Փակուղին Լեմկինի անունով կոչելու քվեարկությանը «Լույս»-ի անդամները չմասնակցեցին
Երևանի ավագանու այսօրվա նիստի օրակարգի առաջին հարցը վերաբերում էր Բաղրամյան պողոտայի 1-ին փակուղին լեհ իրավագետ Ռաֆայել Լեմկինի անվամբ անվանակոչելուն։ Նա «ցեղասպանություն» եզրույթի հեղինակն է, մեծ ավանդ է ունեցել Հայոց ցեղասպանության խնդրի բարձրաձայնման և միջազգային ճանաչման հարցում։
Նման հարցի քննարկման առիթ է հանդիսացել այն, որ դեկտեմբերի 9-11-ը Երևանում անցկացվելու է Ընդդեմ ցեղասպանության հանցագործության Երրորդ գլոբալ ֆորումը, միջնորդությունն էլ ներկայացրել է ԱԳ նախարարությունը, համարում են, որ այն ներկայացուցչական փողոց է։
Որոշման նախագիծի համաձայն, արդարադատության նախարարության կողմից տրվել է փորձագիտական եզրակացություն, որով որոշման նախագիծը համապատասխանում է Հայաստանի օրենսդրության պահանջներին:
Ավագանու «Լույս» խմբակցության ղեկավար Դավիթ Խաժակյանը հայտարարեց, որ խմբակցության երեք անդամները չեն մասնակցելու քվեարկությանը։ Նա երկու պատճառ նշեց, նախ կառավարության որոշումը սահմանում է, որ Երևանում փակուղիները պետք է համարակալվեն, ոչ թե անվանակոչվեն, ապա՝ անհրաժեշտ է Երևանում ունենալ Լեմկինի անվան փողոց, ոչ թե փակուղի։
Երևան քաղաքի ավագանու մշակույթի, կրթության և սոցիալական հարցերի մշտական հանձնաժողովի նախագահ Սաթենիկ Մկրտչյանը հայտարարեց, նախագիծը նորից է ուղարկվել իր ղեկավարած հանձնաժողով, իրենք որոշել են գործադիրից ստանալ հավաստում, որ փակուղին կարելի է անվանակոչել։ Ստացել են, հանձնաժողովի անդամներն էլ տվել են դրական կարծիք նախագծի վերաբերյալ։
«Լույս» դաշինքի անդամ Անի Սամսոնյանն իր ելույթում նկատեց, եթե մի կողմ թողնենք իրավական կարգավորումը, ապա նույնիսկ այդ դեպքում լավ չի հնչում «Լեմկինի անվան փակուղի»-ն։
«Եվ ես զարմանում եմ, որ նորից կանգ եք առել այդ փակուղու վրա, երբ Երևանում, պարտադիր չէ՝ Կենտրոնում, այլ վարչական շրջաններում կարելի է գտնել փողոց և անվանակոչել կամ անվանափոխել: Դուք ուզում եք հավերժացնել պարոն Լեմկինի հիշատակը, բայց նրա անունով փակուղի կոչելով՝ նրա անունը չի հավերժացվում, ես ձեզ վստահեցնում եմ։ Դուք էլ դա լավ հասկանում եք, ի՞նչ է ամեն լավագույնը պետք է Կենտրոնում լինի՞, բա ուր մնաց Երևանի համաչափ զարգացումը»,- հայտարարեց «Լույս» խմբակցության անդամ Անի Սամսոնյանը:
Քաղաքապետարանի «Իմ քայլը» խմբակցության անդամներից մեկն ասաց, իր մանկության բակն է, հիմա այն փակուղի համարել չի կարելի, քանի որ ունի հետիոտնի համար նախատեսված առնվազն չորս ելք ու մուտք դեպի հարակից Մոսկովյան, Սարյան, Ալիխանյան փողոցներ։ Նա առաջարկեց փակուղու կարգավիճակը փոխել ու դարձնել փողոց։
Քաղաքապետի խորհրդական Կամո Արեյանն էլ մանրամասնեց կառավարության 2015-ի որոշմամբ սահմանված կարգը, ասաց՝ որևէ դրույթ չի խախտվում, անվանափոխությունից հետո այն կոչվելու է Լեմկինի փողոց։
«Որոշումն ամբողջությամբ, իրավաչափ ու իրավազոր է »,-կարծիք հայտնեց Արեյանը։
Հարցը դրվեց քվեարկության, ընդունվեց։ Գրանցվեց 46 անդամ, դեմ, ձեռնպահ քվեարկողներ չեղան։
Լրահոս
Տեսանյութեր
Բագրատ Սրբազան. ՔՊ անդամներ արդեն իսկ ներքին ուղերձներ են հղում, թե ինչպես կարող են միանալ մեզ