Կերչում ընկերուհուն կորցրած հայ տղան նետվել է պատուհանից
Կերչի ահաբեկչության հետևանքով ընկերուհուն կորցրած 20-ամյա հայ տղան՝ Արմեն Բադալյանը, ենթադրվում է, ինքնասպանության փորձ է կատարել։ Vesti-k.ru-ի փոխանցմամբ, նա անհայտ հանգամանքներում ընկել է պատուհանից։ Նրա ընկերուհին՝ Վիկտորյա Դեմչուկը մահացել է ուղղաթիռում՝ հիվանդանոց տեղափոխվելու ճանապարհին։
Արմենի քույրը պատմել է, որ եղբայրն ուժեղ շոկի մեջ է, նա իսկապես սիրում էր Վիկտորյային։
«Երբ այդ դժբախտությունը պատահեց, նա չէր հեռանում հիվանդանոցում գտնվող Վիկտորյայի մահճակալի մոտից, նրա ծնողների հետ հերթապահում էր այնտեղ։ Բժիշկներն ամպուտացիայի էին ենթարկել աղջկա ոտքերը։ Հույս ունեինք, որ նա կփրկվի։ Սակայն Մոսկվա տեղափոխելու ճանապարհին նա մահացավ»,-ասել է Արմենի քույրը։
Նա ասել է՝ եղբայրը խորապես ցնցված է, տեղը չէր գտնում, իսկ երեկ էլ հայտնի է դարձել, որ եղբայրն ընկել է չորրորդ հարկի բնակարանի պատուհանից՝ թողնելով մի գրառում։ Բժիշկները նշել են, որ Արմեն Բադալյանն ընկնելու հետևանքով ողնաշարի հատվածում մի քանի կոտրվածք է ստացել։
Ծանր վիճակում նրան տեղափոխել են Կերչի հիվանդանոց։ Նրան անհրաժեշտ է լուրջ բուժօգնություն, որը ստանալու նպատակով նա հատուկ օդանավով կտեղափոխվի Կուբանի հիվանդանոցներից մեկը։
Հիշեցնենք, որ Կերչի քոլեջներից մեկում հոկտեմբերի 17-ին տեղի ունեցած ահաբեկչության հետևանքով զոհվել է 21 մարդ, որից 16-ն ուսանողներ են, 5-ը՝ քոլեջի աշխատակիցներ։ Տարբեր աստիճանի վնասվածքներ է ստացել 50 մարդ։
Հարակից հրապարակումներ`
- Արա Բաբլոյանը ցավակցական խոսք է հղել Կերչում զոհվածների հարազատներին
- Պուտինը Կերչում տեղի ունեցած ողբերգությունը համարում է գլոբալիզացիայի հետևանք
- Արմեն Սարգսյանը ցավակցել է Կերչում տեղի ունեցած պայթյունի կապակցությամբ
- Կերչում մահացածների թվում հայեր չկան