Ձեր վստահելի աղբյուրը

Սերժ Սարգսյանը Հայաստանի քաղաքական պրակտիկայում միակ մարդն է, որը քաղաքական հզորագույն ուժի լիդերն է և մասնակցել է մեր պետության բոլոր գործընթացներին՝ և անկախությանը, և Արցախյան պատերազմին, և արտաքին քաղաքականությանը։ ԱԺ-ում լրագրողների հետ զրույցում այս մասին ասաց ՀՀԿ խմբակցության պատգամավոր Գալուստ Սահակյանը։

«Մի խոսքով, նա անձնավորություն է, որը կկարողանա այդ գործն ավելի ռեալ առաջ տանել»,- ասաց հանրապետական գործիչը։

Ինչ վերաբերում է Սերժ Սարգսյանի այն հայտարարությունը, որ ինքը չի հավակնում կրկին ստանձնեու պետության ղեկավարի պաշտոնը, մինչդեռ Հանրապետական կուսակցությունը ցանկանում է նրան տեսնել պետության առաջնորդի դերում՝ այսպիսով կարծես ստիպելով դրժել խոստումը, Գալուստ Սահակյանը նկատեց. «Ես չեմ կարծում, որ Սերժ Սարգսյանը դրժել է իր խոսքը։ Դա քաղաքական հայտարարություն է։ Իրոք, նա այդ հայտարարությունը կատարել է, իրոք, առաջիկայում որևէ խնդիր չէր տեսնում։  Այս պահին մենք այլ թեկնածու չունենք, դրա համար կարծում եմ, որ կուսակցությույն իր խոսքը պետք է ներկայացնի։ Այս պահին ՀՀԿ-ն որևէ մեկի թեկնածությունը չի քննարկել։ Ես գտնում եմ, որ այսօրվա նախագահը կարող է ամենալավագույն վարչապետը լինել»։

Գալուստ Սահակյանը նաև նշեց, որ չի մտածել՝ ինչ կլինի այն բանից հետո, երբ Սերժ Սարգսյանը չցանկանա դառնալ ՀՀ վարչապետ։

Հարցին՝ ի՞նչ սխալներ է թույլ տվել ՀՀ վարչապետ Կարեն Կարապետյանը, որ կոնկրետ ինքը չի ցանկանում նրան տեսնել հաջորդ վարչապետի դերում, Գալուստ Սահակյանն ընդգծեց, որ վերջինս սխալներ թույլ չի տվել, ավելին՝ շատ լավ աշխատել է։

«Հաջորդ վարչապետը ոչ միայն երկրի վարչապետն է լինելու, այլև քաղաքական գործընթացների կարգավորողը, այսինքն՝ պիտի այնպիսի ճանապարհ անցած լինի, որ կարողանա քաղաքական գործունեությունը կարգավորել։ Ես չեմ կարծում, որ Կարեն Կարապետյանը անհրաժեշտ պաշտոն չի կարողանա ունենալ»,- ասաց պատգամավորը։

Խորհրդարանականը նաև համոզմունք հայտնեց, որ հայ ժողովրդի մեջ ընդդիմադիր ճամբար չկա։ Ժողովուրդը պարզապես ուզում է լավ ապրել։ «Իսկ լավ ապրելու համար ինքը՝ ժողովուրդը, պետք է կարողանա հաղթահարել։ Դա միայն իշխանություններով չի»,- ասաց նա։

«Ելք խմբակցության՝ փողոցային հնարավոր պայքարի թեմային էլ անդրադառնալով՝ Գալուստ Սահակյանը շեշտեց՝ այն իշխանությունը, որը տեղական ընտրություններին իշխանություն է ձեռք բերել, կարող է ժողովուրդ հավաքել, իսկ մնացած բոլոր կուսակցությունները, որոնք Հայաստանի մասին երազներ են ներկայացնում, ժողովուրդ հավաքել չեն կարող։

«Ընդամենը մարդկանց հավաքում են, հետո նույն ձևով գնում տուն։ Մեր ժողովուրդն ընդդիմադիր ժողովուրդ չի, նա ուզում է լավ ապրել, իր սառնարանում լիքը ապրանք լինի, տնեցիք լավ ապրեն։ Սա է մեր ժողովրդի վիճակը։ Ժամանակը ցույց տվեց, որ փողոց դուրս գալով որևէ բանի չի հասնելու»,- ամփոփեց ՀՀԿ-ական գործիչը։