Ձեր վստահելի աղբյուրը

«Այսօր պարոն Աշոտյանն ակնարկում էր, որ հնարավոր է՝ այդքան էլ ճիշտ չենք հասկացել իրար։ Այս դեպքում հարց է ծագում. եթե խոսում ենք և իրար ճիշտ չենք հասկանում, ի՞նչ իմաստ ունի խոսել»,- ԱԺ-ում լրագրողների հետ զրույցում ասաց ՀՀ վարչապետ Նիկոլ Փաշինյանը։
Այսինքն՝ հնարավոր է՝ քաղաքական ուժերի հետ բանակցություններն ընդհատվե՞ն, հետաքրքրվեցին լրագրողները։

«Դե համենայնդեպս այսօր նման խոսակցություն չի եղել և պլաններ չկան։ Քանի դեռ չկան հստակ ազդակներ, որ մեր գործընկերները իրավիճակը ճիշտ են հասկանում, կարծում եմ ՝ այդ խոսակցության ռացիոնալության վերաբերյալ հարցեր կարող են լինել։ Մենք մեր պլանով գնալու ենք առաջ և, կարծում եմ, ակնհայտ է, որ արտահերթ ԱԺ ընտրությունների պահանջը համաժողովրդական պահանջ է։ Ես դժվար եմ պատկերացնում այն մարդկանց, ովքեր պատրաստվում են դիմադրել դրան»,- ասաց վարչապետը։

Անդրադառնոլով ՀՀԿ-ի կողմից վարչապետի հնարավոր թեկնածուի առաջադրման թեմային՝ Նիկոլ Փաշինյանը հիշեցրեց՝ ՀՀԿ-ն իր թեկնածուին առաջադրել և վարչապետ էլ ընտրել էր, սակայն  դրանից ոչինչ չի փոխվել։

«Հիմա ավելի լավ իրավիճակ է, քան մենք ունեինք ապրիլ-մայիս ամիսներին։ Մենք հիմա քննարկում ենք կառավարության կազմը։ Կուսակցական պատկանելությունն առաջնային չի լինելու մեր հետագա կադրային քաղաքականության մեջ, առաջնային լինելու են պրոֆեսիոնալ կարողությունները»,- ասաց վարչապետը։

Նիկոլ Փաշինյանը կրկին շեշտեց, որ երեկվա բանակցությունների արդյունքում խորհրդարանական ուժերը հստակ կերպով հավաստիացրել են, որ վարչապետի թեկնածուներ չեն առաջադրելու։

«Քանի դեռ արտահերթ խորհրդարանական ընտրություններ տեղի չեն ունեցել, ներքաղաքական ճգնաժամը խորանում է, այն հաղթահերլու միակ տարբերակը արտահերթ ընտրություններն են։ Ես ասում էի, որ կա երկու տարբերակ. մինչ ընտրությունները խորհրդարանական խմբակցությունների հետ գնալ համագործակցության և կամ ոչ համագործակցության մթնոլորտում։ Եթե իրենք հակված լինեն աշխատել, մենք պատրաստ ենք միջազգային պրոֆեսիոնալ կազմակերպություններին ասել՝ ինչ փոփոխոթյուններ ուզում եք՝ առաջարկեք ԸՕ-ում։ Մենք որևէ խնդիր չունենք»,- ասաց վարչապետը։

Դիտարկման հետ, որ իրեն ընդդիմադիր ուժ չկա, Նիկոլ Փաշինյանը չհամաձայնեց։ Նրա համոզմամբ, ժողովուրդը կկատարի իր ընտրությունը և կունենանք պատշաճ խորհրդարան՝ այդ թվում՝ ընդդիմադիր ուժի ներկայությամբ։

Անդրադառնալով երեկ ուշ երեկոյան ԱԺ գումարած արտահերթ նիստին՝ Նիկոլ Փաշինյանը նկատեց, որ խորհրդարանը փորձում էր կառավարությունից թաքուն գործողությունների դիմել։

«Մենք տեղյակ էինք, բայց նաև ասում էինք՝ մի գնացեք այդ ճանապարհով, որովեհտև այդ  ճանապարհի վերջում լինելու է այն, ինչ երեկ եղավ։ Ես հարկ եմ համարել գալ և ԱԺ նախագահին և ՀՀԿ խմբակցության ղեկավարին տեղյակ պահել»,- փաստեց գործադիրի ղեկավարը։

Հարցին՝ մտավախություն չունի՞, որ ՀՀ նախագահը չի ստորագրի ԱԺ կանոնակարգ ՀՀ օրենքը, Նիկոլ Փաշինյանը շեշտեց՝ ինքը չի կարծում, որ Արմեն Սարգսյանը ՀՀ քաղաքացիների դեմ որևէ քայլ կանի։

Հաջորդ հարցին՝ ի՞նչ տեղի կունենա, եթե արտահերթ խորհրդարանական ընտրությունները տեղի ունենան մայիսին, վարչապետը նկատեց՝ քաղաքական ճգնաժամը կշարունակվի։

«Երկրում ճգնաժամ է հաստատված։ Մենք պատրաստվում ենք լուծել ճգնաժամը և կլուծենք։ Կարծում եմ՝ ՀՀ քաղաքացիները լիարժեք պատրաստ են և պլան Ա-ին, և պլան Բ-ին և նույնիսկ պլան Գ-ին»,- համոզմունք հայտնեց վարչապետը։

Իսկ կարծո՞ւմ է, որ երեկվա ԱԺ-ի հայտնի իրադարձությունները ստվերային, դրսի ուժ էր ղեկավարում, ինչպես օրինակ ՀՀ երկրորդ նախագահ Ռոբերտ Քոչարյանը, Նիկոլ Փաշինյանը պատասխանեց՝ դա իրեն չի հետաքրքրում։

«Իմ կարծիքն այն է, որ նրանք նորից սխալվեցին»,- ամփոփեց գործադիրի ղեկավարը։