«Հակապետական քարոզչություն» խորհրդային դարձվածքը չի կարող համատեղվել ներկայի հետ. Դոյդոյան
Երկու օր առաջ ՀՀ վարչապետ Նիկոլ Փաշինյանն իր ֆեյսբուքում գրել էր. «Որոշ հեռուստաընկերություններ, փաստորեն, օգտվելով խոսքի ազատության անսահմանափակ հնարավորությունից՝ որոշել են հակապետական քարոզչություն իրականացնել»։
Դրանից հետո շատերը, մասնավորապես ԶԼՄ ներկայացուցիչները, փորձում են հասկանել՝ ո՞րն է հակապետական քարոզչությունը, մասնավորապես ում է դա վերաբերվում։ Երեկ էլ վարչապետը հայտարարեց, որ չի ցանկանում նշել լրատվամիջոցին, որն, իր խոսքով, հակապետական քարոզչություն է իրականացրել, չթիրախավելու նկատառումով. «Ես չեմ ուզում կոնկրետ հասցեավորեմ, կստացվի, որ ինչ-որ մեկին ուզում ենք թիրախավորել»։ Նա նաև նշել է, որ պարզապես ահազանգ, խնդրանք ու կոչ է հնչեցնում, որ այդպես չվարվեն:
Ինֆորմացիայի ազատության կենտրոնի նախագահ Շուշան Դոյդոյանից Panorama.am-ը հետաքրքրվեց, թե արդյոք լրատվամիջոցներին վերաբերող որևէ օրենքում կա սահմանում, թե որն է «հակապետական քարոզչությունը»։
«Հակապետական քարոզչություն իրավական կատեգորիա չկա։ Հակապետականի սահմանում, չափանիշ չկա»,- ասաց նա։
Հարցին, թե ի՞նչ պետք է հասկանալ նման հայտարարությունից, Շ. Դոյդոյանն ասաց. «Ոչինչ էլ այս փուլում պետք չէ հասկանալ։ Ուղղակի ինչ-որ զգացմունքային պոռթկում է արել։ Ես գոնե այդպես եմ գնահատում։ Հակապետական քարոզչություն կատեգորիա որպես այդպիսին նոր Հայաստանում՝ այսինքն 1991 թվականից հետո, լինել չի կարող։ Դա խորհրդային դարձվածք է, չի կարող համատեղվել ներկայի հետ։
Ընդհանրապես, ի՞նչ է նշանակում քարզոչություն։ Սովետական ժամանակաշրջանի հասկացություն է, երբ որ մի կուսակցության գաղափարախոսություն են քարոզում։ Նման բան ժողովրդավարական երկրում չի կարող լինել, որ մի հատ էլ հակապետական քարոզչություն լինի»։
Նրա խոսքով, պետք է զգույշ լինել նման կարևոր խնդրի վերաբերյալ այդպիսի արտահայտություններ անելիս։
«Հուսով եմ՝ ինքն իր սխալը հասկացել է, որ նման արտահայտությունները շատ լուրջ են ընկալվում մարդկանց կողմից։ Զգայուն թեմա է, հարց է, նման բաներ ասելիս... Ոնց որ հրահանգ դարձավ շատերի համար, ինչն անընդունելի է։
Շատ նուրբ, զգայուն թեմաների վերաբերյալ չի կարելի նման կատեգորիկ հայտարարություններ անել»,- հավելեց Ինֆորմացիայի ազատության կենտրոնի նախագահը։
Նախօրեին Խոսքի ազատության պաշտպանության կոմիտեն հայտարարություն էր տարածել՝ մասնավորապես նշելով. «...Այդուհանդերձ, ցանկացած իշխանություն պետք է առավել հանդուրժողական վերաբերմունք ցուցաբերի լրատվամիջոցների հրապարակումների և դրանցում տեղ գտած գնահատականների նկատմամբ։ Եվ այս առումով վարչապետ Նիկոլ Փաշինյանի գործածած «հակապետական քարոզչություն» և «մի’ արեք, պարզապես մի’ արեք» կոչը կարող է գնահատվել որպես միջամտություն հեռուստաընկերությունների գործունեությանը կառավարության ղեկավարի կողմից։ Թերևս տեղին կլիներ, եթե վարչապետը մատնանշեր իր նկատի ունեցած հեռուստաընկերությունների հաղորդումներում էթիկական նորմերի բացահայտ խախտումները և դիմեր ԶԼՄ-ների ինքնակարգավորման Դիտորդ մարմնին՝ փորձագիտական եզրակացություն ստանալու համար։ Սա լավագույն նախադեպը կարող էր դառնալ մեր հեղափոխական երկրում ԶԼՄ-ներին վերաբերող վեճերը լուծելու համար։ Ասածս թող ընդունվի որպես առաջարկ՝ և’ ներկա, և’ նախկին իշխանություններին»։
Խորհրդային տարիներին հակապետական գործունեություն ծավալելու մեղադրանքով շատերն են անցկացրել բանտերում: Իսկ 2010 թվականին ՍԻՄ նախագահ Հայկ Բաբուխանյանը հայտարարել էր, որ «Ժառանգությունը» հակապետական գործունեություն է ծավալում և պետք է փակել այդ կուսակցությունը: Ազգային ժողովում «Ժառանգություն» խմբակցության անդամ Արմեն Մարտիրոսյանն իր ելույթում հացադրում էր արել, թե ո՞րն է հակապետական գործունեությունը, ապա նշել. «Սեփական և ոչ թե անկախ, պետական օգտագործման դատական համակարգ և դրա արդյունքում քաղբանտարկյալներ ունենա՞լը, թե՞ այդ քաղբանտարկյալների իրավունքների համար պայքարելը, ընտրակեղծիքների համակարգը կատարելագործե՞լը, թե՞ ընտրակեղծիքների դեմ պայքարելը, տնտեսական համակարգը օլիգարխացնե՞լը, մոնոպոլացնե՞լը, թե՞ ազատ տնտեսական դաշտ պահանջելը»: Նա նաև նկատել էր, թե «որքան էլ փորձեք լռեցնել ճշմարտության ձայնը, միևնույն է, այն հնչելու է»։
Լրահոս
Տեսանյութեր
Արման Թաթոյանը միացավ Բագրատ Սրբազանի առաջնորդած քայլերթին
