Ձեր վստահելի աղբյուրը

Հայաստանի ազգային պոլիտեխնիկական համալսարանում այսօր մեկնարկեց  պաշտպանական համակարգում գիտահետազոտական աշխատանքների կատարման, դրանց արդյունավետ կիրառման, ինչպես նաև զորակոչիկների մասնագիտական կարողությունները պարտադիր զինվորական ծառայության ընթացքում ավելի արդյունավետ օգտագործելու նպատակով հայտարարված մրցույթի 1-ին` տրամաբանական թեստավորման փուլը:

Մրցույթին մասնակցում են 2018թ. ամառային զորակոչի ժամանակ զորակոչի ենթակա խորը մասնագիտական գիտելիքներ ու համապատասխան խնդիրներ լուծելու գործնական հմտություններ ունեցող զորակոչիկները՝ հետևյալ մասնագիտություններով. ֆիզիկա և ռադիոֆիզիկա,  օպտոէլեկտրոնիկա և ռադիոէլեկտրոնիկա,  նյութաբանություն և քիմիա,  կառավարման համակարգեր և տեղեկատվական տեխնոլոգիաներ, ռոբոտիկա և ԱԹՍ, մեքենաշինություն և սարքաշինություն:

ՀՀ պաշտպանության նախարարի տեղակալ Դավիթ Փախչանյանը լրագրողների հետ զրույցում ասաց, որ մրցույթն անցկացվելու է երեք փուլով. առաջին փուլում զորակոչիկները կհանձնեն տրամաբանական թեստ, երկրորդում՝ բանավոր մասնագիտական քննություն, երրորդը՝  հարցազրույցի փուլն է: 

Փոխնախարարը հայտնեց, որ լուրջ մրցակցություն է լինելու: Ըստ նրա՝ մրցույթին մասնակցելու համար դիմել է 156 զորակոչիկ, սակայն նրանցից վերջնական փուլ կանցնեն 18-ը:

Զորակոչիկները ծառայության կանցնեն Ռազմական ավիացիոն ինստիտուտում, երկու տարվա ծառայության ընթացքում զինծառայողները ներգրավված կլինեն գիտահետազոտական աշխատանքներում, կցված  կլինեն այն գիտահետազոտական ընկերություններին, որոնք պաշտպանության նախարարության հետ ունեն համապատասխան պայմանագրեր:
Դավիթ Փախչանյանը չբացառեց, որ լավագույները երկու տարվա ծառայությունից հետո կշարունակեն աշխատել ՊՆ-ում:

«Մինչ այս եղել են զինվորներ, որոնք ծառայության ընթացքում այնպիսի աշխատանքներ են կատարել, որ նույնիսկ 2000-3000 դոլար աշխատավարձով ստացող մասնագետը չէր կարողանա այդպիսի ախատանք կատարեր»,- ասաց փոխնախարարը:

Անդրադառնալով խոշոր զորամասերում «Թումո» կենտրոններ հիմնելու նախագծին, Դավիթ Փախչանյանն ասաց, որ այդ գաղափարն ուժի մեջ է:

«Պաշտպանության նախարար Դավիթ Տոնոյանը շատ կարևորում է, որ բանակից վերադառնալուց հետո զինծառայողների կրթական ցենզն ավելի բարձր լինի, քան մինչ բանակ գալն էր: Եւ «Թումո»-ի նման ծրագրերը զարգացնելու ենք: Այսինքն՝ այդ նախագիծն ուժի մեջ է»,- ընդգծեց փոխնախարարը: