Ձեր վստահելի աղբյուրը

ԱՀ բնապահպանության և բնական ռեսուրսների նախարարության անմիջական վերահսկողության տակ գտնվող «Կանաչ Արցախ կենսոլորտային համալիր» ՊՈԱԿ-ն իր գործունեությունը սկսել է 2018 թվականի հուլիսի 3-ից: Այս  մասին  «Արցախպրես»-ի  թղթակցի  հետ զրույցում   ասել  է  «Կանաչ Արցախ կենսոլորտային համալիր» ՊՈԱԿ-ի    տնօրեն  Վահրամ  Հայրապետյանը:

Նրա   խոսքով՝  կազմակերպության գործունեության նպատակը բնության հատուկ պահպանվող տարածքների՝ պետական արգելոցի, ազգային պարկի, պետական արգելավայրի ստեղծումն է, բնական էկոհամակարգերի, լանդշաֆտային և կենսաբանական բազմազանության, բնության ժառանգության գիտական ուսումնասիրության, պահպանության, պաշտպանության, հաշվառման, գույքագրման, դիտանցի, բնության տարեգրության վարման, ինչպես նաև բնական պաշարների կայուն օգտագործման ապահովումը։

ՊՈԱԿ-ի  նպատակներից  է նաև,  հետագա հետազոտությունների ընթացքում ուսումնասիրել և ներկայացնել Արցախի բուսական և կենդանական աշխարհում հազվագյուտ և անհետացման եզրին խոցված վիճակում գտնվող օրգանիզմների մասին նկարագիրը և մշակել դրանց պահպանման  ուղիները։

Ըստ «Կանաչ Արցախկենսոլորտային համալիր»  ՊՈԱԿ-ի կանոնադրության՝  կազմակերպությունն ունի 3 մասնաճյուղ՝ «Կովսական» պետական արգելոց, «Սոսիների պուրակ» պետական արգելավայր  և «Կաչաղակաբերդ» ազգային պարկ:

«Հիմնադրման պահից սկսած, կազմակերպությունը կատարել է այցելություններ բնության հատուկ պահպանության տակ գտնվող տարածքներ, իրականացրել՝ քարտեզագրման, գույքագրման աշխատանքներ: Այժմ    կատարվում են որոշ տարածքների սահմանագծերի վերաբերյալ ճշտումներ: Ինչպես  նաև հասարակության  շրջանակներում  կազմակերպության   իրավասության սահմաններում  իրականցվում է դաստիարակչական, կրթական աշխատանքներ»,-ավելացրել  է  Վ.  Հայրապետյանը։

Խոսելով  ՊՈԱԿ-ի  առաջիկա  ծրագրերի  մասին՝ նա տեղեկացրել    է, որ  իրենց  կողմից   նախատեսվում  է   իրականացնել  Արցախի բույսերի կարմիր գրքի ստեղծումը, կենդանիների կարմիր գրքի վերահրատարակումը, ազգային պարկի, արգելոցի, արգելավայրի բուսական և կենդանական օրգանիզմների վերաբերյալ  բուկլետների  հրատարակումը։