Ձեր վստահելի աղբյուրը

«Քարոզարշավի ընթացքում խախտումներ չեմ նկատել: Կարծում եմ՝ այս ընտրությունները ցույց կտան, որ հեղափոխության արդյունքում մենք կունենանք նոր իրավիճակ: Միայն թե այն պայմանավորվածությունները, որ ունեին քաղաքական ուժերը՝ իրար նկատմամբ հարգալից, կոռեկտ լինելու առումով, մի փոքր խախտվեցին: Սոցիալական ցանցերում ընդհուպ անձնական վիրավորանքներ եղան: Նաիրա Զոհրաբյանի հասցեին կեղտոտ պրիոմներն անընդունելի էին»,- այսօր տեղի ունեցած մամուլի ասուլիսի ժամանակ ասաց ԲՀԿ գործիչ,  ԱԺ փոխնախագահ Միքայել Մելքումյանը:

Նրա համոզմամբ, քաղաքապետի ընտրությունները քաղաքական ընտրություններ են: «Որևէ մեկը թող չկասկածի, որ ավագանիում պետք է լինեն քաղաքականությունից հասկացող անձինք: Ինչ վերաբերում է զուտ քարոզարշավի ընթացքին, հաճախ ծրագրերը մի կողմ են քշվում և մեծ մասով մրցակցային բառապաշարով գնահատականներ են տրվում: Մրցակիցների վերաբերյալ գնահատականներով ոմանք փորձում են դիվիդենտներ շահել»,- ասաց Միքայել Մելքումյանը:

Բանախոսը չցանկացավ արձագանքել ՀՀ վարչապետի երեկվա այն հայտարարությանը, որ ոմանց պետք է ոչ միայն ասֆալտին փռել, այլ «պատին տալ»: «Պարտադիր չէ ամեն ասվածին արձագանքել: Հետո, պարտադիր չէ, որ ասվածը կապված լինի Երևանի ավագանու ընտրությունների հետ»,- ասաց նա:

Հարցին՝ այսքանով հանդերձ՝ ՔՊ-ին իրենց գործընկեր դիտարկո՞ւմ են, ԲՀԿ փոխնախագահը պատասխանեց՝ մրցակցությունը թշնամանքի չպետք է վերածվի: «Լայն առումով մենք իրականացնում ենք կառավարության գործունեության մի մասը, իսկ ընտրութուններին ընդառաջ՝ լարվածություն թող մի քիչ լինի, աշխարհը դրանից չի փլվի: Ինչ վերաբերում է քաղաքական ուժերի ծրագրերին, կարևորը ոչ թե ծրագրեր ներկայացնելն է, այլ այդ ծրագրերն իրականացնելու մեծ ռեսուրսներ ունենալը: Իսկ ԲՀԿ-ն, իրա առաջնորդով, նման ռեսուրս ունի»,- նշեց քաղաքական գործիչը:

Ասուլիսին ներկա  ԱԺ «Ծառուկյան դաշինք» խմբակցության քարտուղար Վահե Էնֆիաջյանն իր հերթին նկատեց, որ իրենք ցանկություն  ունեին նոր որակի քարոզչություն իրականացնել, սակայն երբեմն հարկադրված եղան հակադարձելու և իրավիճակներ պարզաբանելու՝ հորդորելով բոլոր քաղաքական ուժերին վերադառնալ քաղաքակիրթ հուն:

«Մի քանի օր է մնացել, այդ օրերը վճռորոշ են լինելու՝ թեկնածուներին, ծրագրերը լավագույնս ներկայացնելու առումով»,- ասաց նա:

Վահե Էնֆիաջյանը միաժամանակ անդրադարձավ «Իմ քայլը» դաշինքի ցուցակում ներգրավված մի շարք անձանց խնդրին:

«Մենք չենք ուզում շատ չակերտները բացել, ուզում ենք ունենալ որակապես նոր քարոզարշավ: Բայց ինչպե՞ս է համադրությունն ընկալվում, որ  ՀՀԿ Արաբկիր տարածքային կառույցի փոխնախագահը՝ Էդուարդ Երանոսյանը, սատարում է Հայկ Մարությանին: Ի դեպ, մամուլում հրապարակումներ կան, որ նա առաջիկայում դառնալու է Արաբկիր վարչական շրջանի ղեկավար: Մի ուշագրավ բան ևս. 2008 թվականի հուլիսի 2-8-ը լույս տեսած TV մոլ պարբերականում նույն Հայկ Մարությանը հանդես է եկել հայտարարությամբ, որ իր որդին՝ Արթուր Մարությանը, ծնվել է Սերժ Սարգսյանի երդմնակալության օրը»,- ասաց պատգամավորը:

Ինչ վերաբերում է ԲՀԿ-ի կողմից ընտրակաշառք բաժանելու մասին լուրերին՝ Վահե Էնֆիաջյանը շեշտեց, որ դա ապատեղեկատվություն է, որով փորձում են ստվերել կուսակցության բարի համբավը: «Մեր  քաղաքական ուժը ընտրակաշառքի նպատակ երբեք չի ունեցել: Օրենքի ամբողջ խստությամբ թող պատժվեն բոլոր այն անձինք, ովքեր ընտրակաշառք կբաժանեն: Սա մեր բարի համբավի արատավորումն է»,- ասաց Էնֆիաջյանը:

Միքայել Մելքումյանն իր հերթին ընտրություններին մասնակից բոլոր ուժերին մրցակից համարեց՝ նշելով, որ բոլորին հարգում են և ակնկալում են նմանատիպ վերաբերմունք իրենց հանդեպ: «Երևանցին մեզ պետք է ընտրի, քանի որ մենք ցույց ենք տալիս պայմաններ, որոնցով կարողանալու ենք լուծել քաղաքի խնդիրները»,- ասաց նա: