Ձեր վստահելի աղբյուրը

«ՀՀ որոշ օրենքներ որոշ փոփոխությունների կարիք ունեն: Մասնավորապես, օրենքում  գրված է, որ ՀՀ նախագահը չի կարող երկուսից ավելի անվճար խորհրդական ունենալ: Բայց ինչու տասներկու կամ քսաներկու խորհրդական չի կարող ունենալ, եթե դա անվճար է: Ինչ կա դրա մեջ, որ հանրապետության նախագահն ունի խորհրդականներ՝ մանավանդ երիտասարդ, որոնց խորհուրդն ուզում է լսել»,- այսօր կայացած ՄԱՀԻԻ երրորդ երիտասարդական ֆորումի ժամանակ օրինակ բերեց ՀՀ նախագահ Արմեն Սարգսյանը:

Ըստ նրա՝ օրենքների պարզ փոփոխությունները հնարավորություն կտան երկրի ղեկավարի և նրա աշխատակազմի աշխատանքները դարձնել առավել արդյունավետ: 

Միջոցառմանը ներկա երիտասարդներից մեկը երկրի ղեկավարից հետաքրքվեց՝ հե՞շտ էր ընդունել ՀՀ նախագահ դառնալու առաջարկը: Ի պատասխան՝ Արմեն Սարգսյնաը նշեց, որ առաջարկն իրականում հեշտ չէր, որովհետև ինքը վաղուց որոշել էր, որ Հայաստանին պետք է ծառայի այլ ճանապարհով:

«Ես հպարտ եմ, որ ժամանակին մոտ երեք հարյուր հայ երիտասարդների օգնել եմ կրթություն ստանալ աշխարհի հեղինակավոր բուհերում: Ինձ համար այդ առաջարկն ընդունելը հեշտ չէր, գործունեությունս 180 աստիճան պետք է փոխեի: Գիտեի, թե ուր եմ գալիս: Ես կարծում էի, որ կարող եմ ներդրում ուենանալ: Ես հավատում եմ, որ մարդը յոթ տարվա մեջ կարող է իր օրինակով շատ բան փոխել: Բայց կան Աստծու գործեր...Աստծո դերը մեծ է: Յոթ տարվա մանդատը յոթ օրում փոխվեց, իմ երդմնակալության արարողությունից յոթ օր հետո մեծ ցուցեր սկսվեցին, իսկ յոթ օր հետո էլ ՀՀ վարչապետը հրաժարական տվեց»,- հիշեցրեց Արմեն Սարգսյանը:  
     
Մեկ այլ երիտասարդ էլ ՀՀ նախագահից հետաքրքրվեց՝  ինչպիսին էր տեսնում Հայաստանը նախագահի դերը ստանձնելու օրերին:

«Ճիշտ նույն Հայաստանն եմ տեսել: Բայց կարծում էի, որ այդ Հայաստանը յոթ տարվա մեջ կկառուցենք, պարզվեց՝ կառուցեցինք յոթ օրվա մեջ»,- ասաց նա:

Անդրադառնալով երիտասարդների զբաղվածության հարցին՝ Արմեն Սարգսյանը նշեց, որ սա իսկապես շատ զգայուն հարց է, որը խորհրդային տարիներին ավելի սահուն էր կազմակերպվում:   

«Այսօր ունենք մի շարք համալսարաններ, որտեղ մասնագիտությունները կրկնվում են, տարբեր համալսարաններում դասավանդում են միևնույն  մարդիկ, և հարց է՝ տվյալ մասնագիտության պահանջարկ կա, թե չկա: Օպտիմիզացիայի և վերագնահատման կարիք կա: Որպես կրթության ոլորտում փորձառություն ունեցող անձ՝ ես այս հարցում իմ խորհուրդներով ուրախությամբ կաջակցեմ կառավարությանը»,- նշեց ՀՀ նախագահը: