Ձեր վստահելի աղբյուրը

20։30
Հանրահավաքի մասնակիցներին ողջունեց «Ելք» խմբակցության առաջնորդ Նիկոլ Փաշինյանը:

«ՀՀ հպարտ քաղաքացիներ, դուք հաղթել եք»: Նա խոսեց երեկ առավոտյան «Մարիոթ» հյուրանոցում իր և Սերժ Սարգսյանի հանդիպումից: «Սերժ Սարգսյանը հանդիպման կեսից թողեց ու հեռացավ: Այդ պահից ինձ համար հասկանալի էր, որ նա այլևս հեռացել է նաև վարչապետի պաշտոնից»,- ասաց նա:

Փաշինյանը նշեց, որ իրեն առևանգելուց հետո պահում էին մեկուսացման պայմաններում: Նա ասաց, որ իրեն մի քանի առաջարկ են արել, որ Սերժ Սարգսյանը հրաժարական տա հոկտեմբերին, մի քանի ամսից կամ ապրիլի 25-ին:

«Ես լսեցի նրանց բոլոր առաջարկները և արեցի իմ սեփական առաջարկը՝ ձեր անունից, ես ասացի՝ Սերժ Սարգսյանը պետք է հրաժարական տա երկու ժամվա ընթացքում, և նա հրաժարական տվեց»,- ասաց նա:

Փաշինյանը հիշեցրեց՝ իրենց առաջարկած օրակարգում ոչ թե մեկ, այլ մի քանի հարց էր դրված: Այդ օրակարգով Սերժ Սարգսյանի հրաժարականին հաջորդում էր մյուս քայլը, այն է՝ ԱԺ-ն վարչապետ է նշանակում ժողովրդի թեկնածուին, և դա, ըստ Փաշինյանի, պետք է տեղի ունենա առաջիկա մեկ շաբաթվա ընթացքում: Վարչապետի նշանակումից հետո, ըստ օրակարգի, ձևավորվում է ժամանակավոր կառավարություն, որից հետո հնարավոր ամենասեղմ տրամաբանական ժամկետներում պետք է տեղի ունենան արտահերթ խորհրդարանական ընտրություններ:

«Մենք պատրաստվում ենք չորեքշաբթի առավոտյան՝ 11-ին, Մարիոթում շարունակել բանակցությունները իշխանության անցնցում փոխանցման օրակարգի շուրջ՝ վարչապետի ժամանակավոր պաշտոնակատար Կարեն Կարապետյանի հետ»,- ասաց նա: Փաշինյանը նշեց՝ ցանկանում է՝ միանշանակ և աներկբա արձանագրեն՝ իրենց հռչակած թավշյա, ոչ բռնի, ժողովրդական հեղափոխությունը չի կարող կիսատ մնալ, այն պետք է մինչև վերջ տանել:

«Ես հույս ունեմ, որ բոլորդ կանգնած եք հանուն այդ վերջնական հաղթանակի: Եթե կարծում են, որ այս ամենի արդյունքում ստեղծվելու է մի իրավիօճակ, երբ իրենք շարունակեն ստվերային կառավարում իրականացնել, հորդորում եմ բոլորին՝ րոպե առաջ մոռանալ այդ միտքը, ժողովուրդը հաղթել է, և այդ հաղթանակը պետք է ճանաչվի անվերապահորեն, առանց նախապայմանների»,- ասաց նա:

Փաշինյանը նշեց՝ Հայաստանում ատելության մթնոլորտի էջը փակված է, և ներքաղաքական, ներհասարակական կյանքում ատելության և վենդետայի մթնոլորտը պետք է բացառել: Բոլոր նրանց, ովքեր կարծում են՝ սկսվելու է վրեժխնդրություն և վենդետա, և ճամպրուկներն են հավաքում՝ երկրից դուրս գնալու և կապիտալը երկրից տանելու համար, Փաշինյանը կոչ արեց չանել այդ բանը, որովհետև ատելություն, վրեժխնդրություն չի լինելու:

