Ռեյթինգավորումը հնարավորություն կտա սպառողներին տարբերակել լավ և վատ սնունդ արտադրողներին. Վահե Դանիելյան
Հայաստանում սննդի շղթայի օպերատորների ռեյթինգավորումը հնարավորություն կտա դասակարգել արտադրողներին՝ ըստ իրենց վարկանիշի։ Այսօր «Սննդի շղթայի օպեատորների ռեյտինգավորման համակարգի ներդրման» վերաբերյալ աշխատաժողովի ժամանակ ասաց Հայաստանի սննդի անվտանգության և որակի հսկողության տեսչության պետ Վահե Դանիելյանը՝ շեշտելով, որ սպառողներն առաջիկայում կկարողանան հենց խանութում տարբերակել լավ և ոչ այնքան լավ սնունդը։
«Ծրագիրը ներդրված է եղել ՀՀ կառավարության միջոցառումների ծրագրով: Եվ մենք արդեն սկսել ենք դեռևս պիլոտային ծրագրի իրականացումը: Այն հնարավորություն կտա դասակարգել արտադրողներին և տնտեսվարող սուբյեկտներին ըստ իրենց ռեյթինգի: Այն կներառի թե որակի կառավարման համակարգերի ներդրում, թե արտադրական գործընթացների ավտոմատացում: Կունենանք համակարգ, որտեղ բոլոր տնտեսվարողները չեն դիտարկվի մեկ հարթության վրա թե պետական վերահսկողության տեսանկյունից, թե սպառողի աչքերով»,-նշեց Վահե Դանիելյանը։
Նա նկատեց նաև, որ ծրագիրը նաև տնտեսվարողների միջև կառաջացնի մրցակցություն՝ ձգտելու բարելավել իրենց արտադրանքի որակն ու դիրքերը:
Նա մանրամասնեց, որ համակարգի վերջնական ներդրման մասին խոսելը դեռևս վաղ է. «Ներկայումս ամփոփվում են պիլոտային ծրագրով մսամթերքի արտադրության ոլորտում իրականացված աշխատանքները: Եվ դրա բարեհաջող ավարտից հետո կկիրառվի նաև այլ ոլորտներում: Աշխատանքները նախատեսվում են մինչ 2020 թվական։ Հետագայում նախատեսում ենք սպառողներին այդ տեղեկատվությունը հասանելի դարձնել, որպեսզի նրանք հասկանան, թե որ տնտեսվարող սուբյեկտն ինչ ռեյթինգավորման աստիճան ունի: Նախ սպառողներին կտեղեկացնենք մեր կայքի միջոցով»:
Աշխատաժողովին ներկա ՊԳԿ սննդի անվտանգության և սպառողների պաշտպանության հարցերով պատասխանատու Մերի Քեննին պատմեց, որ այս համակարգը ներդրվել է արդեն Միացյալ Թագավորությունում և Դանիայում:
«Ընդհանրապես սննդի արտադրողների ռեյթինգավորման համակարգը ներդրվում է սանիտարահիգիենիկ պահանջների կատարման վերաբերյալ տեղեկատվությունն իմանալու և այն սպառողներին տրամադրելու համար: Այդ երկրներում տեղեկատվությւոնը հավաքվում է հասարակական սննդի օբյեկտներից՝ ռեստորաններից, սրճարաններից, մանրածախ առևտրով զբաղվող խանութներից: Պետք է նշենք, որ սա հիմա իրականացվում է այն համագործակցության շրջանակում, որ Հայաստանի Սննդի ավտանգության պետական տեսչությունն ունի ՄԱԿ-ի պարենի և գյուղատնտեսության կազմակերպության հետ: Այս պիլոտային նախաձեռնության շրջանակում մենք աշխատելու ենք, որ մի կողմից հնարավորություններ ընձեռվեն պետական մարմիններին իրականացնելու այցեր և ստուգումներ, մյուս կողմից՝ խորացվի կապը սննդի բիզնեսների և պետական ծառայության միջև»,- ներկայացրեց Մերի Քեննին։
Նա հավելեց, որ իրենց նպատակն է հասնել այն բանին, որ Հայաստանում սննդի արտադրության ոլորտում ապահովվի սանիտարական պայմանների պատշաճ մակարդակ:
Հարակից հրապարակումներ`
- Հայաստանում սննդի ոլորտում գործող տնտեսվարողները կռեյթինգավորվեն
- ՍԱՊԾ. Կներդրվի ռեյթինգավորման համակարգ
Լրահոս
Տեսանյութեր
Հայաստանում փոքրահասակ բնակչության շրջանում բավականին տարածված է գժախոտով թունավորումը. Ռ. Աբովյան