Ձեր վստահելի աղբյուրը

Օրեր առաջ ՀՀ վարչապետ Նիկոլ Փաշինյանը հրահանգել էր ԱԱԾ-ին և ոստիկանությանը իրականացնել ռեյդեր օլիգարխների, բարձրաստիճան պաշտոնյաների, այսպես կոչված, թիկնազորներին պառկեցնել ասֆալտներին և զինաթափել բոլորին: «Ժողովուրդ»-ի հետ զրույցում փաստաբան Տիգրան Աթանեսյանը հայտնել էր, որ առանց հիմքի որևէ մեկին չեն կարող «պառկացնել»:

Երեկ ՀՀ ոստիկանության պետ Վալերիյ Օսիպյանն էլ ասել էր, որ խնդիրը շարասյունով երթևեկելն է, քանի որ իրենք բազմաթիվ  բողոքներ ենք ստանում համաքաղաքացիներից, որ շարասյուները խանգարում են երթևեկությանը։

Panorama.am-ը հետաքրքրվեց Մասնավոր Պահնորդական գործունեություն իրականացնող և (թիկնապահ) պահնորդներ ուսուցանող կազմակերպությունների միության նախագահ Էդուարդ Սիմոնյանից, թե արդյո՞ք բոլոր թիկնապահները որակավորում ունեն, կարո՞ղ են առանց որակավորում ունենալու՝ թիկնապահական գործունեության ծավալել, ո՞վ է իրականացնում վերահսկողությունը։  

Նա նշեց, որ այսօր շուկայում լիցենզավորված է 54 կազմակերություն, որոնց մի մասը գործունեություն չեն ծավալում, քանի որ համապատասխան պայմանագրեր չկան։ 

«Բոլոր կազմակերություններն ունեն  արտոնագիր, քանի որ առանց արտոնագրի գործունեություն իրականացնելու իրավունք չունեն։ Տարիների ընթացքում լիցենզավորված կազմակերպություններն ավելանում են, օրինակ 2014-ին՝ 13-14 կազմակերպություն էր, այսօր արդեն 54»,- ասաց Է.Սիմոնյանը։

Նա մանրամասնեց, որ լիցենզավորված ուսումնական հաստատություններում  դասընթացներ անցնելուց հետո ստանում են համապատասխան վկայական` կրթություն ստանալու մասին, այնուհետև  կամ պահնորդական կազմակերպությունը կամ անհատական դիմում են ոստիկանությունում գործող պահնորդի և թիկնապահի որակավորման հանձնաժողովին, որի կազմում ընդգրկված են մասնավոր պահնորդական կազմակերպությունից 3 անձ։  Եթե որակավորումը համապատասխանում է, դառնում են որակավորված թիկնապահ կամ պահնորդ։ Իսկ պահնորդը կամ թիկնապահը զենք կրելու իրավունք ձեռք բերելու համար պետք է ոստիկանության ակադեմիայում անցնի համապատասխան դասընթաց և անհրաժեշտ քննություն հանձնի։

Հարցին՝ որակավորում չունեցող թիկնապահը կարո՞ղ է թիկնապահական ծառայության մատուցել, նա ասաց՝ ոչ. «Օրենքի խախտում է, եթե անօրինական զենք է կրում,  պետք է քրեական գործ հարուցվի»։  

Վերահսկողությունն իրականացում է լիազոր մարմինը՝ ի դեմս ՀՀ ոստիկանության։

Հարցին՝ արդյո՞ք օլիգարխների թիկնապահները  լիզենզավորված կազմակերպություններից են, Է. Սիմոնյանն ասաց. «Ինչքան գիտեմ՝ մեր կազմակերությունները որևէ օլիգարխի թիկնապահ չի տրամադրել։ Չեմ կարող ասել, թե որտեղի  են վարձում։ Ոստիկանության համակագորւմ գործում է թիկնապահական ծառայություն, որից օգտվում են տնտեսվարողները։ Շատերն իրենց նախաձեռնությամբ են իրենց յուրայիններին դարձնում  իրենց թիկնապահ։ Վարչապետը հենց նրանց մասին էր ասում, որ պետք է անօրինական զինված խմբավորումներին զինաթափել։
Օրենքով թույլատրվում է  երեք հոգուց ոչ ավելի ուղեկցող, իսկ մեզ մոտ՝ մի քանի մեքենայով, յուրաքանչյուր մեքենայում 3-4 ուղեկցող կա։ Դա անթույլատրելի է, նրանք շրջապատում տհաճ մթնոլորտ են ստեղծում»։

Է. Սիմնոյնաի տեղեկություններով, ՀՀ ոստիկանության  թիկնապահական վաշտի ծառայողների և հանձնաժողովի կողմից որակավորվում ստացած թիկնապահների թիվը չի անցնում 200-ից։

«Այսօր իրականում ավելի շատ են թիկնապահներով շրջող մեծահարուստներն ու օլիգարխները»,- ընդգծեց նա։