«ՀՀ-ում այս պահից սկսած հաստատվում է ազատության, եղբայրության, օրինականության, հավասարության և ազգային միասնականության մթնոլորտ»,- ասաց նա:

Փաշինյանը նաև շնորհակալություն հայտնեց ԼՂՀ իշխանություններին, որ ի հեճուկս տարածվող խուճապային լուրերի, այս իրավիճակում պահպանեցին կատարյալ զսպվածություն և չեզոքություն: Նա տեղեկացրեց, որ վարչապետի ժամանակավոր պաշտոնակատար Կարեն Կարապետյանի հետ հստակ պայմանավորվածություն կա՝ թավշյա հեղափոխության մասնակիցներից բոլոր նրանք, ովքեր անազատության մեջ են, պետք է ազատ արձակվեն: Նա հանրահավաքի մասնակիցներին կոչ արեց տհաճ միջադեպերից խուսափել:

Փաշինյանը նաև հորդորեց այս շարժման մեջ այլ հետքեր չփնտրել, քանի որ այն «ուղնուծուծով մաքուր, զտարյուն, հայկական թավշյա հեղափոխություն է», և որևէ այլ մեկնաբանություն չի կարող լինել:

Պատգամավորն ասաց, որ վաղը՝ ապրիլի 24-ին, իրենց բոլոր գործողությունները տեղավորում են օրվա խորհրդի համատեքստում. 15:00-ին Հանրապետության հրապարակից երթով շարժվելու են դեպի Ծիծեռնակաբերդ:

20։07
«Ելք» խմբակցության անդամ Սասուն Միքայելյանը նշեց՝ այս հաղթանակը բոլորինն է: «Ես միշտ ասել եմ՝ երբ ամեն հայ իր բաժին բեռը վերցնի, հաղթանակը կլինի, մենք այսօր հավատացինք և հաղթեցինք»,- ասաց նա:

Միքայելյանը ոստիկանության աշխատակիցներին շնորհակալություն հայտնեց՝ իրենց նկատմամբ վերաբերմունքի համար, շնորհակալություն հայտնեց նաև ՄԻՊ-ից և գրասենյակից, որ օբյեկտիվորեն հետևում էին այս ամենին և ամեն հարց լուծում էին:

Նա նաև դիմեց արցախահայությանը, նշեց, որ Արցախ աշխարհում իր մարտական մկրտությունը անցել է Մարտակերտի շրջանի Հաթերք գյուղում:

«Ես իմ մարտական ընկերներին միշտ ասել եմ՝ եթե զոհվեմ, Հաթերքի հողից պիտի բերեք, լցնեք ինձ վրա: Մենք այստեղ համախմբված պիտի լինենք, և դուք ազատ կլինեք առավել, քան երբևէ»,- ասաց նա: 
 

20։01
Դերասան Սամսոն Ստեփանյանը նշեց, որ այսօր Հայաստան է վերադարձել հույսը և հավատը, և ինքը հավատում է՝ վաղը ունենալու ենք հզոր Հայաստան, և յուրաքանչյուր քաղաքացի հպարտանալու է իշխանության ամեն մի անհատականությամբ, ով լինելու է խելացի և մտահոգ յուրաքանչյուր քաղաքացու համար: Դերասան Անդրանիկ Հարությունյանը էլ ողջունեց հանրահավաքի մասնակիցներին ու ասաց, որ կցանկանար՝ այսուհետ մեր մշակութային օջախներն այսպես լեփ-լեցուն լինեին:

19։52
ԱԺ պատգամավոր, «Ելք» խմբակցության անդամ Արարատ Միրզոյանը նշեց. «Երբ ես վառեցի ազատության ջահը ԱԺ-ում, ես երազում էի այսօրվա մասին, երազում էի, որ այն նորից վառեմ ու ձեզ ասեմ՝ կեցցեք դուք, դուք վառ պահեցիք ազատության ջահը»: Նա ասաց, որ ժողովուրդն իրենց էր մոտենում, շնորհակալություն հայտնում, մինչդեռ իրենք են շնորհակալ:

«Դուք արել եք անհնարինը, դա աննախադեպ է, աշխարհում նման բան չկա: Առանց ոչ մի բանի, բաց ձեռքերով դուք հաղթել եք»,- ասաց նա:

Միրզոյանը նշեց, որ դեռ շատ անելիքներ կան՝ օլիգարխները, բիզնեսմենները պետական իշխանության մեջ չեն լինելու, իրենք պիտի կարգավորեն ըտրական օրենսգիրքը և ընտրական համակարգը:

«Հայաստանում այսուհետ միայն ու միայն ազատ, արդար, թափանցիկ ընտրություններ պիտի լինեն, իշխանությունը ՀՀ քաղաքացիներից այլևս երբեք պետք է չխլվի, իշխանությունը ժողովրդինն է, և նա այդ իշխանությունը պետք է իրացնի ընտրությունների միջոցով»,- ասաց նա:

Միրզոյանը նշեց, որ պետք է քաղաքականությունը դուրս բերել դպրոցներից ու մանկապարտեզներից, ուսուցիչներն ու դաստիարակները պետք է զբաղվեն միայն ու միայն երեխաների դաստիարակությամբ ու կրթությամբ:

«Ոլորտ առ ոլորտ, քայլ առ քայլ, մեր ձեռքերով այս ձեռքերով պիտի կերտենք մեր երազանքների Հայաստանը»,- ասաց նա՝ կոչ անելով գնալ մինչև վերջ:

19։33
Հարթակից հանրահավաքի մասնակիցներին ողջունեց դերասան Հայկ Մարությանը՝ նրանց կոչելով «ընտանիքի անդամներ»: Նա նշեց, որ այս օրերին երբ իրեն հարցնում էին՝ «հետո ինչ է լինելու», ասում էր՝ «հետո»-ն լավ է լինելու:

«Սա սկիզբն է ճշմարիտ ճանապարհի, որը մեզ բերելու է պայծառ և ամուր Հայաստան: Նիկոլը այն մարդն է, որն ի սկզբանե հավատաց սրան, նա մենակ սկսեց դա՝ իր ուղեղում, իր թիմի հետ միասին, և այս բոլորով ավարտեցինք սա: Մենք մեծ անելիքներ ունենք, և համոզված եմ, որ մենք կանենք դա՝ ամեն մեկս մեր տեղում, սա ճանապարհի սկիզբն է՝ բառիս բուն իմաստով, բայց լավ ճանապարհի սկիզբ է»,- ասաց նա:

Մարությանը նաև դիմեց Ադրբեջանին՝ նշելով. մի ժողովուրդ, որ բաց ձեռքերով նման բաներ է անում, ուրեմն՝ ինչեր կանի, եթե հանկարծ զենք վերցնի ձեռքը:

«Թող մտքով անգամ չանցնի այս կողմ նայել»,- ասաց նա՝ վանկարկելով «Ազատ, անկախ Արցախ»:

19։28
Հարթակից ելույթի համար խոսքը տրվեց «Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանին, հայտարարվեց, որ նրանից հետո ելույթ կունենա դերասան Հայկ Մարությանը: Իոաննիսյանը կատակով նշեց. «Ես ինձ մի քիչ վատ եմ զգում, որ Հայկ Մարությանից խոսափողը տարա»:

Նա շնորհակալություն հայտնեց այս օրերին մշտապես իրենց կողքին գտնվող անձանց՝ փաստաբաններին ու լրագրողներին, մյուս քաղաքացիներին:

«Բոլոր այն մարդիկ, ովքեր քրական կամ վարչական հետապնդման են ենթարկվել, այդ հետապնդումները պետք է դադարեցվեն, բոլոր նրանց, ովքեր մեծ ներդրում են ունեցել, ֆուռերի վարորդներին, այդ մարդկանց ոչ միայն պետք է ծափահարել, առանձնակի ներդրում ունեցած շարքային քաղաքացիներին, լուրջ տուժած քաղաքացիներին պետք է հայրենիքին մատուցված ծառայությունների մեդալ տրվի»,- ասաց նա:

Իոաննիսյանը նշեց, թե չգիտե՝ երկու օր կամ մեկ շաբաթ հետո՝ ով է լինելու իշխանությունը կամ ինչպիսի իշխանություն ենք մենք ունենալու: Նրա խոսքն ընդհատվեց «Նի-կոլ» վանկարկումներով, ի պատասխան՝ Իոաննիսյանը նշեց, որ իր կարգավիճակն իրեն ստիպում է չեզոք մնալ, և ինքը չի կարող միանալ վանկարկումներին:

19։16
Երևանի ավագանու «Ելք» խմբակցության անդամ Արայիկ Հարությունյանը, դիմելով հանրահավաքի մասնակիցներին, ասաց. «Էս ինչ արեցիք, ժողովուրդ»: Նա նշեց՝ այսուհետ օլիգարխներ, դպրոցի դռներ փակողներ չեն լինելու: Հարությունյանն ասաց, որ այս օրերին եղել են բազմաթիվ բերման ենթարկվածներ, այս ժամերին նրանք բոլորը ազատ են արձակվում, բայց եթե կլինեն մարդիկ, ովքեր դեռ կմնան անազատության մեջ, խնդրեց՝ իրենց տեղյակ պահել այդ մասին: Ավագանու անդամը նշեց, որ այսպիսի համախմբվածություն Սփյուռքում երբեք չի եղել:

«Սերժ Սարգսյանն ասել էր, որ մինչև 2040 թ ունենալու ենք 4 մլն բնակչություն, նա մեզ օգնեց ու երևի մինչև 2030 թ. ենք մենք այդքան ունենալու»,- ասաց նա:

Հանրահավաքի մասնակիցները սկսեցին վանկարկել «հաղթանակ»:

Հարությունյանը նաև խոսեց իրեն մշտապես «ուղեկցող» ձեռնափայտի մասին:

«Սկզբում դժվարանում էի քայլել, այն օգնում էր ինձ, հետո ասացին՝ Մովսեսի փայտն է, որ ջուրն է բացելու, ասացի՝ ոստիկանական պատերն է բացելու և բացեց, սա գնալու է հեղափոխության թանգարան»,- ասաց նա:

19։03
Բեմահարթակից հանրահավաքի մասնակիցներին ողջունեց «Ցեղակրոն» կուսակցության առաջնորդ Շանթ Հարությունյանի որդին՝ Շահեն Հարությունյանը, ով նախաձեռնության կողքին է հենց սկզբից: Նա այս շրջանը պատմական համարեց, հիշեց՝ երբ բոլորով դուրս եկան պայքարի, բոլորը թերահավատորեն էին վերաբերվում, համենայն դեպս իրեն:

«Մենք արժանապատվորեն ապացուցեցինք, որ կարող ենք, որ ուժեղ ենք միասին, որ մենք ազատ ենք և ուզում ենք հզոր երկիր ունենալ: Այսօր մենք վերականգնեցինք վստահությունը մեր սեփական ուժերի նկատմամբ և հավատն առ հաղթանակ»,- ասաց նա:

18։53
Հանրապետության հրապարակում մեկնարկել է «Իմ քայլը» նախաձեռնության հանրահավաքը:

Հանրահավաքի մասնակիցների համար ընթերցեցին ժամեր առաջ վարչապետի պաշտոնից հրաժարական տված Սերժ Սարգսյանի կոչը:

Այսօր՝ հանրահավաքի ժամանակ, խոսելու են առաջիկա քայլերի մասին: