Ձեր վստահելի աղբյուրը

Փետրվարյան տաք օրերի արդյունքում այսօր հանրապետությունում ծաղկած ծիրանենիներ ու նշենիներ կան: Նախորդ տարվա համեմատ գյուղատնտեսական տարին 30-35 օր առաջ է: Նորմայի համաձայն, ծառերը պետք է սկսեին ծաղկել  մոտ 20 օրից:

Կոկոներն առաջինը պայթել են ամենահարավում՝ Մեղրիում,  ապա տարածվել դեպի Արարատյան դաշտավար՝ Սուրենավան, Արմաշ, Մասիս, Էջմիածնի, Արմավիրի  տարածաշրջանների գյուղեր:  Գյուղատնտեսության նախարարությունում մտոհոգվելու առիթ այս պահին չեն տեսնում:

Panorama.am-ի   հետ զրույցում գյուղատնտեսության փոխնախարար Աշոտ Հարությունյանն ասում է՝ ամեն օր ԱԻՆ հիդրոմետ ծառայությունից ստանում են եղանակի կանխատեսումների վերաբերյալ տեղեկանքներ:

«Ճիշտ է՝ առաջիկա 2-3 օրերին ջերմաստիճանը կնվազի, սակայն կարևորը բացասական չի լինի: Տեղումների մասով էլ անհագստանալու առիթ չկա»,-բացատրում է ոլորտի մասնագետը:
Ցրտահարության վտանգ կարող է լինել, երբ տևական ժամանակ գրանցվի -4 և դրանից ցածր ջերմաստիճան: Օդերևութաբաների կանխատեսումների համաձայն, 0-ից ցածր ջերմաստիճան կգրանցվի  լեռնային ու նախալեռնային շրջաններում միայն գիշերները:

Մի քանի օր առաջ տեղացած անձրևն էլ փոշոտմանը չի վնասել, ծաղիկները նոր են բացվել:
«Պետք է ասեմ, որ ծաղիկների 15 տոկոսն է փոշոտվում ու պտուղ տալիս: Այս պահին շատ են ռեզերվային ծաղիկները, դրանք դեռ կբացվեն: Նույն ծառի ոչ բոլոր ծաղիկներն են միաժամանակ բացվում: Բացի այդ էլ տեղումներն այնքան առատ չէին, որ խանգարեին փոշոտմանը: Հակառակը, օդում հարաբերական խոնավությունն արևոտ օրերին նպաստում է դրան»,-մանրամասնում է Ա. Հարությունյանը:

Ոլորտի պատասխանատուները դրական են տրամադրված, մարտին, ապրիլին, մայիսին միջինից բարձր տեղումների վերաբերյալ կանխատեսումներն  ուրախացնում են, ջրամբարներում անհրաժեշտ քանակությամբ ջուր կկարողանան կուտակել:

«Ուզում եմ հավատալ, որ ունենալու ենք լավ գյուղատնտեսական տարի: Հուսանք, որ տեղումների արդյունքում լեռնային, նախալեռնային շրջաններում անջրդի հողերում ջրի խնդիր չենք ունենա,  տեղումների շնորհիվ էլ  ջրամբարներում ջրի համապատասխան քանակ կլինի,  ոռոգվող Արարատյան հարթավայրում էլ դրա արդյունքում խնդիր չի լինի»:

Այս պահին ոռոգման խնդիրը լուրջ է հատկապես Արմավիրի տարածաշրջանի գյուղերում, դրան լուծում տալում համար լրացուցիչ հորերի շահագործման ծրագրեր  են իրականացվում: