Հույս ունեմ, որ կառավարությունը միջոցներ կձեռնարկի, աշխատատեղեր կավելանան. Աննա Հակոբյան
«Այո, ինձ ամբողջությամբ հաջողվում է զերծ մնալ այդ իրավիճակից, ես այդպես էլ նման իրավիճակի մեջ չհայտնվեցի, ինչի համար շատ ուրախ եմ»,- այսօր լրագրողների հետ հանդիպմանն ասաց ՀՀ վարչապետի տիկին Աննա Հակոբյանը՝ պատասխանելով լրագրողներից մեկի հարցին՝ իրեն ամբողջությամբ հաջողվել է զերծ մնալ պալատական շքախմբից։
Հիշեցնենք, որ ավելի վաղ նա հայտարարել էր, որ չունի սիրած երգիչներ, երգչուհիներ, դերասաններ, չի կարող և չի պատրաստվում մարդկանց աշխատանքի տեղավորելու միջնորդություններ անել։
«Ըստ էության, այդ ելույթը, կարող եմ ասել, իր նպատակին ծառայել է, և ինչ խնդիր, որ ես դրել էի իմ առաջ, հասել եմ»,- նշեց Աննա Հակոբյանը։
Նրա խոսքով՝ աշխատանքի դիմումներ է ստանում տասնյակ, ամեն օր, բայց դրանք ոչ թե իր հետ սուրճ խմած մարդկանցից են, այլ՝ քաղաքացիներից. «Դա ամենացավոտ մասն է այս աշխատանքի, որ ոչնչով չես կարող մարդուն օգնել, բայց ինքը մեծ հույսերով քեզ է դիմում։ Իմ պատասխանն այն է, որ պետք է նստեմ ինտերնետի դիմաց, մտնեմ այն կայքերը և փորձեմ հարմար աշխատանք գտնել, որևէ այլ կերպ, որևէ մեկին չեմ կարող աշխատանք գտնել։ Հույս ունեմ, որ կառավարությունը միջոցներ կձեռնարկի, աշխատատեղեր կավելանան, որովհետև նման դիմումներ տասնյակներով ստանում եմ»։
Անդրադառնալով հուլիսի 24-ին Մոսկվա կատարած այցի շրջանակներում Պետական Տրետյակովյան պատկերասրահում մի խումբ կանանց հետ հանդիպմանը Արցախի հակամարտության ծագման մասին հայտարարությանն ու դրան վերաբերող քննադատություններին, վարչապետի տիկինն ասաց. «Այդ հայտարարության վերաբերյալ քննադատությանը, որքանով ես եմ տեղյակ, երկու ուղղությամբ է հնչել` նախ հատվածի համար, որում նշվում է, թե կարևոր չէ` ինչից է ծագել այս հակամարտությունը, և որ մեր ու ադրբեջանցի երեխաների հայացքները նույնն էին։ Առաջինի հետ կապված արդեն առիթ ունեցել եմ մեկնաբանել, նորից կկրկնեմ` իհարկե, շատ կարևոր է, թե ինչից է ծագել Ղարաբաղյան հակամարտությունը, բայց կարևոր է նաև տարբերել, թե որտեղ է դա կարևոր և որտեղ կարևոր չէ: Այն լսարանում, որի առաջ ես խոսում էի, այն նպատակների համար, որոնց համար ես խոսում էի բոլորովին չէր ենթադրում խորանալ, քննարկել հակամարտության դետալները: Դա ընդամենը կանանց լսարան էր, ովքեր պետք է ուղղակի ոչ ասեն պատերազմին»։
Ինչ վերաբերում է 18-ամյա երեխաների հայացքներին՝ Աննա Հակոբյանն ասաց, որ այնտեղ ասվում էր. «Մեր զինվորները, երիտասարդներն, իհարկե, քաջ են, բայց յուրաքանչյուր դեպքից առաջ, յուրաքանչյուր քաջությունից առաջ նախ վախն է, որը կանգնած է մահվան սպառնալիքի առաջ, ընդ որում` անհասկանալի է, թե ինչ պայմաններում, ինչ կտտանքների կենթարկվի կամ ինչ կկատարվի իր հետ, նա չի կարող հայացքում վախ չունենալ: Ուղղակի հարց է, թե այդ վախին հաջորդող վայրկյաններն ինչ կլինեն` փախուստի՞, թե՞ հերոսության վայրկյաններ»։
Նա հավելեց, որ ելույթը այն մասին էր, որ «մեր երեխաները չփորձարկվեն` ոչ նրանց փախուստը, ոչ նրանց հերոսությունը»: