մարգվելաշվիլիի կողմից նման մոտեցումը բնական է։

«Վրացական մամուլում հայ-ադրբեջանական հակամարտության մասին վերջին շրջանի հրապարակումներում՝ թե պաշտոնական դիրքորոշումներում, թե փորձագիտական կարծիքներում, ևս չեզոքություն է պահպանվում։ Հատկապես փորձագիտական շրջանակները գտնում են, որ Վրաստանը պետք է մշտապես պահպանի այդ չեզոքությունը», -նշեց մեր զրուցակիցը։

Անդրադառնալով Մարգվելաշվիլիի այն հայտարարությանը, որ Վրաստանը հետևում է հակամարտության շուրջ իրավիճակին և կողմ է խնդրի խաղաղ կարգավորմանը, Ալիկ Էրոյանցը համոզմունք հայտնեց, որ Արցախյան հակամարտության շուրջ վրացական դիրքորոշումը տեղավորվում է չեզոքության և շրջահայացության տրամաբանության մեջ։

«Մարգվելաշվիլին նշել է, որ գուցե իրենք այս կամ այն հարցի առնչությամբ անձնական համոզմունք ունեն, սակայն լրացուցիչ սրություն կամ այլակարծություն մտցնելու նպատակ ամենևին չունեն։ Սա շատ կարևոր է, քանի որ այս կամ այն կողմի դիրքորոշումը պաշտպանելը ներկայիս լարված իրավիճակում չի բխում ոչ վրացական, ոչ հայկական, ոչ էլ ադրբեջանական շահերից»,- ամփոփեց վրացագետը։

Վրացագետ Ջոնի Մելիքյանն էլ մեզ հետ զրույցում նկատեց՝ Վրաստանը պարբերաբար հայտարարում է, որ կողմ է հակամարտության խաղաղ կարգավորմանը։
Ինչ վերաբերում է Վրաստանի նախագահի կողմից ադրբեջանցի երիտասարդի խնդրանքը մերժելուն՝ մեկ րոպե լռությամբ հարգել «Խոջալուի զոհերի» հիշատակը, Մելիքյանն այն համարժեք վերաբերմունք որակեց։ 

«Նախ, պաշտոնական մոտեցում ցուցաբերվեց, որ Վրաստանը կողմնակից է ղարաբաղյան հակամարտության խաղաղ կարգավորմանը։ Մարգվելաշվիլիի վերաբերմունքը շատ ադեկվատ և մտածված  է և միանգամից մի քանի թիրախ է հետապնդում՝ մեսիջ Բաքվին, ինչպես նաև վրացահայ համայնքին՝ սպասվելիք նախագահական ընտրություններին  ընդառաջ շահելու նրա բարեհաճ վերաբերմունքը»,- ամփոփեց Ջոնի Մելիքյանը։

Հիշեցնենք, որ Մառնեուլում ադրբեջանցիների հետ հանդիպման ժամանակ Վրաստանի նախագահ Գեորգի Մարգվելաշվիլին հայտարարել է՝ Վրաստանը դեմ է Լեռնային Ղարաբաղի հակամարտության սրացմանը:

Վերջինս նշել է, որ հետևում է հակամարտության շուրջ իրավիճակին և ընդգծել, որ Վրաստանը կողմ է հակամարտության խաղաղ կարգավորմանը: ․

Հանդիպման ներկա երիտասարդ մասնակիցներից մեկը Վրաստանի նախագահին խնդրել է մեկ րոպե լռությամբ հարգել «Խոջալուի զոհերի» հիշատակը, ինչը, սակայն, Վրաստանի նախագահը չի արել: