Ձեր վստահելի աղբյուրը

ՀՀ նախագահ Արմեն Սարգսյանն այսօր ներկա էր Միջազգային և անվտանգության հարցերի հայկական ինստիտուտի երրորդ երիտասարդական ֆորումին: Բացման խոսքով դիմելով ներկաներին՝ վերջինս ասաց.

«Նայում եմ ձեր դեմքերին և իմ դեմքը չեմ տեսնում՝ համարում եմ՝ ես էլ ձեր տարիքն ունեմ՝ նոր Հայաստանի ուրախ, երիտասարդ և հպարտ քաղաքացիներ: Կրկին անգամ անցնել այն օրերով, որոնք բոլորս ապրեցինք, իմաստ չունի, որովհետև մեզնից յուրաքանչյուրը մասնակից է եղել վերջին իրադարձություններին: Սակայն, եթե ի մի բերելու լինենք կամ վերնագրեր տանք փոփոխություններին, լավագույններից մեկը «Երիտասարդ Հայաստանն» է, ոչ միայն նրա համար, որ հեղափոխությունը երիտասարդներն էին անում, փողոցներում երիտասարդական ոգի կար, այլև այն բանի, որ երիտասարդությունը նաև հավատ է ապագայի նկատմամբ:   Երիտասարդի առջև բաց են բոլոր ճանապարհները: Երիտասարդ է այն մարդը, որ ունակ է սովորելու»:

Արմեն Սարգսյանի համոզմամբ, երիտասարդ լինելը տարիքի հետ կապ չունի, վաթսուն-յոթանասուն տարեկան մարդը ևս կարող է լինել երիտասարդ, եթե սովորելու և ապրելու եռանդ ունի:

«Եթե մարդու կյանքը նկարագրելու լինենք որպես ծառ, ապա հաճախ կյանքում լինում է  այնպես, որ մի ճյուղից մյուսն ես թռչում: Գոնե ինձ հետ այդպես եղել է: Ես գիտնական ֆիզիկոս էի, բայց 1991 թվականից մի ոտքս մի ճյուղի վրա է, մյուսը՝ ուրիշ: Ինձ թվում էր, թե կարող եմ շարունակել լինել գիտնական, միաժամանակ նաև դիվանագետ, բայց հասկացա, որ այդպես չի լինում: Գիտության մեջ ես պրոֆեսոր էի, դիվանագիտության մեջ աշակերտ, հետևաբեր պետք է սովորեի:
1991 թվականին ես ինձ կրկին շատ երիտասարդ զգացի, զգացի մեկը, ով կարող է սովորել:  Դպրոցն այն ժամանակ Հայաստանի Հանրապետությունն էր: Իմ ուսոuցիչները արտասահմանցի դիվանագետներ էին, շատ դեպքերում՝ որոշ երկրների վարչապետներ, նախագահներ ու ԱԳ նախարարներ:

Սրանից ամիսներ առաջ, երբ  ինձ առաջարկեցին կյանքը նորից փոխել, անցնել ուրիշ ճյուղի վրա, մտածեցի, որ կցանկանամ նոր բան սովորել: Նորից դպրոց: Կյանքը նորից փոխվել է, կյանքի ծառը բավականին հետաքրրքիր ծառ է: Եթե սովորելու բան կա, ես նորից կգնամ: Ինձ համար նորից դպրոց է պետք, սովորել կարող եմ նաև երիտասարդներից: Իսկ երիտասարդ լինելը, կրկնում եմ, հոգու իրավիճակ է: Եթե օրերդ անցնում են և նոր բան չես սովորում, կարծես հասել ես քո ծառի վերջին ճյուղին»,- նշեց ՀՀ նախագահը:

Արմեն Սարգսյանի խոսքով, այսօր Հայաստանում առկա ոգին ֆենոմենալ և յուրօրինակ է: Այդ իրողությունը, ըստ նրա, զգում են բոլորը՝ զգալով  հանրապետությունում թևածող էներգիան:

«Կարծես մենք նորից վերադարձել ենք մեր ծառի՝ Հայաստանի Հանապետության արմատներին, դեպի վեր գնալու բոլոր ճյուղերը մեր առջև բաց են: Ես Հայաստանը տեսնում եմ երիտասարդ Հայաստան: Ես ինձ էլ երիտասարդ եմ համարում, որը պետք է փորձի կերտել նախագահական մշակույթը: Բոլորս էլ լավ գիտակցում ենք, որ մեր հեղափոությունը թավշյա չէր կարող լինել, եթե Սահմանադրությունը տեղում չլիներ: Եթե մի օր Սահմանադրույթունը պետք  է փոխվի, ապա միայն ժողովրդի կամքի հիման վրա, ոչ թե ինչ-որ մեկը որոշի այն փոխել»,- ամփոփեց ՀՀ նախագահը: